ದೆಹಲಿಯಿಂದ ಬೆಂಗಳೂರಿಗೆ ತಲುಪಲು ಬರಿ 74 ರುಪಾಯಿ ಇದ್ದರೆ ಸಾಕು!

ಅಮೆರಿಕದಲ್ಲಿ ಡೆಟ್ರಾಯ್ಟ್ ನಲ್ಲಿ ನಡೆದ 10ನೇ ಶೇಲ್ ಇಕೊ ಮ್ಯಾರಥನ್ ನಲ್ಲಿ ಕೆನಡಾದ ಕ್ಯೂಬೆಕ್ ಸಿಟಿಯಲ್ಲಿರುವ ಯುನಿವರ್ಸಿಟಿ ಲವಲ್‌ನ ಅಲೆರಿಯನ್ ಸೂಪರ್ ಮೈಲೇಜ್ ತಂಡವು ಮೊದಲ ಮಾದರಿಯನ್ನು ಪ್ರದರ್ಶಿಸಿದೆ.

'ಸಿಟಿ 2.0' ಎಂದು ಅರಿಲಯಲ್ಪಡುವ ಈ ಮೈಲೇಜ್ ರಾಜ, ಪ್ರತಿ ಲೀಟರ್ ಗೆ 1099 ಕೀ.ಮೀ. ಮೈಲೇಜ್ ನೀಡುವಷ್ಟು ಸಮರ್ಥವಾಗಿದೆ. ಈ ಮೂಲಕ ತನ್ನೆಲ್ಲ ಪ್ರತಿಸ್ಪರ್ಧಿಗಳನ್ನು ಹಿಂದಿಕ್ಕಿದೆ.

ಅಮೆರಿಕ, ಬ್ರೆಜಿಲ್, ಕೆನಡಾ, ಇಕ್ವಾಡೋರ್, ಗ್ವಾಂಟಿಮಾಲಾ, ಮೆಕ್ಸಿಕೊ ಸೇರಿದಂತೆ 123ರಷ್ಟು ತಂಡಗಳು ಶೆಲ್ ಇಕೊ ಮ್ಯಾರಥನ್ ನಲ್ಲಿ ಭಾಗವಹಿಸಿದ್ದವು. ಈಗ ಇವೆಲ್ಲವನ್ನೂ ಹಿಂದಿಕ್ಕುವಲ್ಲಿ ಅಲೆರಿಯನ್ ಸೂಪರ್ ಮೈಲೇಜ್ ತಂಡವು ಯಶ ಕಂಡಿದೆ.

ಸುಸ್ಥಿರ ಭವಿಷ್ಯವನ್ನು ಕಾಪಾಡುವ ನಿಟ್ಟಿನಲ್ಲಿ ವರ್ಷಂಪ್ರತಿ ಶೆಲ್ ಇಕೊ ಮ್ಯಾರಥನ್ ನಲ್ಲಿ ಪರಿಸರ ಸ್ನೇಹಿ ವಾಹನಗಳ ಪರಿಕಲ್ಪನೆಯನ್ನು ಪ್ರದರ್ಶಿಸಲಾಗುತ್ತಿದೆ.

ಹಗುರ ಭಾರದ ಏರೋಡೈನಾಮಿಕ್ ವಿನ್ಯಾಸ ಮತ್ತು 2 ಅಶ್ವಶಕ್ತಿ ಉತ್ಪಾದಿಸುವ ಎಂಜಿನ್ ಇದರಲ್ಲಿ ಬಳಕೆ ಮಾಡಲಾಗಿದೆ.

ಹಾಗಿದ್ದರೂ 2013ರಲ್ಲಿ ಟೊರಂಟೊ ವಿಶ್ವವಿದ್ಯಾಲಯದ ತಂಡವು ಸ್ಥಾಪಿಸಿರುವ ಪ್ರತಿ ಲೀಟರ್ ಗೆ 1354 ಕೀ.ಮೀ. ಕಾರಿನ ದಾಖಲೆಯನ್ನು ಮುರಿಯುವಲ್ಲಿ ಸಿಟಿ 2.0 ವಿಫಲವಾಗಿದೆ.