ವಿದ್ಯಾರ್ಥಿಗಳ ಸಾಧನೆ: 110 ಕಿ. ಮೀ. ಮೈಲೇಜ್ ಬೈಕ್

Published: Tuesday, May 17, 2011, 19:41 [IST]

ಬೆಂಗಳೂರು, ಮೇ 16: ಎಂಜಿನಿಯರಿಂಗ್ ವಿದ್ಯಾರ್ಥಿಗಳಿಗೆ ಅಂತಿಮ ವರ್ಷದಲ್ಲಿ ಪ್ರಾಜೆಕ್ಟ್ ನೀಡಲಿರುತ್ತದೆ. ಅದಕ್ಕೆ ಹಿಂದಿನ ಎರಡು ವರ್ಷದಿಂದಲೇ ತಯಾರಿ ನಡೆಸುತ್ತಾರೆ. ಆದರೆ ಹೆಚ್ಚಿನ ವಿದ್ಯಾರ್ಥಿಗಳು ಕಾಟಾಚಾರಕ್ಕೆ ಏನಾದರೂ ಮಾಡಿಬಿಡುತ್ತಾರೆ. ಆದರೆ ಕೆಲವು ಬುದ್ಧಿವಂತ ವಿದ್ಯಾರ್ಥಿಗಳು ಈ ಅವಕಾಶವನ್ನೇ ಬಳಸಿಕೊಂಡು ವಿನೂತನವಾದದ್ದನ್ನು ಸಂಶೋಧನೆ ಮಾಡುತ್ತಾರೆ. ಇಡೀ ವಿಶ್ವವೇ ಭೇಷ್ ಎನ್ನುವ ಸಾಧನೆ ಮಾಡುತ್ತಾರೆ.

ಬೆಂಗಳೂರಿನ ಎಂಎಸ್ ರಾಮಯ್ಯ ಇನ್ಶೂಟ್ಯೂಟ್ ಆಫ್ ಟೆಕ್ನಾಲಜಿಯ ವಿದ್ಯಾರ್ಥಿಗಳಾದ ನವೀನ್ ಕುಮಾರ್, ಟೋನಿ ಪಾಲ್, ಸಂಜಯ್ ಭೂಷನ್, ನಂದೀಮ್ ಅನ್ವರ್ ಡೀಸಲ್ ಬೈಕೊಂದನ್ನು ಅಭಿವೃದ್ಧಿಪಡಿಸಿದ್ದಾರೆ. ಈ ಬೈಕ್ ಪ್ರತಿ ಲೀಟರ್ ಗೆ ಸುಮಾರು 110 ಕಿ.ಮೀ. ಮೈಲೇಜ್ ನೀಡುತ್ತಿದೆ. ಡಾ. ಎಸ್. ವಿ. ಪ್ರಕಾಶ ಮಾರ್ಗದರ್ಶನದಲ್ಲಿ ಈ ಬೈಕ್ ಅಭಿವೃದ್ಧಿಪಡಿಸಲು ಇವರು ತೆಗೆದುಕೊಂಡ ಸಮಯ ಎರಡು ವರ್ಷ. ಪ್ರಸಕ್ತ ಇಂಧನ ದರ ಏರಿಕೆ ಸಂದರ್ಭದಲ್ಲಿ ಇವರ ಈ ಸಂಶೋಧನೆ ಹೊಸ ಆಶಾದೀಪವಾಗಿ ಕಾಣುತ್ತಿದೆ.

ಪೆಟ್ರೊಲ್ ದರ ಈಗ 70 ರು. ಆಸುಪಾಸಿನಲ್ಲಿದೆ. ಅಂದ್ರೆ ಸುಮಾರು ಶೇ. 65ರಷ್ಟು ಹೆಚ್ಚಾಗಿದೆ. ಡೀಸಲ್ ದರ ಈಗ ಪೆಟ್ರೋಲ್ ಗಿಂತ ಸುಮಾರು 30 ರೂಪಾಯಿ ಕಡಿಮೆಯಿದೆ. ಈ ನೂತನ ಬೈಕ್ ನೀಡೋ ಮೈಲೇಜ್ ಪ್ರತಿಲೀಟರ್ ಗೆ ಸುಮಾರು 110 ಕಿ.ಮೀ. ಅಂದ್ರೆ ಮಾಮೂಲಿ ಪೆಟ್ರೋಲ್ ಬೈಕ್ ಗಿಂತ ಎರಡು ಪಟ್ಟು ಹೆಚ್ಚು. ಆಟೋಮ್ಯಾಟಿಕ್ ಗೇರ್ ಮತ್ತು ಕ್ಲಚ್ ಹೊಂದಿರುವ ಡೀಸಲ್ ಎಂಜಿನ್ ಚಾಲೀತ ದೇಶದ ಮೊದಲ ಬೈಕೆಂಬ ಖ್ಯಾತಿಯೂ ಈ ವಿದ್ಯಾರ್ಥಿಗಳ ಪಾಲಾಗಿದೆ.

ಇವರ ಬೈಕ್ ಇಂಧನ ದಕ್ಷತೆಯಿಂದ ಪ್ರತಿಕಿ,ಮೀ ಪ್ರಯಾಣಕ್ಕೆ ತಗಲುವ ವೆಚ್ಚ ಕೇವಲ 40 ಪೈಸೆ ಅಷ್ಟೇ. ಕೈನಟಿಕ್ ಬ್ಲೇಜ್ ಬೈಕ್ ನ ಚಾಸೀಸ್, ರಾಯಲ್ ಎನ್ ಫೀಲ್ಡ್ 350 ಸಿಸಿ ಪೆಟ್ರೊಲ್ ಬೈಕ್ ನ ಎಂಜಿನ್ ಬಳಸಿ ಈ ಬೈಕ್ ನಿರ್ಮಿಸಿದ್ದಾರೆ. ಇದು ಇತರ ಡೀಸಲ್ ವಾಹನಗಳಿಗೆ ಹೋಲಿಸಿದರೆ ಕಡಿಮೆ ಪರಿಸರ ಮಾಲಿನ್ಯ ಉಂಟು ಮಾಡುತ್ತಾರೆ ಎಂದು ಈ ವಿದ್ಯಾರ್ಥಿಗಳು ಹೇಳುತ್ತಾರೆ.