ಆಫ್‌ರೋಡ್‌ಗೆ ಯಾವುದು ಬೆಸ್ಟ್? ಮಹೀಂದ್ರಾ ಥಾರ್ ರಾಕ್ಸ್ vs ಫೋರ್ಸ್ ಗುರ್ಖಾ: ಬೆಲೆ ಮತ್ತು ಫೀಚರ್ಸ್ ಹೋಲಿಕೆ

ಮಹೀಂದ್ರಾ ಸೆಪ್ಟೆಂಬರ್ 22 ರಂದು ಮಹತ್ವದ ಅಪ್‌ಡೇಟ್ ನೀಡಲು ಸಜ್ಜಾಗುತ್ತಿದ್ದರೆ, ಇತ್ತ ಕಾರು ಪ್ರಿಯರು 'ಥಾರ್ ರಾಕ್ಸ್' ಮತ್ತು 'ಫೋರ್ಸ್ ಗುರ್ಖಾ' ನಡುವೆ ಯಾವುದು ಬೆಸ್ಟ್ ಎಂದು ಲೆಕ್ಕಾಚಾರ ಹಾಕುತ್ತಿದ್ದಾರೆ. ಪ್ರಸ್ತುತ ಎಕ್ಸ್‌ಶೋರೂಂನಲ್ಲಿ ಥಾರ್ ರಾಕ್ಸ್ ಬೆಲೆ ₹12.52 ಲಕ್ಷದಿಂದ ₹23.52 ಲಕ್ಷದಷ್ಟಿದೆ. ಇನ್ನು ಫೋರ್ಸ್ ಗುರ್ಖಾದ 3-ಡೋರ್ ಆವೃತ್ತಿಗೆ ₹16.75 ಲಕ್ಷ ಹಾಗೂ 5-ಡೋರ್ ಆವೃತ್ತಿಗೆ ₹18 ಲಕ್ಷ ಆರಂಭಿಕ ಬೆಲೆಯಿದೆ. ಈ ಎರಡೂ ಆಫ್‌ರೋಡರ್‌ಗಳ ಸಾಮರ್ಥ್ಯ, ದಿನನಿತ್ಯದ ಬಳಕೆ ಮತ್ತು ಒಟ್ಟು ಮೌಲ್ಯದ ಕುರಿತು ನಿಮಗಾಗಿ ವಿವರವಾದ ಹೋಲಿಕೆ ಇಲ್ಲಿದೆ. ನಿಮ್ಮ ನಿರ್ಧಾರ ಸುಲಭವಾಗಿಸಲು ಪ್ರಮುಖ ನಗರಗಳ ಬೆಲೆಗಳನ್ನೂ ಇಲ್ಲಿ ನೀಡಲಾಗಿದೆ.

ಅಪ್ಪಟ ಆಫ್‌ರೋಡ್ ಪ್ರಿಯರಿಗೆ ಫೋರ್ಸ್ ಗುರ್ಖಾ ಸದಾ ನೆಚ್ಚಿನ ಆಯ್ಕೆ. ಕಂಪನಿಯಿಂದಲೇ ಸಿಗುವ ಸ್ನಾರ್ಕೆಲ್ ಮತ್ತು 700 ಎಂಎಂ ನೀರು ದಾಟುವ ಸಾಮರ್ಥ್ಯ (ವ್ಯಾಡಿಂಗ್‌) ಇದರಲ್ಲಿದೆ. ಕಠಿಣ ಹಾದಿಗಳಲ್ಲಿ ಸಾಗಲು ನೆರವಾಗುವ ಫ್ರಂಟ್ ಮತ್ತು ರೇರ್ ಡಿಫರೆನ್ಷಿಯಲ್ ಲಾಕ್‌ಗಳು ಇದರಲ್ಲಿ ಸ್ಟ್ಯಾಂಡರ್ಡ್ ಆಗಿ ಸಿಗುತ್ತವೆ. ಇದರ ಅಪ್ರೋಚ್, ಡಿಪಾರ್ಚರ್ ಮತ್ತು ಬ್ರೇಕ್‌ಓವರ್ ಆಂಗಲ್‌ಗಳು ಅನುಕ್ರಮವಾಗಿ 39°, 37° ಮತ್ತು 28° ಇವೆ. ಇತ್ತ ಥಾರ್ ರಾಕ್ಸ್ ಕೂಡ ಕಡಿಮೆ ಇಲ್ಲ; ಲೋ-ರೇಂಜ್, ರೇರ್ ಎಲೆಕ್ಟ್ರಾನಿಕ್ ಲಾಕಿಂಗ್ ಡಿಫರೆನ್ಷಿಯಲ್ ಹಾಗೂ 650 ಎಂಎಂ ನೀರು ದಾಟುವ ಸಾಮರ್ಥ್ಯ ಇದರಲ್ಲಿದೆ. ಇದರ ಸೂಕ್ತ ವೇರಿಯೆಂಟ್‌ಗಳಲ್ಲಿ 41.7° ಅಪ್ರೋಚ್ ಮತ್ತು 36.1° ಡಿಪಾರ್ಚರ್ ಆಂಗಲ್ ಸಿಗುತ್ತದೆ.

ಮಹೀಂದ್ರಾ ಥಾರ್ ರಾಕ್ಸ್ ವರ್ಸಸ್ ಫೋರ್ಸ್ ಗುರ್ಖಾ: ಬೆಲೆ, ಎಂಜಿನ್ ಮತ್ತು ಸಿಟಿ ಕಂಫರ್ಟ್

ಥಾರ್ ರಾಕ್ಸ್ ಟರ್ಬೊ-ಪೆಟ್ರೋಲ್ ಮತ್ತು ಡೀಸೆಲ್ ಎಂಜಿನ್ ಆಯ್ಕೆಗಳಲ್ಲಿ ಲಭ್ಯವಿದ್ದು, 6-ಸ್ಪೀಡ್ ಮ್ಯಾನುವಲ್ ಅಥವಾ ಐಸಿನ್ ಆಟೋಮ್ಯಾಟಿಕ್ ಗೇರ್‌ಬಾಕ್ಸ್ ಹೊಂದಿದೆ. ನಗರದಲ್ಲಿ ನಿತ್ಯ ಚಾಲನೆ ಮಾಡುವವರಿಗೆ ಮತ್ತು ಹೊಸದಾಗಿ ಆಫ್‌ರೋಡಿಂಗ್ ಕಲಿಯುವವರಿಗೆ ಇದು ಅತ್ಯಂತ ಕಂಫರ್ಟ್ ನೀಡುತ್ತದೆ. ಆದರೆ, ಫೋರ್ಸ್ ಗುರ್ಖಾ 138 bhp ಪವರ್ ಹಾಗೂ 320 Nm ಟಾರ್ಕ್ ನೀಡುವ 2.6-ಲೀಟರ್ ಡೀಸೆಲ್ ಎಂಜಿನ್ ಹೊಂದಿದ್ದು, 5-ಸ್ಪೀಡ್ ಮ್ಯಾನುವಲ್ ಗೇರ್‌ಬಾಕ್ಸ್ ಜೊತೆ ಬರುತ್ತದೆ. ಭೀಕರ ಹಾದಿಗಳನ್ನು ಸೀಳಿಕೊಂಡು ಹೋಗಲು ಎರಡೂ ಕಾರುಗಳಲ್ಲಿ ಲೋ-ರೇಂಜ್ ಹೊಂದಿರುವ ಪಾರ್ಟ್-ಟೈಮ್ ಫೋರ್-ವೀಲ್ ಡ್ರೈವ್ ಸಿಸ್ಟಮ್ ಇದೆ. ಸುಲಭವಾಗಿ ಅರ್ಥಮಾಡಿಕೊಳ್ಳಲು ಪ್ರಮುಖ ವಿವರಗಳನ್ನು ಕೆಳಗಿನ ಕೋಷ್ಟಕದಲ್ಲಿ ನೀಡಲಾಗಿದೆ.

ವೈಶಿಷ್ಟ್ಯಗಳು	ಮಹೀಂದ್ರಾ ಥಾರ್ ರಾಕ್ಸ್	ಫೋರ್ಸ್ ಗುರ್ಖಾ
ಎಕ್ಸ್‌ಶೋರೂಂ ಬೆಲೆ	₹12.52–23.52 ಲಕ್ಷ	₹16.75 ಲಕ್ಷ (3-ಡೋರ್); ₹18 ಲಕ್ಷ (5-ಡೋರ್)
ಎಂಜಿನ್, ಗೇರ್‌ಬಾಕ್ಸ್	2.0 ಟರ್ಬೊ-ಪೆಟ್ರೋಲ್, 2.2 ಡೀಸೆಲ್; 6MT/6AT	2.6 ಡೀಸೆಲ್; 5MT
4x4 ಫೀಚರ್ಸ್‌	ಪಾರ್ಟ್-ಟೈಮ್ 4x4, ಲೋ-ರೇಂಜ್, ರೇರ್ ಎಲೆಕ್ಟ್ರಾನಿಕ್ ಲಾಕಿಂಗ್ ಡಿಫರೆನ್ಷಿಯಲ್ (ELD)	ಪಾರ್ಟ್-ಟೈಮ್ 4x4, ಲೋ-ರೇಂಜ್, ಫ್ರಂಟ್ ಮತ್ತು ರೇರ್ ಡಿಫರೆನ್ಷಿಯಲ್ ಲಾಕ್ಸ್
ಆಂಗಲ್‌ಗಳು	ಅಪ್ರೋಚ್ 41.7°, ಡಿಪಾರ್ಚರ್ 36.1°	ಅಪ್ರೋಚ್ 39°, ಡಿಪಾರ್ಚರ್ 37°, ಬ್ರೇಕ್‌ಓವರ್ 28°
ವಾಟರ್ ವ್ಯಾಡಿಂಗ್ (ನೀರು ದಾಟುವ ಸಾಮರ್ಥ್ಯ)	650 ಎಂಎಂ	700 ಎಂಎಂ, ಫ್ಯಾಕ್ಟರಿ ಸ್ನಾರ್ಕೆಲ್

ಮಹೀಂದ್ರಾ ಥಾರ್ ರಾಕ್ಸ್ ವರ್ಸಸ್ ಫೋರ್ಸ್ ಗುರ್ಖಾ: ಫೀಚರ್ಸ್‌, ಸೇಫ್ಟಿ ಮತ್ತು ಫ್ಯಾಮಿಲಿ ಬಳಕೆ

ಕುಟುಂಬದ ಬಳಕೆಗೆ ಬಂದಾಗ ಸುರಕ್ಷತೆ ಮತ್ತು ಕಂಫರ್ಟ್ ವಿಷಯದಲ್ಲಿ ಇವೆರಡರ ನಡುವೆ ದೊಡ್ಡ ವ್ಯತ್ಯಾಸವಿದೆ. ಥಾರ್ ರಾಕ್ಸ್‌ನಲ್ಲಿ 6 ಏರ್‌ಬ್ಯಾಗ್‌ಗಳು, ISOFIX ಚೈಲ್ಡ್ ಸೀಟ್ ಆಂಕರ್‌ಗಳು, ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಕಂಟ್ರೋಲ್ (ESC) ಮತ್ತು ಕನೆಕ್ಟೆಡ್ ಟೆಲಿಮ್ಯಾಟಿಕ್ಸ್ ನೀಡಲಾಗಿದೆ. ಇದರ ಹೈ-ಎಂಡ್ ವೇರಿಯೆಂಟ್‌ಗಳಲ್ಲಿ ಹೈವೇ ಚಾಲನೆಯನ್ನು ಸುಲಭಗೊಳಿಸುವ ಲೆವೆಲ್ 2 ADAS (ಚಾಲಕ ಸಹಾಯ ವ್ಯವಸ್ಥೆ) ಇದೆ. ಭರತ್ ಎನ್‌ಸಿಎಪಿ (Bharat NCAP) ಸುರಕ್ಷತಾ ಪರೀಕ್ಷೆಯಲ್ಲೂ ಇದು ಅತ್ಯುತ್ತಮ ರಕ್ಷಣೆ ನೀಡುವುದಾಗಿ ಸಾಬೀತಾಗಿದೆ. ಇನ್ನು ಗುರ್ಖಾದಲ್ಲಿ ಡ್ಯುಯಲ್ ಏರ್‌ಬ್ಯಾಗ್, ಎಬಿಎಸ್ (ABS), ISOFIX ಆಂಕರ್‌ಗಳು ಮತ್ತು ಪಾರ್ಕಿಂಗ್ ಸೆನ್ಸರ್‌ಗಳಂತಹ ಅಗತ್ಯ ಸುರಕ್ಷತಾ ಫೀಚರ್‌ಗಳಿವೆ.

ನಿಮಗೆ ಪೆಟ್ರೋಲ್ ಎಂಜಿನ್, ಆಟೋಮ್ಯಾಟಿಕ್ ಗೇರ್‌ಬಾಕ್ಸ್ ಮತ್ತು ದಿನನಿತ್ಯದ ಆರಾಮದಾಯಕ ಪ್ರಯಾಣ ಬೇಕಿದ್ದರೆ 'ಥಾರ್ ರಾಕ್ಸ್' ಸೂಕ್ತ. ಅದೇ ರೀತಿ ವಾರಾಂತ್ಯಗಳಲ್ಲಿ ಕಠಿಣ ಆಫ್‌ರೋಡಿಂಗ್, ಎಕ್ಸ್‌ಟ್ರೀಮ್ ಆಕ್ಸಲ್-ಲಾಕ್ ಟ್ರಾಕ್ಷನ್, ಸ್ನಾರ್ಕೆಲ್ ಮತ್ತು ಸ್ಲೋ-ಸ್ಪೀಡ್ ಕ್ರಾಲರ್ ಅನುಭವ ಬೇಕಿದ್ದರೆ 'ಫೋರ್ಸ್ ಗುರ್ಖಾ' ಆಯ್ಕೆ ಮಾಡಿ. ಸದ್ಯ ಪ್ರಮುಖ ನಗರಗಳಲ್ಲಿ ಆನ್-ರೋಡ್ ಬೆಲೆಯನ್ನು ಗಮನಿಸುವುದಾದರೆ, ದೆಹಲಿಯಲ್ಲಿ ಸುಮಾರು ₹14.4 ಲಕ್ಷ ಮತ್ತು ಮುಂಬೈನಲ್ಲಿ ₹15.6 ಲಕ್ಷದಿಂದ ಆರಂಭವಾಗುತ್ತದೆ. ಬೆಂಗಳೂರಿನಲ್ಲಿ ಬೇಸ್ ಪೆಟ್ರೋಲ್ ವೇರಿಯೆಂಟ್ ಬೆಲೆ ಸುಮಾರು ₹16.6 ಲಕ್ಷದಿಂದ ಆರಂಭವಾಗುತ್ತದೆ. ಆದ್ದರಿಂದ, ಕಾರು ಬುಕ್ ಮಾಡುವ ಮುನ್ನ ಸೆಪ್ಟೆಂಬರ್ 22 ರಂದು ಶೋರೂಮ್‌ಗಳಲ್ಲಿ ಬೆಲೆ ಪಟ್ಟಿ ಮತ್ತು ಡೆಲಿವರಿ ಸಮಯವನ್ನು ಒಮ್ಮೆ ಪರಿಶೀಲಿಸಿಕೊಳ್ಳಿ.