ಚೆನ್ನೈ ಪ್ರವಾಹ ಎಫೆಕ್ಟ್; ಐಷಾರಾಮಿ ಕಾರುಗಳು 5 ಲಕ್ಷಕ್ಕೆ ಹರಾಜು

ಐಷಾರಾಮಿ ಪೋರ್ಷೆ ಕಾರು ಬರಿ ಐದು ಲಕ್ಷ ರು.ಗಳಿಗೆ ಅಂತೆಯೇ ಬಿಎಂಡಬ್ಲ್ಯು ಎಂಟು ಲಕ್ಷ ರುಪಾಯಿಗಳಿಗೆ ನಿಮ್ಮನ್ನು ಬಂದು ತಲುಪಲಿದೆ ಅಂದರೆ ನಂಬಲು ಸಾಧ್ಯವೇ? ಇಂತಹದೊಂದು ಪರಿಸ್ಥಿತಿ ಚೆನ್ನೈನಲ್ಲಿ ಸಂಭವಿಸಿರುವುದು ತಪ್ಪಲ್ಲ.

ಸಹಜವಾಗಿಯೇ ಪ್ರಕೃತಿ ವಿಕೋಪದಿಂದ ಹಾನಿಗೀಡಾದ ಕಾರುಗಳಿಗೆ ಮಾಲಿಕರು ವಿಮೆ ಕ್ಲೈಮ್ ಮಾಡುತ್ತಾರೆ. ಈ ಎಲ್ಲ ಔಪಚಾರಿಕತೆ ಪೂರ್ಣಗೊಂಡ ಬಳಿಕ ವಿಮೆ ಸಂಸ್ಥೆಗಳು ಕಾರುಗಳನ್ನು ಹರಾಜಿಡಲು ನಿರ್ಧರಿಸಿದೆ.

ಕಾರಿನ ನೈಜ ಆನ್ ರೋಡ್ ಬೆಲೆಗಿಂತಲೂ ಹತ್ತು ಪಟ್ಟು ಕಡಿಮೆ ದರಗಳಲ್ಲಿ ಕಾರನ್ನು ಹರಾಜಿಡಲಾಗುತ್ತಿದೆ. ಈ ಸಂಬಂಧ ಆನ್ ಲೈನ್ ಹರಾಜುಗಾರ ವೆಬ್ ಸೈಟ್‌ಗೆ (copart.in) ನೂರಾರು ಕಾರುಗಳನ್ನು ಹರಾಜು ಮಾಡುವಂತೆ ನಿರ್ದೇಶ ಲಭಿಸಿದೆ.

ಅಮೆರಿಕ ತಳಹದಿಯ ಈ ಹರಾಜುಗಾರ ಸಂಸ್ಥೆಗೆ ವಿಮೆ ಸಂಸ್ಥೆಗಳಿಂದ, ವೈಯಕ್ತಿಕ, ಬ್ಯಾಂಕ್‌ಗಳಿಂದ ಮತ್ತು ಡೀಲರುಗಳಿಂದ ಹರಾಜು ಮಾಡುವಂತೆ ಬೇಡಿಕೆ ಬಂದಿದೆ.

ಇಲ್ಲಿ ಗಮನಾರ್ಹ ಅಂಶವೆಂದರೆ ಹೊಚ್ಚ ಹೊಸ 2015 ಹಾಗೂ 2014ರ ಸಾಲಿನ ಐಷಾರಾಮಿ ಕಾರುಗಳನ್ನು ಗಳು ಹರಾಜಿಗಿಡಲಾಗುತ್ತಿದೆ. ಹರಾಜಿಗಿಡುವ ಕಾರುಗಳ ದಾಖಲೆ ಪತ್ರ ಎಲ್ಲ ಸರಿಯಾಗಿರುತ್ತದೆ. ಆದರೆ ಕಾರುಗಳ ಕಂಡೀಷನ್ ಹೇಗಿರುತ್ತೆ ಎಂಬುದಕ್ಕೆ ಮಾತ್ರ ನಾವು ಜವಾಬ್ದಾರರಲ್ಲ ಎಂದು ಸಂಸ್ಥೆಯ ವಕ್ತಾರರೋರ್ವರು ತಿಳಿಸಿದ್ದಾರೆ.

ಮೂಲಗಳ ಪ್ರಕಾರ ಬುಧವಾರದಿಂದಲೇ ಹರಾಜು ಪ್ರಕ್ರಿಯೆ ಆರಂಭಗೊಂಡಿದ್ದು, ಬಿಎಂಡಬ್ಲ್ಯು 3 ಸಿರೀಸ್ ಕಾರಿಗೆ ಆರು ಲಕ್ಷ ರು., 2015ರ ಆಡಿ ಎ4 ಕಾರಿಗೆ 3.4 ಲಕ್ಷ ರು. ಹಾಗೂ 2012ರ ಪೋರ್ಷೆ ಕೆಯೆನ್ ಕಾರಿಗೆ 5 ಲಕ್ಷ ರು.ಗಳ ಮೂಲಧನ ನಿಗದಿಪಡಿಸಲಾಗಿದೆ.

ಕಳೆದೊಂದು ವಾರದಿಂದ ದಿನವೊಂದರಲ್ಲಿ 10ರಷ್ಟು ಕಾರುಗಳು ನಮ್ಮನ್ನು ಬಂದು ಸೇರುತ್ತಿದೆ. ಈ ಮೂಲಕ ಒಟ್ಟು ಕಾರುಗಳ ಸಂಖ್ಯೆ 108ಕ್ಕೆ ಏರಿಕೆಯಾಗಿದ್ದು, ಮತ್ತಷ್ಟು ವರ್ಧಿಸುವ ಸಾಧ್ಯತೆಯಿದೆ. ಈ ನಿಟ್ಟಿನಲ್ಲಿ ಪ್ರತಿ ವಾರದಲ್ಲೂ ಹರಾಜು ಏರ್ಪಡಿಸುವ ಇರಾದೆಯಿದೆ ಎಂದು ವೆಬ್ ಸೈಟ್ ತಿಳಿಸಿದೆ.

ಆಸಕ್ತರು ಮೇಲೆ ತಿಳಿಸಿದ ವೆಬ್ ಸೈಟ್ ಗೆ ತೆರಳಿ ರಿಜಿಸ್ಟರ್ ಮಾಡಬೇಕಾಗಿದ್ದು, ಹಿಂಪಾವತಿ ಮಾಡಬಹುದಾದ ಭದ್ರತಾ ಠೇವಣಿಯನ್ನು ಕಟ್ಟಬೇಕಾಗುತ್ತದೆ. ಈ ಹರಾಜು ಪ್ರಕ್ರಿಯೆ ಮುಂದಿನ ಮೂರು ತಿಂಗಳಷ್ಟು ಕಾಲ ಮುಂದುವರಿಯುವ ಸಾಧ್ಯತೆಯಿದೆ.

ಹರಾಜಿನಲ್ಲಿ ಕಡಿಮೆ ಬೆಲೆಗೆ ಐಷಾರಾಮಿ ಕಾರುಗಳನ್ನು ಖರೀದಿಸಿ ಅದರ ಬಿಡಿಭಾಗಗಳನ್ನು ಮಾರಾಟ ಮಾಡುವ ತಂತ್ರವನ್ನು ನೀವಿಲ್ಲಿ ಮನಗಾಣಬೇಕಾಗುತ್ತದೆ.

ಮಗದೊಂದು ಹರಾಜು ಸಂಸ್ಥೆಯಾಗಿರುವ ಆಟೋ ಮಾರ್ಟ್ ಬಳಿಯೂ 10,000 ದಷ್ಟು ಪ್ರವಾಹ ಬಾಧಿತ ಕಾರುಗಳು ಬಂದು ತಲುಪಿದ್ದು, ಹರಾಜು ಪ್ರಕ್ರಿಯೆಯನ್ನು ಆರಂಭಿಸಿದೆ. ಯಾವುದಕ್ಕೂ ನಿಮಗೂ ಕೂಡಾ ಹರಾಜಿನಲ್ಲಿ ಭಾಗವಹಿಸುವ ಇರಾದೆಯಿದ್ದಲ್ಲಿ ಕಾರಿನ ಗುಣಮಟ್ಟತೆ ಬಗ್ಗೆ ಸ್ವಲ್ಪ ಹುಷಾರಾಗಿರಿ.