ಕಾರಿನಲ್ಲೇ ನೆಟ್‌ಫ್ಲಿಕ್ಸ್ ಥಿಯೇಟರ್! ಹುಂಡೈ ಕ್ರೇಟಾ, ಅಲ್ಕಜಾರ್ ಲಾಂಜ್ ಎಡಿಷನ್ ಫೀಚರ್ಸ್ ನೋಡಿ ಶಾಕ್

ಹುಂಡೈ ಸಂಸ್ಥೆಯು ಸೆಪ್ಟೆಂಬರ್ 10 ರಂದು ತನ್ನ ಜನಪ್ರಿಯ ಕ್ರೇಟಾ ಮತ್ತು ಅಲ್ಕಜಾರ್ ಎಸ್‌ಯುವಿಗಳಲ್ಲಿ 11.6-ಇಂಚಿನ ಹಿಂಭಾಗದ ಸೀಟ್ ಸ್ಕ್ರೀನ್‌ಗಳನ್ನು ಕಂಪನಿಯಿಂದಲೇ ಆಳವಡಿಸಿ (ಫ್ಯಾಕ್ಟರಿ ಫಿಟೆಡ್) ಬಿಡುಗಡೆ ಮಾಡಿದೆ. ಈ ಸ್ಕ್ರೀನ್‌ಗಳಲ್ಲಿ ಓಟಿಟಿ ಆಪ್ಸ್ ಸ್ಟ್ರೀಮಿಂಗ್, ಗೇಮಿಂಗ್ ಮತ್ತು ಫೋನ್ ಮಿರರಿಂಗ್ ಸೌಲಭ್ಯಗಳಿವೆ. ಟಾಪ್-ಎಂಡ್ ವೇರಿಯೆಂಟ್ ಆಧಾರಿತ ಈ 'ಲಾಂಜ್ ಎಡಿಷನ್' ಅತ್ಯಲ್ಪ ಹೆಚ್ಚುವರಿ ಬೆಲೆಯಲ್ಲಿ ಸಿಗಲಿದೆ. ಕ್ರೇಟಾ iVT ಲಾಂಜ್ ಎಡಿಷನ್ ಶೋರೂಂ ಬೆಲೆ 19.22 ಲಕ್ಷ ರೂಪಾಯಿಯಾಗಿದ್ದರೆ, ಅಲ್ಕಜಾರ್ ಡೀಸೆಲ್ ಎಟಿ ಲಾಂಜ್ ಬೆಲೆ 21.81 ಲಕ್ಷ ರೂಪಾಯಿ. ಸಾಮಾನ್ಯ ವೇರಿಯೆಂಟ್‌ಗಳಿಗಿಂತ ಇವುಗಳ ಬೆಲೆ ಅಂದಾಜು 53,000 ದಿಂದ 90,000 ರೂಪಾಯಿವರೆಗೆ ಹೆಚ್ಚಿರಲಿದೆ.

ಈ ಎರಡೂ ಎಸ್‌ಯುವಿಗಳಲ್ಲಿ 'ಗೋಲ್ಡನ್ ಬ್ರಾಂಜ್' ಕಸ್ಟಮ್ ಬಣ್ಣ, ಬ್ಲ್ಯಾಕ್‌ಔಟ್ ಟ್ರಿಮ್ ಹಾಗೂ ಸಿಲ್ವರ್ ಟಚ್ ಹೊಂದಿರುವ ಅಕರ್ಷಕ ಕ್ಯಾಬಿನ್ ನೀಡಲಾಗಿದೆ. ಅಲ್ಕಜಾರ್‌ನ ಸಿಗ್ನೇಚರ್ ಡೀಸೆಲ್ ಆಟೋಮ್ಯಾಟಿಕ್ ಆಧಾರದ ಮೇಲೆ ಐದು ಸೀಟ್‌ಗಳ ಲಾಂಜ್ ವಿನ್ಯಾಸ ಪರಿಚಯಿಸಲಾಗಿದೆ. ಇನ್ನು ಕ್ರೇಟಾ ಇವಿ ಲಾಂಜ್ ಎಡಿಷನ್‌ನಲ್ಲಿ ಡ್ಯಾಶ್‌ಕ್ಯಾಮ್ ಮತ್ತು ಹಿಂಭಾಗದ ಸೀಟ್‌ಗೆ ವೈರ್‌ಲೆಸ್ ಚಾರ್ಜರ್ ಸೌಲಭ್ಯವೂ ಇದೆ. ಈ ಹೊಸ ಪ್ಯಾಕೇಜ್ ಭಾರತೀಯ ಗ್ರಾಹಕರಿಗೆ "ವಿಲಾಸಿ ಅನುಭವ, ಕಂಫರ್ಟ್, ಮನರಂಜನೆ ಮತ್ತು ಅಪರೂಪದ ಪ್ರೀಮಿಯಂ ಲುಕ್" ಅನ್ನು ಒಟ್ಟಿಗೆ ನೀಡಲಿದೆ ಎಂದು ಹುಂಡೈ ಸಂಸ್ಥೆಯ ಅಮಿತ್ ಧೌಂಡಿಯಾಲ್ ಹೇಳಿದ್ದಾರೆ.

ಹುಂಡೈ ಲಾಂಜ್ ಎಡಿಷನ್ ಓಟಿಟಿ ರಿಯರ್ ಸ್ಕ್ರೀನ್: ಭಾರತದಲ್ಲಿ ಕಾನೂನು, ಸುರಕ್ಷತೆ ಮತ್ತು ನಿಯಮಗಳು

ಕಾರು ಚಲಿಸುತ್ತಿರುವಾಗ ಓಟಿಟಿ ವೀಡಿಯೋ ನೋಡುವುದು ಕಾನೂನುಬದ್ಧವೇ? ಭಾರತದ ಚಾಲನಾ ನಿಯಮಗಳ ಪ್ರಕಾರ ಕಾರು ಚಾಲನೆ ಮಾಡುವಾಗ ಡ್ರೈವರ್ ವೀಡಿಯೋ ನೋಡುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ. ಆದರೆ ಹಿಂಭಾಗದ ಸೀಟ್‌ನಲ್ಲಿ ಕುಳಿತ ಪ್ರಯಾಣಿಕರು ಸ್ಕ್ರೀನ್ ಬಳಸುವುದಕ್ಕೆ ಯಾವುದೇ ನಿರ್ದಿಷ್ಟ ನಿಷೇಧವಿಲ್ಲ. ಚಾಲಕನಿಗೆ ಕಾಣಿಸುವಂತೆ ಡಿಸ್ಪ್ಲೇ ಇರುವುದನ್ನು ಕೆಲವು ರಾಜ್ಯಗಳಲ್ಲಿ ನಿರ್ಬಂಧಿಸಲಾಗಿದೆ. ಹಾಗಾಗಿ ಕಾರು ಚಲಿಸುವಾಗ ಮುಂಭಾಗದ ಸ್ಕ್ರೀನ್‌ನಲ್ಲಿ ವೀಡಿಯೋ ಪ್ಲೇ ಆಗುವುದಿಲ್ಲ. ನೆನಪಿರಲಿ: "ಗಾಡಿ ಓಡಿಸುವಾಗ ವೀಡಿಯೋ ನೋಡುವುದು ಕಾನೂನುಬಾಹಿರ."

ಹುಂಡೈ ಲಾಂಜ್ ಎಡಿಷನ್ ಆನ್-ರೋಡ್ ಬೆಲೆಗಳು: ಬೆಂಗಳೂರು, ದೆಹಲಿ, ಮುಂಬೈ ವಿವರ

ಲಾಂಜ್ ಎಡಿಷನ್‌ನ ಹೆಚ್ಚುವರಿ ವೆಚ್ಚವನ್ನು ಅಂದಾಜಿಸಲು ನಾವು ಪ್ರಮುಖ ಮೆಟ್ರೋ ನಗರಗಳ ಆನ್-ರೋಡ್ ಬೆಲೆಗಳನ್ನು ಪರಿಶೀಲಿಸಿದ್ದೇವೆ. ಕ್ರೇಟಾ ಕಿಂಗ್ iVT ಮಾದರಿಯ ಆನ್-ರೋಡ್ ಬೆಲೆ ಬೆಂಗಳೂರಿನಲ್ಲಿ 22.99 ಲಕ್ಷ ರೂಪಾಯಿ, ದೆಹಲಿಯಲ್ಲಿ 21.68 ಲಕ್ಷ ರೂಪಾಯಿ ಮತ್ತು ಮುಂಬೈನಲ್ಲಿ 22.06 ಲಕ್ಷ ರೂಪಾಯಿಯಾಗಿದೆ. ಆಯಾ ವೇರಿಯೆಂಟ್‌ಗೆ ಲಾಂಜ್ ಎಡಿಷನ್ ಸೇರಿಸಿದರೆ ಅಂದಾಜು 53,000 ರೂಪಾಯಿ ಹೆಚ್ಚಾಗಲಿದೆ. ಅದೇ ರೀತಿ ಅಲ್ಕಜಾರ್ ಸಿಗ್ನೇಚರ್ ಡೀಸೆಲ್ ಎಟಿ ಆನ್-ರೋಡ್ ಬೆಲೆ ಈ ನಗರಗಳಲ್ಲಿ ಕ್ರಮವಾಗಿ 26.27 ಲಕ್ಷ, 25.11 ಲಕ್ಷ ಮತ್ತು 25.64 ಲಕ್ಷ ರೂಪಾಯಿಯಾಗಿದೆ.

ನಗರ	ಕ್ರೇಟಾ ಲಾಂಜ್ iVT ಆನ್-ರೋಡ್ ಬೆಲೆ (ಅಂದಾಜು)	ಅಲ್ಕಜಾರ್ ಲಾಂಜ್ 5-ಸೀಟರ್ ಆನ್-ರೋಡ್ ಬೆಲೆ (ಅಂದಾಜು)
ಬೆಂಗಳೂರು	~23.5 ಲಕ್ಷ ರೂ.	~27.0–27.2 ಲಕ್ಷ ರೂ.
ದೆಹಲಿ	~22.2 ಲಕ್ಷ ರೂ.	~25.8–26.0 ಲಕ್ಷ ರೂ.
ಮುಂಬೈ	~22.6 ಲಕ್ಷ ರೂ.	~26.3–26.5 ಲಕ್ಷ ರೂ.

ಹುಂಡೈ ಲಾಂಜ್ ಎಡಿಷನ್ ಓಟಿಟಿ ಸ್ಕ್ರೀನ್‌ಗಳು: ಹಾಟ್‌ಸ್ಪಾಟ್, ಸಿಮ್ ಕಾರ್ಡ್ ಮತ್ತು ಇವಿ ಬ್ಯಾಟರಿ ಬಳಕೆ

ಹುಂಡೈ ನೀಡಿರುವ ಮಾಹಿತಿಯ ಪ್ರಕಾರ ಆಪ್-ಸ್ಟೋರ್‌ನಿಂದ ಆಪ್ಸ್ ಡೌನ್‌ಲೋಡ್ ಮಾಡಿ ಸ್ಟ್ರೀಮಿಂಗ್ ಮಾಡಬಹುದು, ಆದರೆ ಕಾರಿನಲ್ಲಿಯೇ ಇನ್-ಬಿಲ್ಟ್ ಇಂಟರ್ನೆಟ್ ಸಿಮ್ ಇರುವ ಬಗ್ಗೆ ಯಾವುದೇ ಉಲ್ಲೇಖವಿಲ್ಲ. ಹಾಗಾಗಿ ನಿಮ್ಮ ಮೊಬೈಲ್ ಹಾಟ್‌ಸ್ಪಾಟ್ ಕನೆಕ್ಟ್ ಮಾಡಿಕೊಳ್ಳಬೇಕಾಗಬಹುದು. ನಿಮ್ಮ ನೆಟ್‌ವರ್ಕ್ ಸ್ಪೀಡ್‌ಗೆ ಅನುಗುಣವಾಗಿ ವೀಡಿಯೋ ಸ್ಟ್ರೀಮಿಂಗ್ ಸಿಗಲಿದೆ. ಕ್ರೇಟಾ ಎಲೆಕ್ಟ್ರಿಕ್ ಆವೃತ್ತಿಯಲ್ಲಿ ಡಿಸ್ಪ್ಲೇ ಬಳಸುವುದರಿಂದ ಬ್ಯಾಟರಿ ವ್ಯಯವಾಗುವುದು ತೀರಾ ಕಡಿಮೆ. ಚಾಲಕನಿಟ್ಟು ಪ್ರಯಾಣಿಸುವ ಕುಟುಂಬಗಳಿಗೆ ದೂರದ ಪ್ರಯಾಣದಲ್ಲಿ ಈ 'ಲಾಂಜ್ ಎಡಿಷನ್' ಉತ್ತಮ ಮನರಂಜನೆ ನೀಡಲಿದೆ. ಒಟ್ಟಿನಲ್ಲಿ ಚಕ್ರಗಳ ಮೇಲೊಂದು ನೆಟ್‌ಫ್ಲಿಕ್ಸ್ ಥಿಯೇಟರ್ ಈಗ ಕಂಪನಿ ಫಿಟ್ಟಿಂಗ್ ಜೊತೆ ಕೈಗೆಟುಕುವಂತಾಗಿದೆ!