ಹೀರೊ-ಹೋಂಡಾ ಮೈಲೇಜ್ ವಾರ್; ಸ್ಪ್ಲೆಂಡರ್ ಮೈಲೇಜ್ ಸುಳ್ಳು?

ನಿಮಗೆಲ್ಲರಿಗೂ ತಿಳಿದಿರುವಂತೆಯೇ ದೇಶದ ದ್ವಿಚಕ್ರ ವಾಹನ ಮಾರಾಟದ ಭವಿಷ್ಯವನ್ನೇ ಬದಲಾಯಿಸಿದ್ದ ಸ್ಪ್ಲೆಂಡರ್, ತನ್ನ ಮೈಲೇಜ್ ಶಕ್ತಿಯಿಂದಲೇ ಅತಿ ಹೆಚ್ಚು ಮಾರಾಟ ಗಿಟ್ಟಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿತ್ತು.

1994ನೇ ಇಸವಿಯಲ್ಲಿ ಮೊದಲ ಬಾರಿಗೆ ಪರಿಚಯವಾಗಿದ್ದ ಹೀರೊದ ಈ ಮೈಲೇಜ್ ಬೈಕ್ ಯಶಸ್ಸಿನಲ್ಲಿ ಹೋಂಡಾದ ಮೂಲ ಎಂಜಿನ್ ನ ಪಾತ್ರ ಬಹು ದೊಡ್ಡದಾಗಿತ್ತು. ಈಗ ಇಂತಹದೊಂದು ಆರೋಪದೊಂದಿಗೆ ಸಂಸ್ಥೆ ಮುಂದೆ ಬಂದಿದೆ.

ಇತ್ತೀಚೆಗಷ್ಟೇ ದೇಶದ ಅತಿ ಹೆಚ್ಚು ಮೈಲೇಜ್ ನೀಡುವ ಬೈಕ್ ಎಂಬ ಗೌರವಕ್ಕೆ ಪಾತ್ರವಾಗಿದ್ದ ಸ್ಪ್ಮೆಂಡರ್ ಐ ಸ್ಮಾರ್ಟ್ ಪ್ರತಿ ಲೀಟರ್ ಗೆ 102.5 ಕೀ.ಮೀ. ಮೈಲೇಜ್ ನೀಡುವ ಸಾಮರ್ಥ್ಯ ಹೊಂದಿದೆ ಎಂಬುದನ್ನು ಹೀರೊ ಘೋಷಿಸಿತ್ತು.

ಇದುವೇ ವಿವಾದಕ್ಕೆ ಕಾರಣವಾಗಿದ್ದು, ಇದರ ವಿರುದ್ಧ ಹೋಂಡಾ ರಂಗಕ್ಕಿಳಿದಿದೆ. ಅಲ್ಲದೆ ಹೀರೊ ಸಂಸ್ಥೆಯು ಅಪಪ್ರಚಾರವನ್ನು ನಿಲ್ಲಿಸಬೇಕು ಎಂದು ಅಭಿಪ್ರಾಯಪಟ್ಟಿದೆ.

ಈ ಬಗ್ಗೆ ಹೇಳಿಕೆ ಕೊಟ್ಟಿರುವ ಹೋಂಡಾ ಭಾರತದ ಅಧ್ಯಯನ ಹಾಗೂ ಅಭಿವೃದ್ಧಿ ಕೇಂದ್ರ (ಎಚ್ ಆರ್ ಐಡಿ) ನಿರ್ದೇಶಕ ಹಾಗೂ ಸಿಇಒ ಆಗಿರುವ ಕೀಜಿ ಕಸ ಅವರು, "ಇಂತಹ ಹೇಳಿಕೆಗಳು ವಾಸ್ತವದಿಂದ ತುಂಬಾ ದೂರವಾಗಿದ್ದು, ಸತ್ಯಾಂಶ ಏನೆಂದರೆ ಪ್ರಸ್ತುತ ಬೇಸಿಕ್ ಎಂಜಿನ್ ಅನ್ನು ಹೋಂಡಾ ಸಂಸ್ಥೆಯೇ ಅಭಿವೃದ್ಧಿಪಡಿಸಿದ್ದು, ನಿರ್ವಹಣೆ ಹಾಗೂ ಸಾಮರ್ಥ್ಯದ ಬಗ್ಗೆ ವಾಸ್ತವಿಕ ಮೌಲ್ಯಮಾಪನವನ್ನು ನಾವು ಅರ್ಥ ಮಾಡಿಕೊಳ್ಳಬೇಕಾದ ಅಗತ್ಯವಿದೆ" ಎಂದಿದ್ದಾರೆ.

ಅದೇ ವೇಳೆ ಒಂದು ಹಂತದ ವರೆಗೆ ಐಡಲ್ ಸ್ಟಾರ್ಟ್ ಸ್ಟಾಪ್ ವ್ಯವಸ್ಥೆಯು ಹೀರೊ ಸ್ಪ್ಲೆಂಡರ್ ಮೈಲೇಜ್ ನಲ್ಲಿ ಸುಧಾರಣೆ ತರಲು ಸಾಧ್ಯ ಎಂಬುದನ್ನು ಒಪ್ಪಿಕೊಂಡಿರುವ ಹೋಂಡಾ, ಹಾಗಿದ್ದರೂ 102.5 ಮೈಲೇಜ್ ನೀಡುವುದು ಕಷ್ಟಸಾಧ್ಯ ಎಂದಿದೆ.

ಇನ್ನೊಂದೆಡೆ ಕೇಂದ್ರ ಸರಕಾರದ ಇಂಟರ್ ನ್ಯಾಷನಲ್ ಸೆಂಟರ್ ಆಫ್ ಆಟೋಮೋಟಿವ್ ಟೆಕ್ನಾಲಜಿ (ಐಸಿಎಟಿ) ನೀಡಿರುವ ಇಂಧನ ದಕ್ಷತೆ (ಎಫ್ ಇ) ಪ್ರಮಾಣ ಪತ್ರವನ್ನು ಸಮರ್ಥಿಸಿಕೊಂಡಿರುವ ಹೀರೊ, ಎಂಜಿನ್ ಸ್ಟಾರ್ಟ್ ಸ್ಟಾಪ್ ಐ3ಎಸ್ ಜೊತೆಗೆ ಇನ್ನಿತರ ತಂತ್ರಗಾರಿಕೆಗಳು ಮೈಲೇಜ್ ಸುಧಾರಣೆಗೆ ನೆರವಾಗಿದೆ ಎಂದು ಸಮರ್ಥಿಸಿಕೊಂಡಿದೆ.

ಎಷ್ಟೇ ಆದರೂ ಭಾರತೀಯ ವಾಹನ ಅಧ್ಯಯನ ಸಂಸ್ಥೆ (ಎಆರ್ ಎಐ) ನೀಡುವ ಅಧಿಕೃತ ಇಂಧನ ದಕ್ಷತೆ ಮಾನ್ಯತೆಗೂ ನೈಜ ರಸ್ತೆ ಪರಿಸ್ಥಿತಿಗೆ ತುಂಬಾನೇ ವ್ಯತ್ಯಾಸವಿರುತ್ತದೆ. ಇದು ಚಾಲಕನೊಬ್ಬನ ಚಾಲನಾ ಸ್ವಭಾವ, ರಸ್ತೆ, ಟ್ರಾಫಿಕ್ ಪರಿಸ್ಥಿತಿ, ಇಂಧನ ಗುಣಮಟ್ಟತೆ, ನಿರ್ವಹಣೆ, ಭಾರ ಜೊತೆಗೆ ಇನ್ನಿತರ ಹಲವು ಅಂಶಗಳ ಮೇಲೆ ಅವಲಂಬಿತವಾಗಿರುತ್ತದೆ.

ಅಂದ ಹಾಗೆ ಎಂಜಿನ್ ಸ್ಟಾರ್ಟ್ ಸ್ಟಾಪ್ ಐ3ಎಸ್ ತಂತ್ರಗಾರಿಕೆಯ ಸ್ಪ್ಲೆಂಡರ್ ಐಸ್ಮಾರ್ಟ್ ಬೈಕ್ ಕಳೆದ ವರ್ಷ ಮಾರುಕಟ್ಟೆಗೆ ಎಂಟ್ರಿ ಕೊಟ್ಟಿತ್ತು. ಇದರ 97.2 ಸಿಸಿ ಏರ್ ಕೂಲ್ಡ್, 4 ಸ್ಟ್ರೋಕ್ ಎಂಜಿನ್ ಸಿಲಿಂಡರ್ ಒಎಚ್ ಸಿ ಎಂಜಿನ್ 7.8 ಅಶ್ವಶಕ್ತಿ (8.04 ತಿರುಗುಬಲ) ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ.

ಏನಿದು ಐಡಲ್ ಸ್ಟಾರ್ಟ್-ಸ್ಟಾಪ್ (ಐ3ಎಸ್) ?

ಟ್ರಾಫಿಕ್ ಮುಂತಾದ ಪ್ರದೇಶಗಳಲ್ಲಿ ಇಂಧನ ಉಳಿತಾಯ ನಿಟ್ಟಿನಲ್ಲಿ ಐಡಲ್ ಸ್ಟಾರ್ಟ್-ಸ್ಟಾಪ್ ತಂತ್ರಗಾರಿಕೆಯನ್ನು ಬಳಕೆ ಮಾಡಲಾಗುತ್ತದೆ. ಕಾರುಗಳಲ್ಲಿ ಸ್ಟಾರ್ಟ್-ಸ್ಟಾಪ್ ತಂತ್ರಜ್ಞಾನವು ಸಾಮಾನ್ಯವಾಗಿದೆ. ಇದು ಸ್ವಯಂಚಾಲಿತವಾಗಿ ಕೆಲಸ ಮಾಡಲಿದ್ದು, ಕ್ಲಚ್ ಅದುಮಿದರೆ ವಾಹನದ ಎಂಜಿನ್ ನಿಧಾನವಾಗಿ ಚಲಿಸಲು ಬಿಡಲಿದೆ.