ಲಂಬೋ ಹ್ಯುರಕೇನ್ ಸೆಪ್ಟೆಂಬರ್ ಲಾಂಚ್; ಬೆಂಗ್ಳೂರಲ್ಲಿ ಶೋ ರೂಂ

ಈಗಾಗಲೇ ದೆಹಲಿ ಹಾಗೂ ಮುಂಬೈ ಮಹಾನಗರಗಳಲ್ಲಿ ಶೋ ರೂಂ ಹೊಂದಿರುವ ಲಂಬೋರ್ಗಿನಿ ತನ್ನ ಮೂರನೇ ಘಟಕವನ್ನು ಬೆಂಗಳೂರಿನಲ್ಲಿ ತೆರೆದುಕೊಳ್ಳಲಿದೆ. ಇದು ಪ್ರಸಕ್ತ ಸಾಲಿನ ದ್ವಿತಿಯಾರ್ಧದಲ್ಲಿ ತೆರೆದುಕೊಳ್ಳಲಿದೆ.

ವರದಿಗಳ ಪ್ರಕಾರ 3.4 ಕೋಟಿ ರು.ಗಳಷ್ಟು ದುಬಾರಿಯ ಹ್ಯುರಕೇನ್ ಸೂಪರ್ ಕಾರು, ಸೆಪ್ಟೆಂಬರ್ ತಿಂಗಳಲ್ಲಿ ಲಾಂಚ್ ಆಗಲಿದ್ದು ಈಗಾಗಲೇ 1,000ದಷ್ಟು ಬುಕ್ಕಿಂಗ್ ದಾಖಲಾಗಿದೆ.

ಈ ಬಗ್ಗೆ ಮಾತನಾಡಿರುವ ಲಂಬೋರ್ಗಿನಿ ಇಂಡಿಯಾ ಕಾರ್ಯಾಚರಣೆಯ ಮುಖ್ಯಸ್ಥ ಪವನ್ ಶೆಟ್ಟಿ, ಭಾರತದಿಂದಲೂ ಬುಕ್ಕಿಂಗ್ ದಾಖಲಾಗಿದೆ ಎಂದಿದ್ದಾರೆ. ಅಲ್ಲದೆ ಬುಕ್ಕಿಂಗ್‌ ಮಾಡುತ್ತಿರುವವರ ಪೈಕಿ ಬಹುತೇಕರು ಉದ್ಯಮಿಗಳಾಗಿದ್ದಾರೆ ಎಂಬುದನ್ನು ತಿಳಿಸಿದ್ದಾರೆ.

ಇತರ ಐಷಾರಾಮಿ ಕಾರು ತಯಾರಕ ಸಂಸ್ಥೆಗಳಿಗೆ ಹೋಲಿಸಿದರೆ ಲಂಬೋರ್ಗಿನಿಗೆ ಭಾರತದಲ್ಲಿ ಬಿಗುವಾದ ಸಾನಿಧ್ಯವಿಲ್ಲ. ಇದು ಜಾಗತಿಕ ಮಾರಾಟದ ಶೇಕಡಾ 1ರಷ್ಟು ಮಾರಾಟವನ್ನು ಭಾರತದಿಂದ ಹೊಂದಿದೆ. ಹಾಗಿದ್ದರೂ ಬೆಳೆಯುತ್ತಿರುವ ಭಾರತ ಮಾರುಕಟ್ಟೆ ಬಗ್ಗೆ ಅತೀವ ಕಾಳಜಿ ವಹಿಸುತ್ತಿರುವ ಲಂಬೋರ್ಗಿನಿ ಟಾಪ್ 10 ಮಾರುಕಟ್ಟೆಯಲ್ಲಿ ಸ್ಥಾನ ಗಿಟ್ಟಿಸಿಕೊಳ್ಳುವ ನಿರೀಕ್ಷೆಯನ್ನಿರಿಸಿಕೊಂಡಿದೆ.

ಸಂಸ್ಥೆಯು 2013ನೇ ಸಾಲಿನಲ್ಲಿ 22 ಯುನಿಟ್‌ಗಳಷ್ಟೇ ದೇಶದಲ್ಲಿ ಮಾರಾಟ ಮಾಡಿದ್ದರೂ ಸಹ ಹಿಂದಿನ ಸಾಲಿಗೆ ಹೋಲಿಸಿದರೆ ಶೇಕಡಾ 29ರಷ್ಟು ವೃದ್ಧಿ ದಾಖಲಿಸಿದೆ.

ಅಂದ ಹಾಗೆ ಲಂಬೊರ್ಗಿನಿ ಹ್ಯುರಕೇನ್ 5.2 ಲೀಟರ್ ವಿ10 ಫೋರ್ ಸಿಲಿಂಡರ್‌ ಎಂಜಿನ್‌ನಿಂದ ನಿಯಂತ್ರಿಸ್ಪಡಲಿದ್ದು, 610 ಪಿಎಸ್ ಪವರ್ (560 ಎನ್‌ಎಂ ಟಾರ್ಕ್) ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ.