ಮಾರುತಿ ಸೆಲೆರಿಯೊ ಪ್ರತಿಸ್ಪರ್ಧಿ ಟೊಯೊಟಾ ಐಗೊ

ನಿಮ್ಮ ಮಾಹಿತಿಗಾಗಿ, ಟೊಯೊಟಾ ಐಗೊ ಹೊಸ ಕಾರೇನಲ್ಲ. ಸ್ವಾತಂತ್ರ್ಯ ಹಾಗೂ ಚಲನಶೀಲತೆ ಸಂಕೇತವಾಗಿರುವ ಐಗೊ 2005ನೇ ಇಸವಿಯಿಂದಲೇ ಮಾರುಕಟ್ಟೆಯಲ್ಲಿದೆ. ಇದೀಗ ಮತ್ತಷ್ಟು ಸ್ಟೈಲಿಷ್ ಹಾಗೂ ಆಕ್ರಮಣಕಾರಿ ವಿನ್ಯಾಸದೊಂದಿಗೆ ಆಗಮನವಾಗಲಿದೆ.

ಇದರಲ್ಲಿ ಜಪಾನ್ ವಾಹನ ತಯಾರಕ ಸಂಸ್ಥೆಯು ಸಿಂಗಲ್ ಎಂಜಿನ್ ಒದಗಿಸುತ್ತಿದ್ದು, ಅಂದರೆ 1.0 ಲೀಟರ್ ಎಂಜಿನ್ ಹೊಂದಿರಲಿದೆ. ಇದು 68 ಅಶ್ವಶಕ್ತಿ ಉತ್ಪಾದಿಸಲಿದೆ. ಇದು 14.2 ಸೆಕೆಂಡುಗಳಲ್ಲಿ ಗಂಟೆಗೆ 100 ಕೀ.ಮೀ. ಹಾಗೂ ಗಂಟೆಗೆ ಗರಿಷ್ಠ 160 ಕೀ.ಮೀ. ವೇಗತೆಯಲ್ಲಿ ಸಂಚರಿಸಲಿದೆ.

ಹಿಂದಿನ ಮಾದರಿಗಿಂತಲೂ ಹೆಚ್ಚು ಪರಿಷ್ಕೃತ ಎಕ್ಸ್-ಶಿಫ್ಟ್ ಆಟೋಮ್ಯಾಟಡ್ ಮ್ಯಾನುವಲ್ ಗೇರ್ ಬಾಕ್ಸ್ ಅನ್ನು ಟೊಯೊಟಾ ಇದರಲ್ಲಿ ಬಳಕೆ ಮಾಡಲಿದೆ.ಇದು ಈ ಹ್ಯಾಚ್‌ಬ್ಯಾಕ್ ಕಾರು ಗರಿಷ್ಠ ಇಂಧನ ಕ್ಷಮತೆ ನೀಡಲು ನೆರವಾಗಲಿದೆ.

ನೀವು ನೋಡುತ್ತಿರುವಂತೆಯೇ ಮುಂಭಾಗದಲ್ಲಿ ಸೆಲೆರಿಯೊಗಿಂತ ಪ್ರೀಮಿಯಂ ಲುಕ್ ಕಾಪಾಡಿಕೊಳ್ಳುಲ್ಲಿ ಐಗೊ ಯಶಸ್ಸನ್ನು ಕಂಡಿದೆ. ಇದು ಎಕ್ಸ್ ವಿನ್ಯಾಸಕ್ಕೆ ಮೊರೆ ಹೋಗಿರುವುದನ್ನು ಕಾಣಬಹುದು.

ಇನ್ನು ಬದಿಯಲ್ಲಿ ಸುಲಭವಾದ ವಿನ್ಯಾಸ ಕಲ್ಪಿಸಿಕೊಡಲಾಗಿದೆ. ಆದರೆ 5 ಸ್ಪೋಕ್ ಅಲಾಯ್ ವೀಲ್‌ಗಳು ಕಾರಿಗೆ ಕ್ರೀಡಾತ್ಮಕ ವಿನ್ಯಾಸ ಪ್ರದಾನ ಮಾಡಲಿದೆ.

ಐಗೊ ಹಿಂದಿನ ಆವೃತ್ತಿಗಿಂತಲೂ 25 ಎಂಎಂ ಹೆಚ್ಚು ಉದ್ದ ಹೊಂದಿರಲಿದೆ. ಇನ್ನು ಕಾರಿನ ಹಿಂದುಗಡೆ ಫ್ಯೂಚರಿಸ್ಟಿಕ್ ವಿನ್ಯಾಸದ ಟೈಲ್ ಲ್ಯಾಂಪ್ ಕ್ಲಸ್ಟರ್ ಪಡೆದುಕೊಳ್ಳಲಿದೆ. ಹಾಗೆಯೇ ಬೂಟ್ ಸಾಮರ್ಥ್ಯ 29 ಲೀಟರುಗಳಷ್ಟು ಹೆಚ್ಚು ಸಿಗಲಿದೆ. ಇದು ನಿಮ್ಮ ಪಯಣವನ್ನು ಸುಲಭಗೊಳಿಸಲಿದೆ.

ಅಂತಿಮವಾಗಿ ಕಾರಿನೊಳಗೆ ಆಕರ್ಷಕ ಮಾಹಿತಿ ಮನರಂಜನಾ ವ್ಯವಸ್ಥೆ ಲಭ್ಯವಿರಲಿದೆ. ಒಟ್ಟಿನಲ್ಲಿ ಸದ್ಯಕ್ಕಂತೂ ಟೊಯೊಟಾ ಐಗೊ ಭಾರತ ಪ್ರವೇಶಿಸುವ ಯಾವುದೇ ಸೂಚನೆಗಳು ಲಭಿಸಿಲ್ಲ. ಹಾಗಾಗಿ ಸದ್ಯಕ್ಕೆ ಸೆಲೆರಿಯೊ ಅಬ್ಬರವನ್ನು ತಡೆಯಲು ಯಾರಿಂದಲೂ ಸಾಧ್ಯವಿಲ್ಲ ಎಂಬುದು ಖಚಿತವಾಗಿದೆ.