ಮಾರುತಿ ಸ್ವಿಫ್ಟ್ CNG AMT vs ಹ್ಯುಂಡೈ ನಿಯೋಸ್: ಮೈಲೇಜ್, ಬೆಲೆ ಮತ್ತು ಫೀಚರ್ಸ್‌ನಲ್ಲಿ ಗೆಲ್ಲೋದು ಯಾರು?

ಮಾನ್ಯುಯಲ್ ಜೊತೆಗೆ ಈಗ ಆಟೋಮ್ಯಾಟಿಕ್ (AMT) ಗೇರ್‌ಬಾಕ್ಸ್‌ನಲ್ಲೂ ಮಾರುತಿ ಸ್ವಿಫ್ಟ್ ಸಿಎನ್‌ಜಿ (Maruti Swift CNG) ಬಂದಿರುವುದು, ಹ್ಯುಂಡೈನ ಜನಪ್ರಿಯ ಹ್ಯಾಚ್‌ಬ್ಯಾಕ್ 'ಗ್ಯಾಂಡ್ i10 ನಿಯೋಸ್' (Hyundai Grand i10 Nios) ಕಾರಿಗೆ ಸಖತ್ ಪೈಪೋಟಿ ನೀಡುತ್ತಿದೆ. ಬುಕಿಂಗ್ ಮಾಡುವ ಮುನ್ನ ಬೆಲೆ, ಮೈಲೇಜ್, ರನ್ನಿಂಗ್ ಕಾಸ್ಟ್, ಫೀಚರ್‌ಗಳು ಮತ್ತು ಡೆಲಿವರಿ ಸಮಯದ ಬಗ್ಗೆ ಕಾರು ಪ್ರಿಯರಲ್ಲಿ ಸಾಕಷ್ಟು ಕುತೂಹಲವಿದೆ. ಹಾಗಾದರೆ, ಭಾರತೀಯ ರಸ್ತೆಗಳಿಗೆ, ಕುಟುಂಬಗಳಿಗೆ ಮತ್ತು ಜೇಬಿಗೆ ಯಾವುದು ಹೆಚ್ಚು ಸೂಕ್ತ? ಇಲ್ಲಿದೆ ಕಂಪ್ಲೀಟ್ ರಿಪೋರ್ಟ್.

ಸ್ವಿಫ್ಟ್ ಸಿಎನ್‌ಜಿ-ಎಎಮ್‌ಟಿ (Swift CNG-AMT) ಕಾರು VXi, VXi (O) ಮತ್ತು ZXi ಎಂಬ ಮೂರು ವೇರಿಯಂಟ್‌ಗಳಲ್ಲಿ ಲಭ್ಯವಿದೆ. ಇದರ ಎಕ್ಸ್‌-ಷೋರೂಮ್ ಬೆಲೆ ₹7.92 ಲಕ್ಷದಿಂದ ₹8.86 ಲಕ್ಷದಷ್ಟಿದ್ದು, ಕೆಜಿಗೆ 35.34 ಕಿ.ಮೀ ಮೈಲೇಜ್ ನೀಡುತ್ತದೆ ಎಂದು ಕಂಪನಿ ಹೇಳಿದೆ. ಇತ್ತ ಹ್ಯುಂಡೈ ನಿಯೋಸ್ ಸಿಎನ್‌ಜಿ ಕೇವಲ ಮಾನ್ಯುಯಲ್ ಗೇರ್‌ಬಾಕ್ಸ್‌ನೊಂದಿಗೆ ಮಾತ್ರ ಸಿಗುತ್ತದೆ, ಆದರೆ ಇದರಲ್ಲಿ ಸ್ಟ್ಯಾಂಡರ್ಡ್ ಆಗಿ 6 ಏರ್‌ಬ್ಯಾಗ್‌ಗಳನ್ನು ನೀಡಲಾಗಿದೆ. ಸ್ವಿಫ್ಟ್‌ನಲ್ಲೂ 6 ಏರ್‌ಬ್ಯಾಗ್‌ಗಳು, ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಪ್ರೋಗ್ರಾಂ (ESP) ಮತ್ತು ಹಿಲ್-ಹೋಲ್ಡ್ ಅಸಿಸ್ಟ್ ಫೀಚರ್‌ಗಳಿವೆ. ಡಿಕ್ಕಿಯ ವಿಚಾರಕ್ಕೆ ಬಂದರೆ, ಸ್ವಿಫ್ಟ್‌ನಲ್ಲಿ ಸಿಂಗಲ್ ಸಿಲಿಂಡರ್ ಇರುವುದರಿಂದ ಲಗೇಜ್‌ಗೆ ಜಾಗವೇ ಸಿಗುವುದಿಲ್ಲ. ಆದರೆ, ಹ್ಯುಂಡೈನ ಡ್ಯುಯಲ್-ಸಿಲಿಂಡರ್ ಟೆಕ್ನಾಲಜಿಯಿಂದಾಗಿ ನಿಯೋಸ್‌ನಲ್ಲಿ ಲಗೇಜ್ ಇಡಲು ಉತ್ತಮ ಸ್ಪೇಸ್ ಸಿಗುತ್ತದೆ.

ಮಾರುತಿ ಸ್ವಿಫ್ಟ್ CNG AMT vs ಹ್ಯುಂಡೈ ಗ್ರಾಂಡ್ i10 ನಿಯೋಸ್: ಬೆಲೆ ಮತ್ತು ಪ್ರಮುಖ ನಗರಗಳ ವಿವರ

ನಗರ	ಸ್ವಿಫ್ಟ್ ಆನ್‌-ರೋಡ್ ಆರಂಭಿಕ ಬೆಲೆ	ನಿಯೋಸ್ ಆನ್‌-ರೋಡ್ ಆರಂಭಿಕ ಬೆಲೆ
ಬೆಂಗಳೂರು	₹6.93 ಲಕ್ಷ	₹6.64 ಲಕ್ಷ
ದೆಹಲಿ	₹6.34 ಲಕ್ಷ	₹6.08 ಲಕ್ಷ
ಮುಂಬೈ	₹6.75 ಲಕ್ಷ	₹6.47 ಲಕ್ಷ

ಮೇಲೆ ನೀಡಿರುವ ಬೆಲೆಗಳು ಸ್ಥಳೀಯ ತೆರಿಗೆಗಳನ್ನು ಒಳಗೊಂಡ ಮೂಲ (ಬೇಸ್) ಮಾಡೆಲ್‌ಗಳ ಆನ್-ರೋಡ್ ಬೆಲೆಗಳಾಗಿದ್ದು, ಸಿಎನ್‌ಜಿ ಮತ್ತು ಎಎಮ್‌ಟಿ ವೇರಿಯಂಟ್‌ಗಳ ಬೆಲೆ ಇನ್ನಷ್ಟು ಹೆಚ್ಚಿರಲಿದೆ. ಮಾಹಿತಿ ಪ್ರಕಾರ, ಸ್ವಿಫ್ಟ್ ಸಿಎನ್‌ಜಿ-ಎಎಮ್‌ಟಿಯ ಎಕ್ಸ್-ಷೋರೂಮ್ ಬೆಲೆ ₹7.92 ಲಕ್ಷದಿಂದ ₹8.86 ಲಕ್ಷದಷ್ಟಿದೆ. ಕಾರು ಖರೀದಿಸುವ ಮುನ್ನ ಅಕ್ಸೆಸರೀಸ್ ಅಥವಾ ಇನ್ಶೂರೆನ್ಸ್ ಆಫರ್‌ಗಳ ಬಗ್ಗೆ ಡೀಲರ್‌ಗಳೊಂದಿಗೆ ಚೌಕಾಶಿ ಮಾಡಲು ಈ ಬೆಲೆಗಳ ಅಂದಾಜು ನಿಮಗೆ ನೆರವಾಗಲಿದೆ.

ಮಾರುತಿ ಸ್ವಿಫ್ಟ್ CNG AMT vs ಹ್ಯುಂಡೈ ಗ್ರಾಂಡ್ i10 ನಿಯೋಸ್: ಮೈಲೇಜ್ ಮತ್ತು ರನ್ನಿಂಗ್ ಕಾಸ್ಟ್

ನಗರ	ಸ್ವಿಫ್ಟ್ CNG-AMT (₹/ಕಿ.ಮೀ)	ನಿಯೋಸ್ CNG MT (₹/ಕಿ.ಮೀ)	ಸ್ವಿಫ್ಟ್ ಪೆಟ್ರೋಲ್ AMT (₹/ಕಿ.ಮೀ)
ಬೆಂಗಳೂರು	2.75	3.61	4.31
ದೆಹಲಿ	2.46	3.23	3.97
ಮುಂಬೈ	2.49	3.27	4.32

ಈ ಲೆಕ್ಕಾಚಾರವನ್ನು ARAI ಪ್ರಮಾಣೀಕೃತ ಮೈಲೇಜ್ (ಸ್ವಿಫ್ಟ್ ಸಿಎನ್‌ಜಿ-ಎಎಮ್‌ಟಿ: 35.34 ಕಿ.ಮೀ/ಕೆಜಿ, ನಿಯೋಸ್ ಸಿಎನ್‌ಜಿ: 26.9 ಕಿ.ಮೀ/ಕೆಜಿ, ಸ್ವಿಫ್ಟ್ ಪೆಟ್ರೋಲ್ ಎಎಮ್‌ಟಿ: 25.75 ಕಿ.ಮೀ/ಲೀ) ಮತ್ತು ಪ್ರಸ್ತುತ ನಗರಗಳ ಇಂಧನ ಬೆಲೆಗಳ ಆಧಾರದ ಮೇಲೆ ಸಿದ್ಧಪಡಿಸಲಾಗಿದೆ. ಮೂರೂ ನಗರಗಳಲ್ಲಿ ನಿಯೋಸ್ ಸಿಎನ್‌ಜಿ ಮತ್ತು ಸ್ವಿಫ್ಟ್ ಪೆಟ್ರೋಲ್‌ಗೆ ಹೋಲಿಸಿದರೆ ಸ್ವಿಫ್ಟ್ ಆಟೋ-ಸಿಎನ್‌ಜಿಯ ಪ್ರತಿ ಕಿಲೋಮೀಟರ್ ರನ್ನಿಂಗ್ ವೆಚ್ಚ ಗಮನಾರ್ಹವಾಗಿ ಕಡಿಮೆಯಿದೆ. ಸಿಎನ್‌ಜಿ ಬೆಲೆ ಪೆಟ್ರೋಲ್ ಬೆಲೆಗೆ ಹತ್ತಿರದಲ್ಲಿರುವ ನಗರಗಳಲ್ಲಿ ಈ ಉಳಿತಾಯ ಇನ್ನಷ್ಟು ಹೆಚ್ಚಿರಲಿದೆ.

ನಗರ ಪ್ರದೇಶಗಳ ಟ್ರಾಫಿಕ್‌ನಲ್ಲಿ ಚಾಲನೆಗೆ ಸ್ವಿಫ್ಟ್ ಉತ್ತಮ ಆಯ್ಕೆಯಾಗಿದೆ. ಆಟೋಮ್ಯಾಟಿಕ್ ಗೇರ್ (AMT), ಕ್ರೀಪ್ ಫಂಕ್ಷನ್ ಮತ್ತು ಹಿಲ್-ಹೋಲ್ಡ್ ವೈಶಿಷ್ಟ್ಯಗಳು ಟ್ರಾಫಿಕ್ ಹಾಗೂ ಏರುರಸ್ತೆಗಳಲ್ಲಿ ಚಾಲನೆಯ ಶ್ರಮವನ್ನು ಕಡಿತಗೊಳಿಸುತ್ತವೆ. ಜತೆಗೆ 6 ಏರ್‌ಬ್ಯಾಗ್‌ಗಳು ಸುರಕ್ಷತೆಯ ಭರವಸೆ ನೀಡುತ್ತವೆ. ಇನ್ನು ಮಾನ್ಯುಯಲ್ ಡ್ರೈವಿಂಗ್ ಇಷ್ಟಪಡುವ ಮತ್ತು ಲಗೇಜ್ ಇಡಲು ಸೂಕ್ತ ಡಿಕ್ಕಿ ಸ್ಪೇಸ್ ಬಯಸುವವರಿಗೆ ಹ್ಯುಂಡೈ ನಿಯೋಸ್ ಸೂಕ್ತ. ಎರಡೂ ಕಂಪನಿಗಳ ಅಧಿಕೃತ ವೆಬ್‌ಸೈಟ್‌ಗಳಲ್ಲಿ ಟೆಸ್ಟ್ ಡ್ರೈವ್ ಬುಕಿಂಗ್ ಆರಂಭವಾಗಿದೆ. ಎನ್‌ಸಿಆರ್ (NCR) ವ್ಯಾಪ್ತಿಯ ಡೀಲರ್‌ಗಳ ಪ್ರಕಾರ ಸ್ವಿಫ್ಟ್ ಡೆಲಿವರಿಗೆ ವೇರಿಯಂಟ್‌ಗೆ ಅನುಗುಣವಾಗಿ 2 ರಿಂದ 6 ವಾರಗಳ ಕಾಯುವಿಕೆಯ ಅವಧಿ ಇದೆ. ಮೊದಲ ಬಾರಿಗೆ ಕಾರು ಕೊಳ್ಳುವವರು ಮತ್ತು ದೈನಂದಿನ ಪ್ರಯಾಣಿಕರು ಸ್ವಿಫ್ಟ್ ಸಿಎನ್‌ಜಿ-ಎಎಮ್‌ಟಿಯನ್ನು ಖಂಡಿತ ಪರಿಗಣಿಸಬಹುದು.