ಅಮೆರಿಕದಲ್ಲಿ ಮೊತ್ತ ಮೊದಲ ವಿದ್ಯುತ್ ಚಾಲಿತ ಶಾಲಾ ಬಸ್

ಇದು ಅಮೆರಿಕದಲ್ಲಿ ಓಡಾಡಲಿರುವ ಮೊದಲ ಎಲೆಕ್ಟ್ರಿಕ್ ಶಾಲಾ ಬಸ್ ಆಗಿರಲಿದೆ. ಅಲ್ಲಿನ ಮೊದಲ ಎಲೆಕ್ಟ್ರಿಕ್ ಬಸ್ಸು ಕ್ಯಾಲಿಫೋರ್ನಿಯಾದಲ್ಲಿ ಮಕ್ಕಳನ್ನು ಶಾಲೆಗೆ ಕರೆದೊಯ್ಯಲಿದೆ.

ಕಳೆದ ಒಂದೆರೆಡು ವರ್ಷಗಳಲ್ಲಿ ಎಲೆಕ್ಟ್ರಿಕ್ ಬಸ್ಸುಗಳಿಗೂ ಹೆಚ್ಚಿನ ಬೇಡಿಕೆ ಕಂಡುಬರುತ್ತಿದೆ. ಆದರೆ ಯಾವುದೇ ಅಮೆರಿಕದ ಪ್ರಾಂತ್ಯಗಳು ಇದುವರೆಗೆ ಶಾಲಾ ಮಕ್ಕಳನ್ನು ಕರೆದೊಯ್ಯಲು ಎಲೆಕ್ಟ್ರಿಕ್ ಬಸ್ಸುಗಳನ್ನು ಬಳಕೆ ಮಾಡುತ್ತಿರಲಿಲ್ಲ.

ಮೋಟಿವ್ ಪವರ್ ಸಿಸ್ಟಂ ಹಾಗೂ ಟ್ರಾನ್ಸ್ ಟೆಕ್ ಬಸ್ ಜಂಟಿಯಾಗಿ ಈ ಎಸ್‌ಎಸ್‌ಟಿ-ಇ ಟೈಪ್ ಶಾಲಾ ಬಸ್ಸನ್ನು ಅಭಿವೃದ್ಧಿಗೊಳಿಸಿದೆ. ಇದರ ಸೇವೆಯನ್ನು ಕ್ಯಾಲಿಫೋರ್ನಿಯಾದ ಕಿಂಗ್ಸ್ ಕ್ಯಾನ್ಯಾನ್ ಯುನಿಫೈಡ್ ಸ್ಕೂಲ್ ಡಿಸ್ಟ್ರಿಕ್ಟ್ ಪಡೆಯಲಿದೆ.

ನಾವು ಹಲವಾರು ಎಲೆಕ್ಟ್ರಿಕ್ ಬಸ್ಸುಗಳ ಬಗ್ಗೆ ಮಾತನಾಡಿರುತ್ತೇವೆ. ಆದರೆ ಪರಿಸರ ಸ್ನೇಹಿ ಶಾಲಾ ಬಸ್ ತಯಾರಿಗೆ ಇಷ್ಟೊಂದು ವಿಳಂಬವಾಗಿರುವುದು ಅಚ್ಚರಿ ಮೂಡಿಸುತ್ತದೆ. ಫೋರ್ಡ್ ಎಫ್450 ಚಾಸೀಸ್ ತಲಹದಿಯಲ್ಲಿ ಇದನ್ನು ತಯಾರಿಸಲಾಗಿದ್ದು ಮೋಟಿವ್ ಎಲೆಕ್ಟ್ರಿಕ್ ಪವರ್‌ಟ್ರೈನ್ ಕಂಟ್ರೋಲ್ ಸಿಸ್ಟಂ (ePCS) ಹೊದಿದೆ.

ವರದಿಗಳ ಪ್ರಕಾರ ಎಲೆಕ್ಟ್ರಿಕ್ ಸ್ಕೂಲ್ ಬಸ್ ಆಳವಡಿಸುವ ಮೂಲಕ ದೈನಂದಿನ 16 ಗ್ಯಾಲನ್ ಅಥವಾ ವರ್ಷದಲ್ಲಿ 11000 ಅಮೆರಿಕನ್ ಡಾಲರ್ ಇಂಧನ ಉಳಿತಾಯ ಮಾಡಬಹುದಾಗಿದೆ.

ಇದರಲ್ಲಿ 24ರಿಂದ 34 ಮಕ್ಕಳಿಗೆ ಆರಾಮದಾಯಕವಾಗಿ ಪಯಣಿಸಬಹುದಾಗಿದೆ. ಜೊತೆಗೆ ಅಂಗವಿಕಲರಿಗೆ ವೀಲ್ ಚೇರ್ ವ್ಯವಸ್ಥೆಯು ಇದೆ.

ಹಾಗೆಯೇ ಇದರಲ್ಲಿ ಆಳವಡಿಸಲಾಗಿರುವ ಬ್ಯಾಟರಿ ಒಮ್ಮೆ ಚಾರ್ಜ್ ಮಾಡಿಸಿದ್ದಲ್ಲಿ 80ರಿಂದ 100 ಕೀ.ಮೀ. ವರೆಗೂ ಚಲಿಸಬಹುದಾಗಿದೆ. ಇದರ ಬ್ಯಾಟರಿ ಒಂದು ತಾಸಿನೊಳಗೆ ಅರ್ಧಕ್ಕಿಂತ ಹೆಚ್ಚು ಚಾರ್ಜ್ ಆಗಲಿದೆ.

ಈ ಎಸ್‌ಎಸ್‌ಟಿ-ಇ ಎಲೆಕ್ಟ್ರಿಕ್ ಬಸ್ಸಿನಲ್ಲಿ ದೂರ ಮಾಪಕ ಕೂಡಾ ಇದ್ದು, ರಿಯಲ್ ಟೈಮ್ ಮಾರ್ಗ ಮಾಹಿತಿ ಜೊತೆಗೆ ನಿರ್ವಹಣೆ ಮಾಹಿತಿಯನ್ನು ನೀಡಲಿದೆ. ಮುಂದಿನ ದಿನಗಳಲ್ಲಿ ಚಿಕಾಗೋ, ನ್ಯೂಯಾರ್ಕ್‌ನತ್ತವೂ ಯೋಜನೆ ವಿಸ್ತರಿಸಲಿದೆ.

ಅಷ್ಟಕ್ಕೂ ನಮ್ಮ ದೇಶದಲ್ಲಿ ಎಲೆಕ್ಟ್ರಿಕ್ ಶಾಲಾ ಬಸ್‌ಗಳ ಕನಸು ಯಾವಾಗ ನನಸಾಗಲಿದೆ ಎಂಬುದಕ್ಕೆ ಸರಕಾರವೇ ಉತ್ತರ ಕೊಡಬೇಕಾಗಿದೆ. ಸದ್ಯ ನಿಮ್ಮ ಅನಿಸಿಕೆಗಳನ್ನು ನಮ್ಮ ಜೊತೆ ಹಂಚಿಕೊಳ್ಳಿರಿ...