Vinfast: ಭಾರತದಲ್ಲಿ ಹೊಸ ಕಾರು ಕಂಪನಿ: ಬುಕಿಂಗ್ ಪ್ರಾರಂಭ... 21,000 ರೂ. ಪಾವತಿಸಿದರೆ ಸಾಕು!

ಈ ವರ್ಷದ ಆರಂಭದಲ್ಲಿ ನಡೆದ ಭಾರತ್ ಮೊಬಿಲಿಟಿ ಗ್ಲೋಬಲ್ ಎಕ್ಸ್‌ಪೋದಲ್ಲಿ ಯಶಸ್ವಿಯಾಗಿ ಪಾದಾರ್ಪಣೆ ಮಾಡಿದ ವಿಯೆಟ್ನಾಂ ಮೂಲದ ಪ್ರಮುಖ ಕಾರು ಕಂಪನಿ 'ವಿನ್‌ಫಾಸ್ಟ್', ಇದೀಗ ತನ್ನ ಪ್ರೀಮಿಯಂ ಎಲೆಕ್ಟ್ರಿಕ್ ಎಸ್‌ಯುವಿಗಳಾದ ವಿಎಫ್ 7 ಮತ್ತು ವಿಎಫ್ 6 ಕಾರುಗಳಿಗಾಗಿ ಇಂದು ಭಾರತೀಯ ಮಾರುಕಟ್ಟೆಯಾದ್ಯಂತ ಬುಕಿಂಗ್ ಅನ್ನು ಅಧಿಕೃತವಾಗಿ ತೆರೆದಿದೆ. ತಮಿಳುನಾಡಿನ ತೂತುಕುಡಿಯಲ್ಲಿ ಕಂಪನಿಯ ಸ್ಥಾವರ ಉದ್ಘಾಟನೆಯ ನಂತರ, ಈ ಮಾಡಲ್‌ಗಳನ್ನು ಆಗಸ್ಟ್‌ನಲ್ಲಿ ಅಧಿಕೃತವಾಗಿ ಸಾರ್ವಜನಿಕ ಮಾರಾಟಕ್ಕೆ ಬಿಡುಗಡೆ ಮಾಡಲಾಗುವುದು ಮತ್ತು ನಂತರ ವಿತರಣೆಗಳು ನಡೆಯಲಿವೆ ಎಂದು ಕಂಪನಿ ತಿಳಿಸಿದೆ.

ಭಾರತೀಯ ಗ್ರಾಹಕರು ಈಗ ವಿನ್‌ಫಾಸ್ಟ್ ಎಲೆಕ್ಟ್ರಿಕ್ ಎಸ್‌ಯುವಿಯನ್ನು ವಿನ್‌ಫಾಸ್ಟ್ ಶೋರೂಮ್‌ಗಳಲ್ಲಿ ಅಥವಾ ಕಂಪನಿಯ ಅಧಿಕೃತ ವೆಬ್‌ಸೈಟ್ ವಿನ್‌ಫಾಸ್ಟ್ ಆಟೋ.ಇನ್ ಮೂಲಕ 21,000 ರೂ.ಗಳ ಪಾವತಿಸಿ ಬುಕಿಂಗ್ ಮಾಡಿಕೊಳ್ಳಬಹುದು. ಸದ್ಯ ತಮಿಳುನಾಡಿನ ತೂತುಕುಡಿಯಲ್ಲಿರುವ ವಿನ್‌ಫಾಸ್ಟ್‌ನ ಮುಂಬರುವ ಕಾರ್ಖಾನೆಯಲ್ಲಿ ವಾಹನಗಳನ್ನು ಸ್ಥಳೀಯವಾಗಿ ನಿರ್ಮಿಸಲಾಗುವುದು.

ಭಾರತೀಯ ರಸ್ತೆಗಳು ಮತ್ತು ಗ್ರಾಹಕರ ಅಗತ್ಯಗಳಿಗೆ ಅನುಗುಣವಾಗಿ ಜಾಗತಿಕ-ಗುಣಮಟ್ಟದಲ್ಲಿ ವಿನ್ಯಾಸಗೊಳಿಸಲಾದ ವಿಎಫ್ 7 ಮತ್ತು ವಿಎಫ್ 6 ಒಂದೇ ಚಾರ್ಜ್‌ನಲ್ಲಿ ಪ್ರಭಾವಶಾಲಿ ರೇಂಜ್ ನೀಡುತ್ತವೆ. ಎರಡೂ ಮಾಡಲ್‌ಗಳನ್ನು ದೈನಂದಿನ ನಗರ ಪ್ರಯಾಣ, ಇಂಟರ್‌ಸಿಟಿ ಪ್ರಯಾಣ ಅಥವಾ ವಾರಾಂತ್ಯದ ವಿಹಾರಗಳ ಅನುಕೂಲಕ್ಕಾಗಿ ವಿನ್ಯಾಸಗೊಳಿಸಲಾಗಿದೆ. ಸೌಕರ್ಯ, ಕಾರ್ಯಕ್ಷಮತೆ ಮತ್ತು ಅತ್ಯಾಧುನಿಕ ತಂತ್ರಜ್ಞಾನ ಒಳಗೊಂಡಿವೆ ಎಂದು ಕಂಪನಿ ಹೇಳಿದೆ.

ಕಾರುಗಳ ಮುಖ್ಯಾಂಶಗಳು

ವಿನ್‌ಫಾಸ್ಟ್ VF 7: ವಿಶಾಲವಾದ ಪ್ರೀಮಿಯಂ ಒಳಾಂಗಣ, ಲೆವೆಲ್ 2 ಅಡ್ವಾನ್ಸ್ಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್ಸ್ (ADAS), ದೊಡ್ಡ ಟಚ್‌ಸ್ಕ್ರೀನ್, ಕನೆಕ್ಟೆಡ್ ಕಾರ್ ಟೆಕ್, ಪನೋರಮಿಕ್ ಗ್ಲಾಸ್ ರೂಫ್, ವೈರ್‌ಲೆಸ್ ಚಾರ್ಜಿಂಗ್ ಮತ್ತು ಸಿಗ್ನೇಚರ್ ಎಲ್‌ಇಡಿ ಲೈಟಿಂಗ್ ಅನ್ನು ಒಳಗೊಂಡಿರುವ ಡೈನಾಮಿಕ್ ಎಲೆಕ್ಟ್ರಿಕ್ SUV ಆಗಿದೆ.

ವಿನ್‌ಫಾಸ್ಟ್ VF 6: ಕುಟುಂಬ-ಆಧಾರಿತ ಮತ್ತು ಸ್ಟೈಲಿಶ್ ಆಗಿ ಡಿಸೈನ್ ಮಾಡಲಾದ VF 6 ಪ್ರೀಮಿಯಂ ಸೌಕರ್ಯದೊಂದಿಗೆ ಲೆವೆಲ್ 2 ADAS, ಆಕರ್ಷಕ ಇನ್ಫೋಟೈನ್‌ಮೆಂಟ್ ಸಿಸ್ಟಮ್, ಕನೆಕ್ಟೆಡ್ ಫೀಚರ್ಸ್, ಸಿಗ್ನೇಚರ್ ಲೈಟಿಂಗ್ ಮತ್ತು ಪನೋರಮಿಕ್ ರೂಫ್‌ನೊಂದಿಗೆ ಬರುತ್ತದೆ - ದೈನಂದಿನ ಪ್ರಾಯೋಗಿಕತೆ ಮತ್ತು ಸ್ಮಾರ್ಟ್ ಚಾಲನೆಗಾಗಿ ಈ ಕಾರನ್ನು ವಿನ್ಯಾಸಗೊಳಿಸಲಾಗಿದೆ.

ಪ್ರೀ-ಬುಕಿಂಗ್ ಕುರಿತು ಮಾತನಾಡಿದ ಸಿಇಒ ಫಾಮ್ ಸಾನ್ ಚೌ, " ವಿಎಫ್ 6 ಮತ್ತು ವಿಎಫ್ 7 ಸ್ಥಳೀಯ ಅಗತ್ಯಗಳಿಗೆ ಅನುಗುಣವಾಗಿ ವಿಶ್ವ ದರ್ಜೆಯ ಇವಿಗಳನ್ನು ತರುವ ನಮ್ಮ ದೃಷ್ಟಿಯನ್ನು ಪ್ರತಿನಿಧಿಸುತ್ತವೆ. ಭಾರತೀಯ ಗ್ರಾಹಕರು ಈ ಮಾಡಲ್‌ಗಳನ್ನು ಸ್ಪರ್ಧಾತ್ಮಕವಾಗಿ ಮಾತ್ರವಲ್ಲದೆ, ನಿಜವಾಗಿಯೂ ಸ್ಪೂರ್ತಿದಾಯಕವಾಗಿಯೂ ಕಂಡುಕೊಳ್ಳುತ್ತಾರೆ ಎಂದು ನಮಗೆ ವಿಶ್ವಾಸವಿದೆ" ಎಂದು ಹೇಳಿದರು.

ಈಗಾಗಲೇ ವಿನ್‌ಫಾಸ್ಟ್ 27 ನಗರಗಳಲ್ಲಿ 32 ಡೀಲರ್‌ಶಿಪ್‌ಗಳನ್ನು ಸ್ಥಾಪಿಸಲು 13 ಡೀಲರ್ ಪಾಲುದಾರರೊಂದಿಗೆ ಒಪ್ಪಂದಗಳಿಗೆ ಸಹಿ ಹಾಕಿದೆ, ಇದು ದೃಢವಾದ 3S (ಮಾರಾಟ, ಸೇವೆ, ಬಿಡಿಭಾಗಗಳು) ಪರಿಸರ ವ್ಯವಸ್ಥೆಯನ್ನು ರೂಪಿಸುತ್ತದೆ. ಹಾಗೆಯೇ ವಿಶ್ವಾಸಾರ್ಹ, ರಾಷ್ಟ್ರವ್ಯಾಪಿ ಚಾರ್ಜಿಂಗ್ ಮತ್ತು ಮಾರಾಟದ ನಂತರದ ಸೇವಾ ಜಾಲವನ್ನು ರಚಿಸಲು ಕಂಪನಿಯು ರೋಡ್‌ಗ್ರಿಡ್, ಮೈ'ಟಿವಿಎಸ್ ಮತ್ತು ಗ್ಲೋಬಲ್ ಅಶ್ಯೂರ್ ಜೊತೆ ಪಾಲುದಾರಿಕೆಯನ್ನು ಘೋಷಿಸಿದೆ.

ದೆಹಲಿ, ಗುರುಗ್ರಾಮ್, ನೋಯ್ಡಾ, ಚೆನ್ನೈ, ಬೆಂಗಳೂರು, ಹೈದರಾಬಾದ್, ಪುಣೆ, ಜೈಪುರ, ಅಹಮದಾಬಾದ್, ಕೋಲ್ಕತ್ತಾ, ಕೊಚ್ಚಿನ್, ಭುವನೇಶ್ವರ, ತಿರುವನಂತಪುರ, ಚಂಡೀಗಢ, ಲಕ್ನೋ, ಕೊಯಮತ್ತೂರು, ಸೂರತ್, ಕ್ಯಾಲಿಕಟ್, ವಿಶಾಖಪಟ್ಟಣಂ, ವಿಜಯವಾಡ, ಶಿಮ್ಲಾ, ಆಗ್ರಾ, ಝಾನ್ಸಿ, ಗ್ವಾಲಿಯರ್, ವಾಪಿ, ಬರೋಡಾ ಮತ್ತು ಗೋವಾ ಸೇರಿದಂತೆ ಪ್ರಮುಖ ನಗರ ಮತ್ತು ಉದಯೋನ್ಮುಖ ಇವಿ ಮಾರುಕಟ್ಟೆಗಳಲ್ಲಿ ಆರಂಭಿಕ ಡೀಲರ್‌ಶಿಪ್‌ಗಳನ್ನು ಸ್ಥಾಪಿಸಲಾಗುವುದು ಎಂದು ಹೇಳಿದೆ.

ಇವಿಷ್ಟೆ ಅಲ್ಲದೆ ವಿನ್‌ಫಾಸ್ಟ್ ಬ್ಯಾಟರಿ ಮರುಬಳಕೆ, ಅಪರೂಪದ ಲೋಹದ ಚೇತರಿಕೆ ಮತ್ತು ಜೀವಿತಾವಧಿಯ ಬ್ಯಾಟರಿ ಮರುಬಳಕೆಯಲ್ಲಿ ಪರಿಣತಿ ಹೊಂದಿರುವ ಪ್ರಮುಖ ಭಾರತೀಯ ಕ್ಲೀನ್-ಟೆಕ್ ಕಂಪನಿಯಾದ ಬ್ಯಾಟ್‌ಎಕ್ಸ್ ಎನರ್ಜೀಸ್‌ನೊಂದಿಗೂ ಪಾಲುದಾರಿಕೆ ಹೊಂದಿದೆ. ಈ ಸಹಯೋಗವು ಭಾರತದಲ್ಲಿ ಸಮಗ್ರ, ವೃತ್ತಾಕಾರದ ಬ್ಯಾಟರಿ ಮೌಲ್ಯ ಸರಪಳಿಯನ್ನು ನಿರ್ಮಿಸುವತ್ತ ಮಹತ್ವದ ಹೆಜ್ಜೆಯಾಗಿದೆ ಎಂದು ಕಂಪನಿ ಹೇಳಿಕೊಂಡಿದೆ.