ಅಮಿತ ವೇಗವೇ ಪಾಲ್ ವಾಕರ್ ಸಾವಿಗೆ ಕಾರಣ..!

ಇದೀಗ ಲಾಸ್ ಏಂಜಲೀಸ್‌ನ ಕೌಂಟಿ ಕೊರೊನೆರ್‌ ಕಚೇರಿ (County Coroner's office) ಬಿಡುಗಡೆ ಮಾಡಿರುವ ಮರಣೋತ್ತರ ಪರೀಕ್ಷಾ ವರದಿಯಲ್ಲಿ, ವಾಕರ್ ಸಂಚರಿಸುತ್ತಿದ್ದ ಪೋರ್ಷೆ ಕರೆರಾ ಜಿಟಿ ಸೂಪರ್ ಕಾರು ಗಂಟೆಗೆ 160ಕ್ಕೂ ಕೀ.ಮೀ. ಹೆಚ್ಚು ವೇಗದಲ್ಲಿ ಸಂಚರಿಸುತ್ತಿತ್ತು ಎಂಬುದು ಬಯಲಾಗಿದೆ.

ಈ 15 ಪುಟಗಳ ವರದಿಯಲ್ಲಿ ಅಮಿತ ವೇಗ ಸಾವಿಗೆ ಕಾರಣ ಎಂಬುದನ್ನು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ. ಆದರೆ ಯಾವ ಕಾರಣದಿಂದಾಗಿ ಚಾಲಕನಿಗೆ ನಿಯಂತ್ರಣ ತಪ್ಪಿತ್ತು ಎಂಬುದು ಇನ್ನೂ ತಿಳಿದು ಬಂದಿಲ್ಲ. ಅಪಘಾತ ವೇಳೆ ಪಾಲ್ ವಾಕರ್ ಸ್ನೇಹಿತ ಕಾರನ್ನು ಚಲಾಯಿಸುತ್ತಿದ್ದರು.

ಅಮೆರಿಕದಲ್ಲಿ ವೇಗದಲ್ಲಿ ಕಾರು ಓಡಿಸುವುದು ಸರ್ವೇ ಸಾಮಾನ್ಯವಾಗಿದೆ. ಅಲ್ಲಿನ ರಸ್ತೆ ಅಷ್ಟೊಂದು ಗುಣಮಟ್ಟದಲ್ಲಿರುತ್ತದೆ. ಹಾಗೆಯೇ ಗರಿಷ್ಠ ಸುರಕ್ಷಾ ಮಾನದಂಡಗಳನ್ನು ಅನುಸರಿಸಲಾಗುತ್ತದೆ. ಹಾಗಿರುವಾಗ ಕಾರಿನ ನಿಯಂತ್ರಣ ಹೇಗೆ ತಪ್ಪಿತ್ತು ಎಂಬುದು ಇನ್ನೂ ನಿಗೂಢವಾಗಿಯೇ ಉಳಿದಿದೆ.

ಇದೇ ಸಂದರ್ಭದಲ್ಲಿ ವಾಕರ್ ಹಾಗೂ ಆತನ ಸ್ನೇಹಿತ ರೋಡಸ್, ಚಾಲನೆ ವೇಳೆ ಪಾನಮತ್ತರಾಗಿರಲಿಲ್ಲ ಎಂಬುದನ್ನು ಸಹ ವರದಿ ಉಲ್ಲೇಖಿಸಿದೆ. ಅಂದರೆ ಚಾಲನೆ ವೇಳೆ ಪ್ರಜ್ಞಾವಸ್ಥೆಯಲ್ಲಿದ್ದರು ಹಾಗೂ ಯಾವುದೇ ಅಮಲಿನ ಪಾನೀಯಗಳನ್ನು ಸೇವಿಸಿರಲಿಲ್ಲ ಎಂಬುದು ಸಹ ದಾಖಲಾಗಿದೆ.

ತಲೆ, ಕುತ್ತಿಗೆ ಮತ್ತು ಎದೆಗೆ ಗಂಭೀರ ಗಾಯ ಮಾಡಿಕೊಂಡ ರೋಡಸ್ ತಕ್ಷಣವೇ ಮೃತಪಟ್ಟಿದ್ದರೆ ಕಾರಿಗೆ ಬೆಂಕಿ ಆವರಿಸುವವರೆಗೂ ತಮ್ಮ ಪ್ರಾಣಕ್ಕಾಗಿ ವಾಕರ್ ಹೋರಾಟ ನಡೆಸುತ್ತಿದ್ದರು ಎನ್ನಲಾಗಿದೆ.

ಈ ನಡುವೆ ಪಾಲ್ ವಾಕರ್ ಅಭಿನಯದ ಕೊನೆಯ ಚಿತ್ರವಾಗಿರುವ 'ಫಾಸ್ಟ್ ಆಂಡ್ ಪ್ಯೂರಿಯಸ್ 7' ಬಿಡುಗಡೆ ದಿನಾಂಕವನ್ನು 2014 ಜುಲೈನಿಂದ 2015 ಎಪ್ರಿಲ್ 10ಕ್ಕೆ ಮುಂದೂಡಲಾಗಿದೆ. ಪಾಲ್ ವಾಕರ್ ಮರಣದ ಹಿನ್ನಲೆಯಲ್ಲಿ ಕಥೆ, ಸಂಭಾಷಣೆ ಮತ್ತೆ ಬರೆಯಲಾಗುವುದು.