ದುಬೈ ಪೊಲೀಸ್ ಸರ್ಪಗಾವಲು; ಗಸ್ತು ತಿರುಗಲು ಆಡಿ ಶಕ್ತಿಶಾಲಿ ಕಾರು

ವಿಶ್ವದ ಅತಿ ಶ್ರೀಮಂತ ರಕ್ಷಣಾ ಇಲಾಖೆಯಾಗಿರುವ ದುಬೈ ಪೊಲೀಸ್, ಆಡಿ ದುಬಾರಿ ಕಾರುಗಳನ್ನು ಖರೀದಿ ಮಾಡುವ ಮೂಲಕ ಗಮನ ಸೆಳೆದಿದೆ.

By Nagaraja

Published: Friday, November 18, 2016, 12:17 [IST]

ವಿಶ್ವದ ಶ್ರೀಮಂತ ರಕ್ಷಣಾ ವಿಭಾಗವಾಗಿರುವ ದುಬೈ ಪೊಲೀಸ್ ಗೆ ಮತ್ತೆರಡು ಐಷಾರಾಮಿ ಕಾರುಗಳ ಸೇರ್ಪಡೆಯಾಗಿದೆ. ತನ್ನ ಬತ್ತಳಿಕೆಯಲ್ಲಿ ಸಾಲು ಸಾಲು ಸೂಪರ್ ಕಾರುಗಳನ್ನು ಹೊಂದಿರುವ ದುಬೈ ಪೊಲೀಸ್ ಗ್ಯಾರೇಜ್ ಗೀಗ, ಆರರಷ್ಟು ಆಡಿ ಆರ್8 ಮತ್ತು ಆಡಿ ಕ್ಯೂ7 ದುಬಾರಿ ಕಾರುಗಳು ಸೇರಿಕೊಂಡಿದೆ.

ದುಬೈ ಪೊಲೀಸ್ ಸರ್ಪಗಾವಲು; ಗಸ್ತು ತಿರುಗಲು ಆಡಿ ಶಕ್ತಿಶಾಲಿ ಕಾರು

ಸುರಕ್ಷತೆಯನ್ನು ಖಾತ್ರಿಪಡಿಸುವ ನಿಟ್ಟಿನಲ್ಲಿ ಆಡಿ ದುಬಾರಿ ಕಾರುಗಳನ್ನು ತನ್ನ ಸೂಪರ್ ಕಾರುಗಳ ಸಾಲಿನಲ್ಲಿ ಸೇರ್ಪಡೆಗೊಳಿಸಲಾಗುತ್ತಿದೆ ಎಂಬುದನ್ನು ದುಬೈ ಪೊಲೀಸ್ ಖಚಿತಪಡಿಸಿದೆ.

ಜರ್ಮನಿ ಮೂಲದ ಆಡಿ ಸಂಸ್ಥೆ ನಿರ್ಮಿತ ಆ8 ಕಾರು ವಿಶ್ವದಲ್ಲೇ ಅತಿ ವೇಗದಲ್ಲಿ ಚಲಿಸುವ ಕಾರುಗಳಲ್ಲಿ ಒಂದಾಗಿದೆ. ಇದು ದುಬೈ ಪೊಲೀಸ್ ಗೆ ಗಸ್ತು ತಿರುಗಲು ನೆರವಾಗಲಿದೆ.

ಆಡಿ ಆರ್8 ಕಾರಿನಲ್ಲಿ ಶಕ್ತಿಶಾಲಿ 5.2 ಲೀಟರ್ ವಿ10 ಎಂಜಿನ್ ಬಳಕೆ ಮಾಡಲಾಗಿದ್ದು, 560 ಎನ್ ಎಂ ತಿರುಗುಬಲದಲ್ಲಿ ಬರೋಬ್ಬರಿ 602 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ.

ಏಳು ಸ್ಪೀಡ್ ಎಸ್ ಟ್ರಾನಿಕ್ ಡ್ಯುಯಲ್ ಕ್ಲಚ್ ಗೇರ್ ಬಾಕ್ಸ್ ನಿಂದ ಎಲ್ಲ ನಾಲ್ಕು ಚಕ್ರಗಳಿಗೆ ಶಕ್ತಿ ರವಾನಿಸಲಿರುವ ಆರ್8, ಶೈಲಿಯ ವಿಚಾರದಲ್ಲೂ ಯಾವುದೇ ರಾಜಿಗೂ ತಯಾರಾಗಿಲ್ಲ.

ಇನ್ನೊಂದೆಡೆ ಆಡಿ ಕ್ಯೂ7 ಕ್ರೀಡಾ ಬಳಕೆಯ ವಾಹನವು 4.2 ಲೀಟರ್ ಡೀಸೆಲ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡುತ್ತಿದ್ದು, 760 ಎನ್ ಎಂ ತಿರುಗುಬಲದಲ್ಲಿ 322 ಅಶ್ವಶಕ್ತಿಯನ್ನು ಉತ್ಪಾದಿಸುತ್ತದೆ.