ಅಮೆರಿಕದ ಐಕಾನಿಕ್ ಹಾರ್ಲೆಯಿಂದ ಚೊಚ್ಚಲ ಎಲೆಕ್ಟ್ರಿಕ್ ಬೈಕ್

ನಿಮ್ಮ ಮಾಹಿತಿಗಾಗಿ, ಕೆಲವು ವರ್ಷಗಳ ಹಿಂದೆಯಷ್ಟೇ ಹಾರ್ಲೆ ಡೇವಿಡ್ಸನ್, ಲೈವ್ ವೈರ್ ಎಲೆಕ್ಟ್ರಿಕ್ ಮೋಟಾರ್ ಸೈಕಲ್ ಯೋಜನೆಯನ್ನು ಪರಿಚಯಿಸಿತ್ತು.

ಈಗ ಬಂದಿರುವ ತಾಜಾ ಮಾಹಿತಿಗಳ ಪ್ರಕಾರ 2020ರ ವೇಳೆಯಾಗುವಾಗ ಹಾರ್ಲೆ ಎಲೆಕ್ಟ್ರಿಕ್ ಬೈಕ್ ಗಳು ನಿರ್ಮಾಣ ಹಂತವನ್ನು ತಲುಪಲಿದೆ.

ಯಾವತ್ತೂ ಗರಿಷ್ಠ ನಿರ್ವಹಣಾ ಸಾಮರ್ಥ್ಯದ ಕ್ರೂಸರ್ ಮೋಟಾರ್ ಸೈಕಲ್ ನಿರ್ಮಾಣದಲ್ಲಿ ಗಮನ ಕೇಂದ್ರಿಕರಿಸಿರುವ ಹಾರ್ಲೆ ಈಗ ಎಲೆಕ್ಟ್ರಿಕ್ ವಿಭಾಗದಲ್ಲೂ ಯಶಸ್ವಿ ಸಾಧಿಸಿತೇ ಎಂಬುದು ಕುತೂಹಲವೆನಿಸಿದೆ.

ತನ್ನ ಪ್ರತಿಸ್ಪರ್ಧಿ ವಿಕ್ಟರಿ ಮೋಟಾರ್ ಸೈಕಲ್ ವಿದ್ಯುತ್ ಚಾಲಿತ ಎಲೆಕ್ಟ್ರಿಕ್ ಬೈಕ್ ಗಳ ನಿರ್ಮಾಣದ ಬೆನ್ನಲ್ಲೇ ಹಾರ್ಲೆಯ ಈ ಮಹತ್ವದ ಘೋಷಣೆ ಹೊರಬಂದಿದೆ.

ವಿಕ್ಟರಿ ಮೋಟಾರ್ ಸೈಕಲ್ಸ್ ಈಗಾಗಲೇ ಇಸ್ಲೆ ಆಫ್ ಮ್ಯಾನ್ ಟಿಟಿ ಮತ್ತು ಪೈಕ್ಸ್ ಪೀಕ್ ಇಂಟರ್ ನ್ಯಾಷನಲ್ ಹಿಲ್ ಕ್ಲೈಂಬ್ ಕಾರ್ಯಕ್ರಮಗಳಲ್ಲಿ ತನ್ನ ಎಲೆಕ್ಟ್ರಿಕ್ ಕಾನ್ಸೆಪ್ಟ್ ಗಳನ್ನು ಪ್ರದರ್ಶಿಸಿದೆ.

ಲೈವ್ ವೈರ್ ನಿರ್ಮಾಣ ವೆಚ್ಚ ಹೆಚ್ಚಾಗಿರುವುದು ಹಾರ್ಲೆ ಯೋಜನೆಗಳಿಗೆ ತೊಡಕುಂಟಾಗಿತ್ತು. ಒಂದು ಇಂತಹ ಉತ್ಪನ್ನ ನಿರ್ಮಿಸಲು ಸರಿ ಸುಮಾರು 33.4 ಲಕ್ಷ ರು.ಗಳಷ್ಟು ಖರ್ಚು ತಗಲುತ್ತದೆ. ಇದು ಸಾಂಪ್ರದಾಯಿಕ ಆಂತರಿಕ ದಹನಕಾರಿ ಮೋಟಾರ್ ಸೈಕಲ್ ಗಿಂತಲೂ ದುಂದು ವೆಚ್ಚವಾಗಿದೆ.

ಹಾರ್ಲೆ ಅನುಭವಿಸಿದ ಮಗದೊಂದು ಹಿನ್ನಡೆಯೆಂದರೆ ಇದರ ಬ್ಯಾಟರಿ 80 ಕೀ.ಮೀ. ವ್ಯಾಪ್ತಿಯಷ್ಟು ಮಾತ್ರ ಸಾಮರ್ಥ್ಯ ಹೊಂದಿತ್ತು. ನಿರ್ಮಾಣ ಆವೃತ್ತಿಗೂ ಮುನ್ನ ಇದನ್ನು ದ್ವಿಗುಣಗೊಳಿಸುವುದು ಸಂಸ್ಥೆ ಯೋಜನೆಯಾಗಿದೆ.

ಮೂರು ಹಂತದ ಇಂಡಕ್ಷನ್ ಮೋಟಾರುನಿಂದ ನಿಯಂತ್ರಿಸಲ್ಪಡುವ ಹಾರ್ಲೆ ಡೇವಿಡ್ಸನ್ ಲೈವ್ ವೈರ್ ಮೋಟಾರ್ ಸೈಕಲ್, 71 ಎನ್ ಎಂ ತಿರುಗುಬಲದಲ್ಲಿ 75 ಅಶ್ವಶಕ್ತಿ ಉತ್ಪಾದಿಸುವಷ್ಟ ಸಾಮರ್ಥ್ಯ ಹೊಂದಿದೆ.

ಒಟ್ಟಾರೆಯಾಗಿ ಜಪಾನ್ ಅಥವಾ ಯುರೋಪ್ ಮೂಲದ ಸಂಸ್ಥೆಗಳು ಎಲೆಕ್ಟ್ರಿಕ್ ಕಾನ್ಸೆಪ್ಟ್ ನೊಂದಿಗೆ ಹೊರ ಬರುವ ಮುನ್ನವೇ ವಿದ್ಯುತ್ ಚಾಲಿತ ಬೈಕ್ ಗಳನ್ನು ಪರಿಚಯಿಸುವುದು ಹಾರ್ಲೆ ಉದ್ದೇಶವಾಗಿದೆ. ಈ ಮುಖಾಂತರ ತನ್ನ ಪ್ರತಿಷ್ಠೆಯನ್ನು ಉಳಿಸಿಕೊಳ್ಳುವ ಇರಾದೆಯಲ್ಲಿದೆ.