ಬೆಂಗಳೂರು ಎಂಜಿನಿಯರ್ ಸಾಧನೆ; ಕೆಫೆ ರೇಸರಾಗಿ ಬದಲಾದ ಯಮಹಾ ಆರ್‌ಎಕ್ಸ್ 135

1998ರಿಂದ 2005ರ ವರೆಗೆ ಟು ಸ್ಟ್ರೋಕ್ ಎಂಜಿನ್ ನಿಯಂತ್ರಿತ ಯಮಹಾ ಆರ್ ಎಕ್ಸ್-135 ಫೋರ್ ಸ್ಪೀಡ್ ಹಾಗೂ ಐದು ಸ್ಪೀಡ್ ಆವೃತ್ತಿಗಳಲ್ಲಿ ದೇಶದಲ್ಲಿ ಮಾರಾಟವಾಗಿತ್ತು.

ಬೆಂಗಳೂರು ತಳಹದಿಯ ಮೆಕ್ಯಾನಿಕಲ್ ಎಂಜಿನಿಯರ್ ಶಶಾಂಕ್ ಭಾರಧ್ವಾಜ್ ಎಂಬವರು ಜನಪ್ರಿಯ ಯಮಹಾ ಆರ್ ಎಕ್ಸ್ ಬೈಕ್ ಗೆ ಕೆಫೆ ರೇಸರ್ ಶೈಲಿಯನ್ನು ರೂಪಿಸಿದ್ದಾರೆ.

ಐಕಾನಿಕ್ ರಾಯಲ್ ಎನ್ ಫೀಲ್ಡ್ ಬೈಕ್ ಗಳನ್ನೇ ಮೀರಿಸುವಂತಹ ವಿನ್ಯಾಸವನ್ನು ಮೈಗೂಡಿಸಿಕೊಂಡಿರುವ ಯಮಹಾ ಆರ್ ಎಕ್ಸ್ ಬೈಕ್ ನಲ್ಲಿ ತಾಂತ್ರಿಕತೆಯಲ್ಲೂ ಬದಲಾವಣೆ ತರಲಾಗಿದೆ.

ನವೀಕೃತ ಇಂಧನ ಟ್ಯಾಂಕ್, ಸಿಂಗಲ್ ಸೀಟು, ಪರಿಷ್ಕೃತ ಹ್ಯಾಂಡಲ್ ಬಾರ್ ಮತ್ತು ಸ್ವಿಂಗ್ ಆರ್ಮ್ ಕಾಣಬಹುದಾಗಿದೆ.

ಹಿಂದುಗಡೆ ಮೊನೊಶಾಕ್ ಸಸ್ಪೆನ್ಷನ್, ಮುಂದೆ ಹಾಗೂ ಹಿಂಭಾಗದಲ್ಲಿ ಡಿಸ್ಕ್ ಬ್ರೇಕ್ ಮತ್ತು ಅಲಾಯ್ ಚಕ್ರಗಳ ಸೇವೆಯು ಇದರಲ್ಲಿರುತ್ತದೆ.

ಕಪ್ಪು ವರ್ಣದ ಇಂಧನ ಟ್ಯಾಂಕ್ ಮಧ್ಯದಲ್ಲಿ ಗೋಲ್ಡನ್ ಆರೆಂಜ್ ಪಟ್ಟಿಯು ಪ್ರಮುಖ ಆಕರ್ಷಣೆಯಾಗಿದ್ದು, ಒಟ್ಟಾರೆ ವಿನ್ಯಾಸವೂ ವಾಹನ ಪ್ರೇಮಿಗಳ ಮೆಚ್ಚುಗೆಗೆ ಪಾತ್ರವಾಗಿದೆ.

ಒಂಬತ್ತು ತಿಂಗಳ ಅವಧಿಯಲ್ಲಿ ಸಂಪೂರ್ಣ ಬೈಕನ್ನು ಮಾರ್ಪಾಡುಗೊಳಿಸಲಾಗಿದೆ. ಇದಕ್ಕಾಗಿ ಸರಿ ಸುಮಾರು ಒಂದು ಲಕ್ಷ ರುಪಾಯಿಗಳಷ್ಟು ಖರ್ಚು ತಗುಲಿತ್ತು.

ಈ ಹಳೆಯ ಯಮಹಾ ಬೈಕ್ ಗಳಿಗೆ ನೂತನ ವೈಝಡ್ ಎಫ್-ಆರ್15 ವರ್ಷನ್ 2.0 ಬೈಕ್ ನಿಂದಲೂ ಬಿಡಿಭಾಗಗಳನ್ನು ಜೋಡಣೆ ಮಾಡಲಾಗಿತ್ತು.

ಕೆಫೆ ರೇಸರ್ ಮೋಟಾರ್ ಸೈಕಲ್ ಮೇಲಿನ ಅತೀವ ಪ್ರೀತಿಯೇ ಬೆಂಗಳೂರು ಮೂಲದ ಎಂಜಿನಿಯರ್ ಶಶಾಂಕ್ ಅವರಿಗೆ ಇಂತಹದೊಂದು ವಿನೂತನ ಸೃಷ್ಟಿಗೆ ಪ್ರೇರಣೆಯಾಗಿದೆ.

2016 ಜನವರಿ ತಿಂಗಳಲ್ಲಿ 1998ರ ಯಮಹಾ ಆರ್ ಎಕ್ಸ್ 135 ಮಾಡೆಲನ್ನು ಶಶಾಂಕ್ ಖರೀದಿಸಿದ್ದರು. ತಮ್ಮ ಬಳಿ ತಲುಪುವಾಗ ತುಕ್ಕು ಹಿಡಿದಂತಿದ್ದ ಈ ಬೈಕ್ ಗೀಗ ಮರು ಜೀವ ತುಂಬಲಾಗಿದೆ.

ಎಲ್ಲ ರೀತಿಯ ಅಡೆತಡೆಗಳನ್ನು ಎದುರಿಸುವ ಮೂಲಕ ಕೊನೆಗೂ ತಮ್ಮ ಮೆಚ್ಚಿನ ಬೈಕ್ ಗೆ ಹೊಸ ರೂಪವನ್ನು ಕಲ್ಪಿಸಿಕೊಡುವಲ್ಲಿ ಬೆಂಗಳೂರು ಮೂಲದ ಎಂಜಿನಿಯರ್ ಸಫಲತೆಯನ್ನು ಕಂಡಿದ್ದಾರೆ.