ಟೊಯೊಟಾ ಐ-ರೋಡ್ ಎಲೆಕ್ಟ್ರಿಕ್ ಗಾಡಿಗೆ ಗ್ರೀನ್ ಸಿಗ್ನಲ್

ಜೆಟ್ ಫೈಟರ್‌ನಿಂದ ಸ್ಪೂರ್ತಿ ಪಡೆದುಕೊಂಡು ಈ 'ಐ ರೋಡ್' ವಿದ್ಯುತ್ ಚಾಲಿತ ವಾಹನವನ್ನು ರೂಪಿಸಲಾಗಿದೆ. ಸದ್ಯ ಎಂಜಿನಿಯರ್‌ಗಳು ಇದರ ಅಭಿವೃದ್ಧಿಯಲ್ಲಿ ತೊಡಗಿದ್ದಾರೆ.

ನಗರ ಪ್ರದೇಶದ ಸಂಚಾರಕ್ಕೆ ಐ ರೋಡ್ ಉತ್ತಮ ಬದಲಿ ವ್ಯವಸ್ಥೆಯಾಗಿರಲಿದೆ. ಇದು ವಿಪರೀತ ವಾಹನ ದಟ್ಟಣೆಯನ್ನು ಕುಂಠಿತಗೊಳಿಸುವುದಲ್ಲದೆ ಸುಲಭ ಪಾರ್ಕಿಂಗ್‌ಗೆ ವ್ಯವಸ್ಥೆ ಕಲ್ಪಿಸಿಕೊಡಲಿದೆ.

ವೈಯಕ್ತಿಕ ಖಾಸಗಿ ಸಂಚಾರ ವಾಹಕವಾಗಿರುವ ಟೊಯೊಟಾ ಐ ರೋಡ್ ಎಲೆಕ್ಟ್ರಿಕ್ ವಾಹನ, ಎರಡು ಸಾಲುಗಳ ಆಸನ ವ್ಯವಸ್ಥೆಯನ್ನು ಹೊಂದಿರಲಿದೆ.

ಐ ರೋಡ್ ವಿದ್ಯುತ್ ಚಾಲಿತ ವಾಹನದ ಇನ್ನೊಂದು ಪ್ರಮುಖ ಅಂಶವೆಂದರೆ ಇದು ತಿರುವಿನಲ್ಲಿ ಬೈಕ್ ತರಹನೇ ಕೆಲಸ ಮಾಡಲಿದೆ. ಇದಕ್ಕಾಗಿ ಸಸ್ಪೆಷನ್ ವಿಶೇಷ ರೀತಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ.

ಪ್ರಸ್ತುತ 5 ಅಶ್ವಶಕ್ತಿ ಉತ್ಪಾದಿಸುವ ಸಾಮರ್ಥ್ಯ ಹೊಂದಿರುವ ಐರೋಡ್ ಗಂಟೆಗೆ 45 ಕೀ.ಮೀ. ವೇಗದಲ್ಲಿ ಚಲಿಸುವ ಸಾಮರ್ಥ್ಯ ಹೊಂದಿದೆ. ಹಾಗೆಯೇ 50 ಕೀ.ಮೀ. ರೇಂಜ್ ಗುರಿಯಿರಿಸಿಕೊಳ್ಳಲಾಗಿದೆ.

ಜಪಾನ್ ನಗರದಲ್ಲಿ ಸ್ಥಿತಗೊಂಡಿರುವ ಟೊಯೊಟಾ ಸಿಟಿಯಲ್ಲಿ ಕಂಪನಿಯ ಹಾರ್ಮನಿಯಸ್ ಮೊಬಿಲಿಟಿ ನೆಟ್‌ವರ್ಕ್ ಜಾಲದಲ್ಲಿ ಈ ನೂತನ ವಾಹನ ಕೆಲಸ ಮಾಡಲಿದೆ.

ಮೇಲೆ ಉಲ್ಲೇಖಿಸಲಾದ ನಗರದಲ್ಲಿ 2014ರ ವೇಳೆಗೆ 100ರಷ್ಟು ಐ ರೋಡ್ ಯುನಿಟ್‌ಗಳನ್ನು ರಸ್ತೆಗಿಳಿಸುವ ಯೋಜನೆ ಹೊಂದಲಾಗಿದೆ.

ಈ ಮೂರು ಚಕ್ರದ ವಾಹನ 2,350ಎಂಎಂ ಉದ್ದ ಹಾಗೂ 1,445ಎಂಎಂ ಎತ್ತರವಿರಲಿದೆ. ಹಾಗೆಯೇ ಇದರ ವೀಲ್ ಬೇಸ್ 1,700ಎಂಎಂ ಆಗಿರಲಿದೆ.

ಟೊಯೊಟಾದ ಆಟೋಮ್ಯಾಟಿಕ್ ಆಕ್ಟಿವ್ ಲೀನ್ ವ್ಯವಸ್ಥೆಯು ಈ ತಿಚಕ್ರ ಕಾರು ತಿರುವು ಪಡೆಯಲು ನೆರವಾಗಲಿದೆ.

ಎಲೆಕ್ಟ್ರಿಕ್ ವಾಹನವಾಗಿದ್ದರಿಂದ ಸಹಜವಾಗಿಯೇ ಐ-ರೋಡ್ ಹೊಗೆ ಹೊರಸೂಸುವಿಕೆ ಅಂಶ ಶೂನ್ಯವಾಗಿದ್ದು, ಸಂಪೂರ್ಣ ಪರಿಸರ ಸ್ನೇಹಿಯಾಗಿರಲಿದೆ.

ಲಿಥಿಯಂ ಇಯಾನ್ ಬ್ಯಾಟರಿಗಳನ್ನು ಈ ತ್ರಿಚಕ್ರ ಕಾರಿನಲ್ಲಿ ಬಳಸಲಾಗಿದೆ. ಮೂರು ತಾಸುಗಳಷ್ಟು ಚಾರ್ಜ್ ಮಾಡಿದ್ದಲ್ಲಿ 50 ಕೀ. ಮೀ. ತನಕ ಸಂಚರಿಸಲು ಸಾಧ್ಯವಾಗಲಿದೆ.