Tata: ಟಾಟಾ ಪಂಚ್ ಎಲೆಕ್ಟ್ರಿಕ್ - ಪೆಟ್ರೋಲ್: ಎರಡೂ ಬೊಂಬಾಟ್ ಕಾರುಗಳು: ಆದರೆ ಬೆಸ್ಟ್ ಯಾವುದು?

ಕೊನೆಗೂ ಟಾಟಾ ಮೋಟಾರ್ಸ್ (Tata Motors) ತನ್ನ ಹೊಸ ಟಾಟಾ ಇವಿ ಪಂಚ್ ಫೇಸ್‌ಲಿಫ್ಟ್ ಅನ್ನು ಬಿಡುಗಡೆ ಮಾಡಿದೆ. ಜನವರಿ 2026 ರ ಆರಂಭದಲ್ಲಿ ಇಂಧನ ಚಾಲಿತ ಟಾಟಾ ಪಂಚ್ ಫೇಸ್‌ಲಿಫ್ಟ್ ಕೂಡ ಬಿಡುಗಡೆಯಾಗಿದೆ. ಈ ಎರಡೂ ಕಾರುಗಳು ಈಗ ಅತ್ಯಾಧುನಿಕ ವಿನ್ಯಾಸ, ಆಕರ್ಷಕ ಫೀಚರ್ಸ್, ಅತ್ಯುತ್ತಮ ನವೀಕರಣಗಳನ್ನು ಪಡೆದುಕೊಂಡಿವೆ. ಎರಡೂ ಕಾರುಗಳು ಸದ್ಯ ಭಾರತೀಯ ಮಾರುಕಟ್ಟೆಯಲ್ಲಿ ತುಂಬಾ ಸದ್ದು ಮಾಡುತ್ತಿವೆ. ಇವು ನೋಡಲು ಒಂದೇ ಲುಕ್ ಹೊಂದಿದ್ದರೂ, ವಿಭಿನ್ನ ಡ್ರೈವ್ ಆಯ್ಕೆಗಳನ್ನು ಹೊಂದಿರುವುದರಿಂದ ಕೆಲವು ಬದಲಾವಣೆಗಳನ್ನು ಪಡೆದಿವೆ. ಹಾಗಾಗಿ ಇವೆರಡರ ನಡುವೆ ಹೋಲಿಕೆ ಮಾಡಿದ್ದೇವೆ, ನಿಮಗೆ ಖರೀದಿಸುವ ಪ್ಲಾನ್ ಇದ್ದರೇ ಯಾವುದು ಬೆಸ್ಟ್ ನೋಡೋಣ ಬನ್ನಿ.

ಫೇಸ್‌ಲಿಫ್ಟೆಡ್ ಎಲೆಕ್ಟ್ರಿಕ್ ಪಂಚ್ ಬೆಲೆಯು ರೂ. 9.69 ಲಕ್ಷ (ಎಕ್ಸ್-ಶೋರೂಂ) ನಿಂದ ಪ್ರಾರಂಭವಾಗುತ್ತದೆ, ಹಾಗೆಯೇ ಪೆಟ್ರೋಲ್ (ಐಸಿಇ) ಪಂಚ್ ಫೇಸ್‌ಲಿಫ್ಟ್ ಬೆಲೆಗಳು ರೂ 5.60 ಲಕ್ಷ (ಎಕ್ಸ್-ಶೋರೂಂ) ನಿಂದ ಪ್ರಾರಂಭವಾಗುತ್ತವೆ. ಆಯ್ಕೆಮಾಡಿದ ಪವರ್‌ಟ್ರೇನ್ ಏನೇ ಇರಲಿ, ಎರಡೂ ಮಾಡಲ್‌ಗಳು ಒಂದೇ ರೀತಿ ಇರುತ್ತವೆ. ಆದರೆ ಚಾಲನೆ, ವೆಚ್ಚ ಮತ್ತು ಮಾಲೀಕತ್ವದ ಅನುಭವದಲ್ಲಿ ಮಾತ್ರ ಭಿನ್ನವಾಗಿವೆ.

ಫೀಚರ್ಸ್ ಮತ್ತು ಡಿಸೈನ್

ಪಂಚ್‌ನ ಎರಡೂ ಆವೃತ್ತಿಗಳು ಸ್ಟ್ಯಾಂಡರ್ಡ್ ಆಗಿ ಆರು ಏರ್‌ಬ್ಯಾಗ್‌ಗಳನ್ನು ಹೊಂದಿವೆ. ಜೊತೆಗೆ ESC, ಹಿಲ್-ಹೋಲ್ಡ್, TPMS, ISOFIX, ಮತ್ತು 5-ಸ್ಟಾರ್ ಭಾರತ್ NCAP ರೇಟಿಂಗ್ ಪಡೆದಿವೆ. EV ಟಾಪ್ ವೇರಿಯೆಂಟ್‌ಗಳಲ್ಲಿ ಡ್ರೈವ್ ಮೋಡ್‌ಗಳನ್ನು (ಸಿಟಿ, ಇಕೋ, ಸ್ಪೋರ್ಟ್) ಮತ್ತು ಕ್ರೂಸ್ ಕಂಟ್ರೋಲ್ ಅನ್ನು ಸೇರಿಸಲಾಗಿದೆ, ಆದರೆ ಪೆಟ್ರೋಲ್ ಟರ್ಬೊ/AMT ಮಾಡಲ್‌ಗಳಲ್ಲಿ ಪ್ಯಾಡಲ್ ಶಿಫ್ಟರ್‌ಗಳನ್ನು ಪರಿಚಯಿಸಲಾಗಿದೆ.

ಡಿಸೈನ್ ವಿಷಯದಲ್ಲಿ ಎರಡೂ ಮಾಡಲ್‌ಗಳು ಕನೆಕ್ಟೆಡ್ LED ಟೈಲ್‌ಲ್ಯಾಂಪ್‌ಗಳು, ನವೀಕರಿಸಿದ ಬಂಪರ್‌ಗಳು ಮತ್ತು ಡ್ಯುಯಲ್-ಟೋನ್ ಸ್ಕೀಮ್‌ಗಳನ್ನು ಒಳಗೊಂಡಿವೆ. ಎರಡರಲ್ಲೂ 10.25-ಇಂಚಿನ ಟಚ್‌ಸ್ಕ್ರೀನ್ ಮತ್ತು ಡಿಜಿಟಲ್ ಡ್ರೈವರ್ ಡಿಸ್ಪ್ಲೇ, ವೆಂಟಿಲೇಟೆಡ್ ಸೀಟುಗಳು, ವೈರ್‌ಲೆಸ್ ಚಾರ್ಜಿಂಗ್, ಆಂಬಿಯೆಂಟ್ ಲೈಟಿಂಗ್, 360-ಡಿಗ್ರಿ ಕ್ಯಾಮೆರಾ ನೀಡಲಾಗಿದೆ. ಆದರೆ ಮುಂಭಾಗದ ಗ್ರಿಲ್ ವಿಷಯದಲ್ಲಿ ಭಿನ್ನವಾಗಿರುತ್ತವೆ.

ಪೆಟ್ರೋಲ್ ಪಂಚ್ ಎರಡು ಎಂಜಿನ್ ಆಯ್ಕೆ: 1.2 ಲೀಟರ್ ನ್ಯಾಚುರಲ್ಲಿ ಆಸ್ಪಿರೇಟೆಡ್ ಪೆಟ್ರೋಲ್ ಎಂಜಿನ್, 88 hp ಪವರ್ ಹಾಗೂ 115 Nm ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. ಮತ್ತೊಂದು ಆಯ್ಕೆಯಲ್ಲಿ ಹೊಸ 1.2 ಲೀಟರ್ ಟರ್ಬೊ-ಪೆಟ್ರೋಲ್, 120 hp ಪವರ್ 170 Nm ಟಾರ್ಕ್ ಉತ್ಪಾದಿಸುತ್ತದೆ. ಇದು 6-ಸ್ಪೀಡ್ MT ಯೊಂದಿಗೆ ಬರುತ್ತದೆ. ಸುಮಾರು 18 ಕಿಮೀ/ಲೀ ಮೈಲೇಜ್ ಅನ್ನು ನೀಡುತ್ತದೆ (ವೇರಿಯೆಂಟ್ ಅವಲಂಬಿಸಿ ಬದಲಾಗಬಹುದು).

ಮತ್ತೊಂದೆಡೆ, ಪಂಚ್ EV 30 kWh ಹಾಗೂ 40 kWh ಎಂಬ ಎರಡು ಬ್ಯಾಟರಿ ಆಯ್ಕೆಗಳೊಂದಿಗೆ ಫ್ರಂಟ್ ಎಲೆಕ್ಟ್ರಿಕ್ ಮೋಟರ್ ಜೊತೆಗೆ ಬರುತ್ತದೆ. 30 kWh ಬ್ಯಾಟರಿ ಪ್ಯಾಕ್ ಹೊಂದಿರುವ ಕಾರು ಒಮ್ಮೆ ಚಾರ್ಜ್ ಮಾಡಿ 365 ಕಿ.ಮೀ ರೇಂಜ್ ನೀಡುತ್ತದೆ. 40 kWh ಬ್ಯಾಟರಿ ಪ್ಯಾಕ್ ಹೊಂದಿರುವ ಕಾರು ಒಮ್ಮೆ ಚಾರ್ಜ್ ಮಾಡಿ 468 ಕಿಮೀ ರೇಂಜ್ ನೀಡುತ್ತದೆ.

ಯಾವುದನ್ನು ಆರಿಸಬೇಕು?: ನೀವು ಸುಗಮ ಮತ್ತು ನಿಶ್ಯಬ್ದ ಡ್ರೈವ್, ಕಡಿಮೆ ಚಾಲನೆಯಲ್ಲಿರುವ ವೆಚ್ಚಗಳು ಮತ್ತು ಶೂನ್ಯ ಕಾರ್ಬನ್ ಹೊರಸೂಸುವಿಕೆಯೊಂದಿಗೆ ಪರಿಸರ ಸ್ನೇಹಿ ಕಾರನ್ನು ಬಯಸಿದರೆ ಹಾಗೂ ಭವಿಷ್ಯದ ಕಡಿಮೆ ಖರ್ಚುಗಳನ್ನು ನೋಡುವವರಾಗಿದ್ದರೇ ನೀವು ಪಂಚ್ EV ಅನ್ನು ಆರಿಸಿಕೊಳ್ಳಬೇಕು. ಇದು ನಗರ ಪ್ರಯಾಣಿಕರಿಗೆ ಆಕರ್ಷಕ ಆಯ್ಕೆಯಾಗಿದೆ.

ಮತ್ತೊಂದೆಡೆ ಕಡಿಮೆ ಮುಂಗಡ ಖರೀದಿ ಬೆಲೆ, ಚಾರ್ಜಿಂಗ್ ಚಿಂತೆಗಳಿಲ್ಲ ಮತ್ತು ಎಂಜಿನ್ ವೈವಿಧ್ಯತೆಯನ್ನು (ಪರ್ಫಾಮೆನ್ಸ್‌ಗಾಗಿ ಟರ್ಬೊ ಸೇರಿದಂತೆ) ಆದ್ಯತೆ ನೀಡಿದರೆ ನೀವು ಪಂಚ್ ಪೆಟ್ರೋಲ್ ಅನ್ನು ಆರಿಸಿಕೊಳ್ಳಬೇಕು. ಆಗಾಗ್ಗೆ ದೀರ್ಘ ಪ್ರಯಾಣಗಳಿಗೆ ಅಥವಾ ಸೀಮಿತ ಚಾರ್ಜಿಂಗ್ ಮೂಲಸೌಕರ್ಯ ಹೊಂದಿರುವ ಪ್ರದೇಶಗಳಿಗೆ ಇದು ಸೂಕ್ತ ಆಯ್ಕೆಯಾಗಿದೆ.