ಮೂಲೆ ಗುಂಪಾಗಿದ್ದ ಬ್ರಾಂಡ್‌ಗೆ ಜೀವ ತುಂಬಿದ ಭಾರತ: ಪುಟಿದೆದ್ದ ನಿಸ್ಸಾನ್... ಈ ಭೂಮಿಯನ್ನು ಮರೆಯಲ್ಲ!

ಭಾರತದಲ್ಲಿ ಕಾರು ಕಂಪನಿಗಳು ಧೀರ್ಘ ಕಾಲ ಉಳಿಯುವುದು ಸಾಮಾನ್ಯ ವಿಷಯವಲ್ಲ. ಜನರ ಆದ್ಯತೆಗಳಿಗೆ ತಕ್ಕಂತೆ ಕಾರನ್ನು ನಿರ್ಮಿಸಿ ಬೆಲೆಗೆ ತಕ್ಕ ಮೌಲ್ಯವನ್ನು ನೀಡುವುದಾದರೆ ಇಲ್ಲಿನ ಜನ ಆದರಿಸುತ್ತಾರೆ. ಇಲ್ಲವಾದರೆ ಕಂಪನಿ ಮೂಲೆ ಗುಂಪಾಗುತ್ತದೆ, ಈಗಾಗಲೇ ಪ್ರಮುಖ ಕಾರು ತಯಾರಕ ಫೋರ್ಡ್ ಭಾರತವನ್ನು ನಿರ್ಗಮಿಸಿರುವ ವಿಷಯ ಎಲ್ಲರಿಗೂ ತಿಳಿದಿದೆ. ಇದನ್ನು ಮನಗಂಡು ನಿಸ್ಸಾನ್ ಕೂಡ ಭಾರತೀಯ ಗ್ರಾಹಕರ ಆದ್ಯತೆಗಳನ್ನು ಅರಿತುಕೊಂಡು ಇದೀಗ ಪುಟಿದೆದ್ದಿದೆ. ಕಂಪನಿಯ ಪ್ರಮುಖ ಮಾಡಲ್‌ ಆಗಿರುವ ನಿಸ್ಸಾನ್ ಮ್ಯಾಗ್ನೈಟ್ ಭಾರತದಲ್ಲಿ ಹೆಚ್ಚಾಗಿ ಮಾರಾಟವಾಗುತ್ತಿದ್ದು, ಕಂಪನಿಗೆ ಭಾರತದಲ್ಲಿ ಭರವಸೆಯ ಬೆಳಕಾಗಿದೆ.

ನಿಸ್ಸಾನ್ ಮೋಟಾರ್ ಇಂಡಿಯಾ ಭಾರತದಲ್ಲಿ ಉತ್ಪಾದನಾ ಸ್ಥಾವರವನ್ನು ಹೊಂದಿದ್ದು, ಡಿಸೆಂಬರ್ 2025 ರಲ್ಲಿ 13,470 ಯುನಿಟ್‌ ಕಾರುಗಳನ್ನು ಇತರ ದೇಶಗಳಿಗೆ ರಫ್ತು ಮಾಡಿದೆ. ಇದು ಕಳೆದ 10 ವರ್ಷಗಳಲ್ಲಿ ಕಂಪನಿಯ ಅತ್ಯಧಿಕ ಮಾಸಿಕ ರಫ್ತಾಗಿದೆ. ದೇಶಿಯ ಮರಾಟವು 1,902 ಯುನಿಟ್‌ ಕಾರುಗಳಾಗಿದ್ದು, ಡಿಸೆಂಬರ್ 2025 ರ ಒಟ್ಟು ಮಾರಾಟ 15,372 ಯುನಿಟ್‌ ಕಾರುಗಳಿಗೆ ತಲುಪಿದೆ. ಇದು ನಿಸ್ಸಾನ್‌ನ ಮೇಡ್-ಇನ್-ಇಂಡಿಯಾ ರಫ್ತು ಬೆಳವಣಿಗೆಯನ್ನು ಒತ್ತಿಹೇಳುತ್ತದೆ.

ಭಾರತದಲ್ಲಿ ತನ್ನ ಬೆಳವಣಿಗೆಯನ್ನು ಅರಿತುಕೊಂಡಿರುವ ನಿಸ್ಸಾನ್, ಭಾರತೀಯ ಗ್ರಾಹಕರ ಅಗತ್ಯಗಳನ್ನು ಪೂರೈಸಲು ಮುಂಬರುವ ಜನವರಿ 21, 2026 ರಂದು ಹೊಚ್ಚ ಹೊಸ ಗ್ರಾವೈಟ್ (GRAVITE) ಎಂಬ ಹೊಸ 7-ಸೀಟರ್ B-MPV ಬಿಡುಗಡೆ ಮಾಡಲು ಸಜ್ಜಾಗಿದೆ, ನಂತರ ಫೆಬ್ರವರಿ 4, 2026 ರಂದು ನಿಸ್ಸಾನ್ ಟೆಕ್ಟಾನ್ ಎಂಬ 5-ಸೀಟರ್ C-SUV ಯ ಜಾಗತಿಕ ಅನಾವರಣ ನಡೆಯಲಿದೆ.

ಇದರ ನಂತರ 2027 ರಲ್ಲಿ ಮತ್ತೊಂದು 7-ಸೀಟರ್ C-SUV ಬಿಡುಗಡೆಯಾಗಲಿದ್ದು, ಹೆಚ್ಚಿನ ಬೆಳವಣಿಗೆಯ ವಿಭಾಗಗಳಲ್ಲಿ ನಿಸ್ಸಾನ್‌ನ ಉಪಸ್ಥಿತಿಯನ್ನು ಮತ್ತಷ್ಟು ಬಲಪಡಿಸುತ್ತದೆ. ಮುಂಬರುವ ಎಲ್ಲಾ ಕಾರುಗಳನ್ನು ಭಾರತದಲ್ಲಿ ತಯಾರಿಸಲಾಗುವುದು, ನಿಸ್ಸಾನ್ ಟೆಕ್ಟಾನ್ ಮತ್ತು 7-ಸೀಟರ್ C-SUV ಗಳನ್ನು ನಿಸ್ಸಾನ್‌ನ 'ಒಂದು ಕಾರು, ಒಂದು ಪ್ರಪಂಚ' ತತ್ವಶಾಸ್ತ್ರದ ಅಡಿಯಲ್ಲಿ ಆಯ್ದ ಜಾಗತಿಕ ಮಾರುಕಟ್ಟೆಗಳಿಗೆ ರಫ್ತು ಮಾಡಲಾಗುತ್ತದೆ ಎಂದು ತಿಳಿಸಿದೆ.

ತನ್ನ ಹೆಚ್ಚುತ್ತಿರುವ ಕಾರುಗಳಿಗಾಗಿ ನಿಸ್ಸಾನ್ ಮೋಟಾರ್ ಇಂಡಿಯಾ ತನ್ನ ರಾಷ್ಟ್ರವ್ಯಾಪಿ ಡೀಲರ್‌ಶಿಪ್ ಮತ್ತು ಮಾರಾಟದ ನಂತರದ ಸೇವಾ ಬೆಳವಣಿಗೆಯನ್ನು ವೇಗಗೊಳಿಸುತ್ತಿದೆ. ಕಂಪನಿಯು 2027 ರ ಅಂತ್ಯದ ವೇಳೆಗೆ 250 ಶೋರೂಂಗಳಿಗೆ ವಿಸ್ತರಿಸಲು ಯೋಜಿಸಿದೆ, ಇದು ದೇಶಾದ್ಯಂತ ಪ್ರವೇಶ, ಸೇವಾ ವ್ಯಾಪ್ತಿ ಮತ್ತು ಗ್ರಾಹಕರ ಅನುಭವವನ್ನು ಹೆಚ್ಚಿಸುತ್ತದೆ.

ರಫ್ತುಗಳು ನಿಸ್ಸಾನ್ ಮೋಟಾರ್ ಇಂಡಿಯಾಕ್ಕೆ ಪ್ರಮುಖ ಬೆಳವಣಿಗೆಯ ಆಧಾರಸ್ತಂಭವಾಗಿ ಮುಂದುವರೆದಿದ್ದು, ಕಂಪನಿಯು 2025 ರಲ್ಲಿ ಭಾರತದಿಂದ 1.2 ಮಿಲಿಯನ್ (12 ಲಕ್ಷ) ವಾಹನ ರಫ್ತಿನ ಮೈಲಿಗಲ್ಲನ್ನು ದಾಟಿದೆ. ಭಾರತದಲ್ಲಿ ತಯಾರಿಸಿದ ಹೊಸ ನಿಸ್ಸಾನ್ ಮ್ಯಾಗ್ನೈಟ್ ಅನ್ನು 65 ಕ್ಕೂ ಹೆಚ್ಚು ಅಂತರರಾಷ್ಟ್ರೀಯ ಮಾರುಕಟ್ಟೆಗಳಿಗೆ ರಫ್ತು ಮಾಡಲಾಗಿದ್ದು, ಜಾಗತಿಕ ಉತ್ಪಾದನಾ ಕೇಂದ್ರವಾಗಿ ಭಾರತದ ಪ್ರಾಮುಖ್ಯತೆಯನ್ನು ಒತ್ತಿಹೇಳುತ್ತದೆ.

2020 ರಲ್ಲಿ ಮ್ಯಾಗ್ನೈಟ್ ಬಿಡುಗಡೆಯಾದಾಗಿನಿಂದ 2025 ರ ವೇಳೆಗೆ 2,00,000 ಮಾರಾಟದ ಮೈಲಿಗಲ್ಲನ್ನು ದಾಟಿದೆ. ಇದು ಭಾರತ ಮತ್ತು ವಿದೇಶಿ ಮಾರುಕಟ್ಟೆಗಳಲ್ಲಿ ಬಲವಾದ ಬೇಡಿಕೆಯನ್ನು ಹೊಂದಿದೆ. ಹೊಸ ನಿಸ್ಸಾನ್ ಮ್ಯಾಗ್ನೈಟ್ ತನ್ನ GNCAP 5-ಸ್ಟಾರ್ ಸುರಕ್ಷತಾ ರೇಟಿಂಗ್, 40ಕ್ಕೂ ಹೆಚ್ಚು ಸುರಕ್ಷತಾ ವೈಶಿಷ್ಟ್ಯಗಳು ಮತ್ತು 10-ವರ್ಷಗಳ ವಾರೆಂಟಿಯೊಂದಿಗೆ ಬರುತ್ತದೆ. ಒಟ್ಟಾರೆ ಸುರಕ್ಷತೆ, ವಿಶ್ವಾಸಾರ್ಹತೆ, ಮಾಲೀಕತ್ವದ ಮೌಲ್ಯವನ್ನು ಹೊಂದಿದೆ.

ನಿಸ್ಸಾನ್ ಮೋಟಾರ್ ಇಂಡಿಯಾ 2026ಕ್ಕೆ ಕಾಲಿಡುತ್ತಿದ್ದಂತೆ, ಕಂಪನಿಯು ಬೆಳೆಯುತ್ತಿರುವ ಉತ್ಪನ್ನ ಪೋರ್ಟ್‌ಫೋಲಿಯೊ, ಬಲವರ್ಧಿತ ಡೀಲರ್ ನೆಟ್‌ವರ್ಕ್ ಮತ್ತು ಭಾರತೀಯ ಆಟೋಮೋಟಿವ್ ಮಾರುಕಟ್ಟೆಗೆ ದೀರ್ಘಕಾಲೀನ ಬದ್ಧತೆಯಿಂದ ಬೆಂಬಲಿತವಾದ ನವೀನ, ಸುರಕ್ಷಿತ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕ ಚಲನಶೀಲ ಪರಿಹಾರಗಳನ್ನು ತಲುಪಿಸಲು ಬದ್ಧವಾಗಿದೆ.