ಭಾರತಕ್ಕೆ ಎಂಟ್ರಿ ಕೊಡಲಿದೆ ಬಿ ವೈ ಡಿ ಡೆನ್ಜಾ: Z9 GT ಮತ್ತು D9 ಕಾರಿನ ಬೆಲೆ, ಫೀಚರ್ಸ್ ನೋಡಿ ಫಿದಾ ಆಗೋದು ಗ್ಯಾರಂಟಿ!

ಬಿ ವೈ ಡಿ (BYD) ಸಂಸ್ಥೆಯ ಪ್ರೀಮಿಯಂ ಮತ್ತು ಐಷಾರಾಮಿ ಆಟೋಮೊಬೈಲ್ ಬ್ರ್ಯಾಂಡ್ 'ಡೆನ್ಜಾ' (Denza) ನವೆಂಬರ್ 13 ರಂದು ಅಧಿಕೃತವಾಗಿ ಭಾರತದ ಮಾರುಕಟ್ಟೆಗೆ ಲಗ್ಗೆ ಇಡುತ್ತಿದೆ. ಮುಂಬೈನಲ್ಲಿ ನಡೆಯಲಿರುವ ಅದ್ಧೂರಿ ಕಾರ್ಯಕ್ರಮದಲ್ಲಿ ಈ ಕಾರುಗಳು ಅನಾವರಣಗೊಳ್ಳಲಿವೆ. ಇದರಲ್ಲಿ ಮುಖ್ಯವಾಗಿ 'D9' ಲಕ್ಸುರಿ ಎಂಪಿವಿ (MPV) ಮತ್ತು 'Z9 GT' ಶೂಟಿಂಗ್ ಬ್ರೇಕ್ ಕಾರುಗಳು ಮುಖ್ಯ ಆಕರ್ಷಣೆಯಾಗಲಿವೆ. ಆಟೋಕಾರ್‌ ವರದಿ ಪ್ರಕಾರ, ಈ ಕಾರುಗಳನ್ನು ಸಿಬಿಯು (CBU - ಕಂಪಲೀಟ್ಲಿ ಬಿಲ್ಟ್ ಯೂನಿಟ್) ರೂಪದಲ್ಲಿ ಭಾರತಕ್ಕೆ ಆಮದು ಮಾಡಿಕೊಳ್ಳಲಾಗುತ್ತಿದ್ದು, ಡೆನ್ಜಾಗೆಂದೇ ಪ್ರತ್ಯೇಕವಾಗಿ ತೆರೆಯಲಾಗುವ ಶೋರೂಮ್‌ಗಳ ಮೂಲಕ ಮಾರಾಟ ಮಾಡಲಾಗುತ್ತದೆ.

ನವೆಂಬರ್ 13 ರಂದು ನಡೆಯುವ ಕಾರ್ಯಕ್ರಮದಲ್ಲಿ ಬಿ ವೈ ಡಿ ತನ್ನ ಮುಂದಿನ ವಾಹನಗಳ ಸಾಲು ಮತ್ತು ಭಾರತದಲ್ಲಿನ ಮಾರಾಟ ಯೋಜನೆಯನ್ನು ಸ್ಪಷ್ಟಪಡಿಸಲಿದೆ. ವಿಶೇಷವೆಂದರೆ, Z9 GT ಕಾರಿನ ಪ್ರದರ್ಶನ ಮಾಡೆಲ್‌ಗಳು ಈಗಾಗಲೇ ಭಾರತದ ಆಯ್ದ ಡೀಲರ್‌ಶಿಪ್‌ಗಳನ್ನು ತಲುಪಿವೆ. ಅಷ್ಟೇ ಅಲ್ಲ, ಇದೇ ವಾರ ಈ ಕಾರು ಭಾರತದ ರಸ್ತೆಗಳಲ್ಲಿ ಟೆಸ್ಟ್ ರನ್ ನಡೆಸುವಾಗಲೂ ಕಾಣಿಸಿಕೊಂಡಿದೆ. ಆರಂಭದಲ್ಲಿ ದೇಶದ ಪ್ರಮುಖ ಮೆಟ್ರೋ ನಗರಗಳಲ್ಲಿ 'ಡೆನ್ಜಾ ಸ್ಟುಡಿಯೋ'ಗಳು ಆರಂಭವಾಗಲಿದ್ದು, ಶೀಘ್ರದಲ್ಲೇ ಬುಕಿಂಗ್ ಪ್ರಕ್ರಿಯೆಗೆ ಚಾಲನೆ ಸಿಗಲಿದೆ. ಕಾರಿನ ಅನಾವರಣದ ಬೆನ್ನಲ್ಲೇ ಟೆಸ್ಟ್ ಡ್ರೈವ್‌ಗಳೂ ಲಭ್ಯವಾಗಲಿವೆ.

ಭಾರತಕ್ಕೆ ಎಂಟ್ರಿ ಕೊಡಲಿದೆ ಡೆನ್ಜಾ Z9 GT!

ಅತ್ಯಂತ ಪವರ್‌ಫುಲ್ ಆದ 'Z9 GT' ಕಾರಿನಲ್ಲಿ 122.5 kWh ಸಾಮರ್ಥ್ಯದ ಬ್ಯಾಟರಿ ಹಾಗೂ ಮೂರು ಎಲೆಕ್ಟ್ರಿಕ್ ಮೋಟಾರ್‌ಗಳಿದ್ದು, ಬರೋಬ್ಬರಿ 1,156 hp ಪವರ್ ಹೊರಹಾಕುತ್ತವೆ. ಕೇವಲ 2.7 ಸೆಕೆಂಡುಗಳಲ್ಲಿ 0 ಯಿಂದ 100 ಕಿ.ಮೀ ವೇಗ ಪಡೆದುಕೊಳ್ಳುವ ಈ ಕಾರು, ಒಮ್ಮೆ ಚಾರ್ಜ್ ಮಾಡಿದರೆ ಸುಮಾರು 600 ಕಿ.ಮೀ (WLTP) ಮೈಲೇಜ್ ನೀಡುತ್ತದೆ. ಕಾರಿನ ಒಳಗಡೆ ಒಟ್ಟು 5 ಸ್ಕ್ರೀನ್‌ಗಳು, ರಿಯರ್-ವೀಲ್ ಸ್ಟೀರಿಂಗ್ ಹಾಗೂ ಲೆವೆಲ್ 2+ ಡ್ರೈವರ್ ಅಸಿಸ್ಟೆನ್ಸ್‌ನಂತಹ ಹೈಟೆಕ್ ಫೀಚರ್‌ಗಳಿವೆ. ಸಿಬಿಯು ಮಾದರಿಯಲ್ಲಿ ಬರಲಿರುವ ಈ ಸ್ಪೋರ್ಟಿ ಕಾರಿನ ಅಂದಾಜು ಬೆಲೆ ₹1.2 ಕೋಟಿಯಿಂದ ₹1.5 ಕೋಟಿ ಇರಬಹುದು ಎಂದು ಅಂದಾಜಿಸಲಾಗಿದೆ.

ಭಾರತೀಯ ಮಾರುಕಟ್ಟೆಗೆ ಡೆನ್ಜಾ D9 ಲಕ್ಸುರಿ ಎಂಪಿವಿ

ಡೆನ್ಜಾ D9 ಕಾರು ಪ್ರಮುಖವಾಗಿ ಟೊಯೋಟಾ ವೆಲ್‌ಫೈರ್ ಗ್ರಾಹಕರನ್ನು ಗುರಿಯಾಗಿಸಿಕೊಂಡು ಮಾರುಕಟ್ಟೆಗೆ ಬರುತ್ತಿದೆ. ಶಬ್ದರಹಿತ ಹಾಗೂ ಅತ್ಯಾಧುನಿಕ ತಂತ್ರಜ್ಞಾನ ಹೊಂದಿರುವ ಈ 7 ಸೀಟರ್ ಕಾರಿನಲ್ಲಿ 'ಝೀರೋ-ಗ್ರಾವಿಟಿ ಕ್ಯಾಪ್ಟನ್ ಚೇರ್‌ಗಳು', ಡಿವಿಯಾಲೆ (Devialet) ಆಡಿಯೋ ಸಿಸ್ಟಮ್ ಹಾಗೂ ಸುಧಾರಿತ ಸೇಫ್ಟಿ ಫೀಚರ್‌ಗಳಿವೆ. ಜಾಗತಿಕವಾಗಿ ಇದು ಫುಲ್-ಎಲೆಕ್ಟ್ರಿಕ್ ಮತ್ತು ಸೂಪರ್ ಹೈಬ್ರಿಡ್ (DM-i) ಆಯ್ಕೆಗಳಲ್ಲಿ ಲಭ್ಯವಿದ್ದರೂ, ಭಾರತಕ್ಕೆ ಯಾವ ಎಂಜಿನ್ ಬರಲಿದೆ ಎಂಬುದು ಇನ್ನಷ್ಟೇ ಸ್ಪಷ್ಟವಾಗಬೇಕಿದೆ. ಇದರ ಬೆಲೆ ₹80 ಲಕ್ಷಕ್ಕಿಂತ ಹೆಚ್ಚಿರಲಿದ್ದು, MG M9 (₹79.9 ಲಕ್ಷ) ಗಿಂತ ಜಾಸ್ತಿ ಹಾಗೂ ವೆಲ್‌ಫೈರ್ (₹1.20-1.30 ಕೋಟಿ) ಗಿಂತ ಕೊಂಚ ಕಡಿಮೆಯಿರಲಿದೆ.

ಬೆಲೆ ಅಂದಾಜು, ಚಾರ್ಜಿಂಗ್ ಮತ್ತು ಸರ್ವಿಸ್ ಲಭ್ಯತೆ

ಮಾಡಲ್	ಪವರ್‌ಟ್ರೇನ್	ಅಂದಾಜು ಎಕ್ಸ್-ಷೋರೂಂ ಬೆಲೆ
ಡೆನ್ಜಾ D9 (ನಿರೀಕ್ಷಿತ)	ಇವಿ ಅಥವಾ ಸೂಪರ್ ಹೈಬ್ರಿಡ್ (DM‑i)	~₹80–90 ಲಕ್ಷ
ಎಂಜಿ M9	ಎಲೆಕ್ಟ್ರಿಕ್	₹79.9 ಲಕ್ಷದಿಂದ ಆರಂಭ
ಟೊಯೋಟಾ ವೆಲ್‌ಫೈರ್	ಹೈಬ್ರಿಡ್	₹1.20–1.30 ಕೋಟಿ
ಲೆಕ್ಸಸ್ LM	ಹೈಬ್ರಿಡ್	₹2.20–2.75 ಕೋಟಿ

ಬಿ ವೈ ಡಿ ಸಂಸ್ಥೆಯ 'ಫ್ಲ್ಯಾಶ್ ಚಾರ್ಜಿಂಗ್' ತಂತ್ರಜ್ಞಾನವು 1,500 kW ಚಾರ್ಜರ್ ಬಳಸಿದರೆ ಕೇವಲ 9 ನಿಮಿಷಗಳಲ್ಲಿ ಶೇ. 10 ರಿಂದ 97 ರಷ್ಟು ಚಾರ್ಜ್ ಮಾಡುವ ಸಾಮರ್ಥ್ಯ ಹೊಂದಿದೆ. ಆದರೆ ಪ್ರಸ್ತುತ ಭಾರತದಲ್ಲಿರುವ ಅತಿ ವೇಗದ ಸಾರ್ವಜನಿಕ ಚಾರ್ಜಿಂಗ್ ಪಾಯಿಂಟ್‌ಗಳು ಗರಿಷ್ಠ 360 kW ಸ್ಪೀಡ್ ನೀಡುತ್ತವೆ. ಈ ಕಾರುಗಳು ಸಾರ್ವತ್ರಿಕ CCS2 ಚಾರ್ಜಿಂಗ್‌ಗೆ ಬೆಂಬಲ ನೀಡುವುದರಿಂದ, ಚಾರ್ಜಿಂಗ್ ಸಮಯವು ಭಾರತೀಯ ಚಾರ್ಜರ್‌ಗಳ ಸಾಮರ್ಥ್ಯದ ಮೇಲೆ ನಿರ್ಧಾರವಾಗಲಿದೆ. ಬಿ ವೈ ಡಿ ಈಗಾಗಲೇ ದೇಶಾದ್ಯಂತ 40ಕ್ಕೂ ಹೆಚ್ಚು ಸೇವಾ ಕೇಂದ್ರಗಳನ್ನು ಹೊಂದಿದ್ದು, ಡೆನ್ಜಾಗೆಂದೇ ಪ್ರತ್ಯೇಕ ಸ್ಟುಡಿಯೋಗಳನ್ನು ಪ್ರಾರಂಭಿಸಲಿದೆ. ಶುಕ್ರವಾರ ನಡೆಯಲಿರುವ ಅಧಿಕೃತ ಅನಾವರಣದ ವೇಳೆ ಬುಕಿಂಗ್, ಶೋರೂಮ್ ಪ್ರದರ್ಶನ ಮತ್ತು ಟೆಸ್ಟ್ ಡ್ರೈವ್ ಕುರಿತು ಹೆಚ್ಚಿನ ಮಾಹಿತಿ ಸಿಗಲಿದೆ.