ಯಮಹಾ ಅಗ್ಗದ ಬೈಕ್, ರೈಡಿಗೆ ರೆಡಿಯಾಗಿ

"ನಗರಗಳಲ್ಲಿ ನಮಗೆ ಅತ್ಯುತ್ತಮ ಮಾರುಕಟ್ಟೆಯಿದೆ. ಆದರೆ ಇಲ್ಲಿ ನಮಗೆ ಪ್ರೀಮಿಯಂ ಬೈಕ್ ಕಂಪನಿಯೆಂಬ ಇಮೇಜ್ ಇದೆ. ಇದೀಗ ನಾವು ಗ್ರಾಮೀಣ ಮಾರುಕಟ್ಟೆಗೆ ಹೆಚ್ಚಿನ ಒತ್ತು ನೀಡಲು ನಿರ್ಧರಿಸಿದ್ದೇವೆ. ಗ್ರಾಮೀಣ ಜನರ ಬಜೆಟಿಗೆ ತಕ್ಕಂತಹ ಬೈಕೊಂದನ್ನು ಹೊರತರಲಿದ್ದೇವೆ" ಎಂದು ಯಮಹಾ ಮೋಟರ್ ಇಂಡಿಯಾದ ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

2010ರಲ್ಲಿ ಯಮಹಾ ಕಂಪನಿಯು ದೇಶದಲ್ಲಿ 3.8 ಲಕ್ಷ ಬೈಕ್ ಮಾರಾಟ ಮಾಡಿತ್ತು. ಈ ವರ್ಷ 5.2 ಲಕ್ಷಕ್ಕಿಂತ ಹೆಚ್ಚು ಬೈಕ್ ಮಾರಾಟ ಮಾಡುವ ಗುರಿಯನ್ನು ಹೊಂದಿದೆ. ಕಂಪನಿಯು ಈಗ ಎಫ್ ಝಡ್, ಫೇಝರ್, ಆರ್15, ಕ್ರಷ್, ವೈಬಿಆರ್ ಮತ್ತು ಎಸ್ ಝಡ್ ಸೀರಿಸ್ ಬೈಕ್ ಮಾರಾಟ ಮಾಡುತ್ತಿದೆ.

ಇದೀಗ ಗ್ರಾಮೀಣ ಪ್ರದೇಶಗಳಲ್ಲಿ ವಾಹನಗಳಿಗೆ ಅತ್ಯಧಿಕ ಬೇಡಿಕೆ ಕಂಡುಬರುತ್ತಿದೆ. ಕಾರು ಕಂಪನಿಗಳು ಕೂಡ ಗ್ರಾಮೀಣ ಪ್ರದೇಶಕ್ಕೆ ಹೆಚ್ಚಿನ ಅಸ್ಥೆ ವಹಿಸುತ್ತಿವೆ. ಯಮಹಾ ಇಂಡಿಯಾ ಒಟ್ಟಾರೆ ವಾಹನ ಮಾರಾಟದಲ್ಲಿ ಶೇಕಡ 40ರಷ್ಟು ಗ್ರಾಮೀಣ ಮಾರುಕಟ್ಟೆಯ ಕೊಡುಗೆಯಾಗಿದೆ. ಇಲ್ಲಿ ಕಡಿಮೆ ದರದ ಬೈಕುಗಳಿಗೆ ಹೆಚ್ಚಿನ ಬೇಡಿಕೆಯಿದೆ.

"ಈಗ ಕಂಪನಿಯು 400 ಡೀಲರುಗಳನ್ನು ಹೊಂದಿದ್ದೇವೆ. ಮುಂದಿನ ದಿನಗಳಲ್ಲಿ ಹೆಚ್ಚಿನ ಡೀಲರ್ಷಿಪ್ ಕೇಂದ್ರಗಳನ್ನು ತೆರೆಯಲಿದ್ದೇವೆ. ಗ್ರಾಮೀಣ ಮಾರುಕಟ್ಟೆಯಲ್ಲಿ ಯಮಹಾ ಕ್ರಷ್ ಗೆ ಹೆಚ್ಚಿನ ಬೇಡಿಕೆಯಿದೆ. ವೈಬಿಆರ್110 ಬೈಕ್ ಕೂಡ ಒಟ್ಟಾರೆ ಮಾರಾಟದಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ" ಎಂದು ಯಮಹಾ ಇಂಡಿಯಾ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಇದೀಗ ಯಮಹಾ ಕಂಪನಿಯು ಕ್ರಷ್ ಬೈಕಿನ ಹೊಸ ಆವೃತ್ತಿ ಹೊರತರಲಿದೆ. ಇದನ್ನು ಗ್ರಾಮೀಣ ಮಾರುಕಟ್ಟೆಗೆ ತಕ್ಕಂತೆ ಪರಿಷ್ಕರಿಸಲು ಕಂಪನಿ ನಿರ್ಧರಿಸಿದೆ. ಇತ್ತೀಚೆಗೆ ಬಜಾಜ್ ಕೂಡ ಬಾಕ್ಸರ್ 150 ಸಿಸಿ ಬೈಕ್ ಹೊರತಂದಿತ್ತು. ಹೆಚ್ಚಿನ ಬೈಕ್ ಕಂಪನಿಗಳು ಗ್ರಾಮೀಣ ರಸ್ತೆಯಲ್ಲಿ ಧೂಳೆಬ್ಬಿಸಲು ಹೆಚ್ಚಿನ ಅಸ್ಥೆ ವಹಿಸುತ್ತಿವೆ.