ಹೋಂಡಾ ಸಿಬಿ ಹಾರ್ನೆಟ್ 160ಆರ್ ವಿಶೇಷ ಆವೃತ್ತಿ ಬಿಡುಗಡೆ

ಹೋಂಡಾ ಸಿಬಿ ಹಾರ್ನೆಟ್ 160ಆರ್ ಆಕರ್ಷಕ ಬಣ್ಣಗಳು ಮಾತ್ರವಲ್ಲದೆ ವಿಶಿಷ್ಟ ಬಾಡಿ ಗ್ರಾಫಿಕ್ಸ್ ಕೂಡಾ ಇರಲಿದೆ. ಇದು ಬೈಕ್ ಪ್ರೇಮಿಗಳಲ್ಲಿ ಹೆಚ್ಚಿನ ಉತ್ಸಾಹವನ್ನು ಮೂಡಿಸಲಿದೆ.

ಹೋಂಡಾ ಸಿಬಿ ಹಾರ್ನೆಟ್ 160ಆರ್ ಸ್ಟ್ಯಾಂಡರ್ಡ್ ಹಾಗೂ ಸಿಬಿಎಸ್ ಆವೃತ್ತಿಗಳು ದೆಹಲಿ ಎಕ್ಸ್ ಶೋ ರೂಂ ಬೆಲೆಯ ಪ್ರಕಾರ ಅನುಕ್ರಮವಾಗಿ 81,413 ಹಾಗೂ 85,912 ರುಪಾಯಿಗಳಷ್ಟು ದುಬಾರಿಯೆನಿಸಲಿದೆ.

ಕಳೆದ ವರ್ಷ ಮಾರುಕಟ್ಟೆಗೆ ಪ್ರವೇಶಿಸಿರುವ ಹೋಂಡಾ ಸಿಬಿ ಹಾರ್ನೆಟ್ 160ಆರ್ ಬೈಕ್, ಬಜಾಜ್ ಪಲ್ಸರ್ 150, ಯಮಹಾ ಎಫ್ ಝಡ್-ಎಸ್ ವರ್ಷನ್ 2.0 ಹಾಗೂ ಸುಜುಕಿ ಜಿಕ್ಸರ್ ಮುಂತಾದ ಬೈಕ್ ಗಳಿಗೆ ಪೈಪೋಟಿಯನ್ನು ಒಡ್ಡುತ್ತಿದೆ.

ಹೊಸ ಅಂದ ಚಂದದಿಂದ ಗೋಚರಿಸುವ ಹೋಂಡಾ ಸಿಬಿ ಹಾರ್ನೆಟ್ 160ಆರ್, ಎಲ್ಲ ಕಪ್ಪು ವರ್ಣದ ಥೀಮ್ ಜೊತೆಗೆ ವಿಶೇಷ ಆವೃತ್ತಿಯ ಸ್ಟ್ರೈಕಿಂಗ್ ಗ್ರೀನ್ ಹಾಗೂ ಮಾರ್ಸ್ ಆರಂಜ್ ಬಣ್ಣಗಳನ್ನು ಗಿಟ್ಟಿಸಿಕೊಂಡಿದೆ.

ಸೆಲ್ಫ್ ಬಾಡಿ ಗ್ರಾಫಿಕ್ಸ್ ಮತ್ತು ಅಲಾಯ್ ಚಕ್ರಗಳಲ್ಲಿ ದೇಹ ಬಣ್ಣಕ್ಕೆ ತಕ್ಕುದಾದ ಪಟ್ಟಿಯನ್ನು ಕಾಣಬಹುದಾಗಿದೆ. ಇನ್ನುಳಿದಂತೆ ಬ್ಲ್ಯಾಕ್ ಫಿನಿಶ್ ಅಂಡರ್ ಸೀಟು ಪ್ಯಾನೆಲ್, ಗ್ರಾಬ್ ರೈಲ್, ಬದಿಯಲ್ಲಿ ಏರ್ ಸ್ಕೂಪ್ ಮತ್ತು ಎಕ್ಸಾಸ್ಟ್ ಮಫ್ಲರ್ ಹೀಟ್ ಕವರ್ ಗಳಿರಲಿದೆ. ಅಂತೆಯೇ ಐಚ್ಛಿಕ ಸಿಲ್ವರ್ ಸ್ಟ್ರಿಪ್ ಗಳ ಆಯ್ಕೆಯೂ ಇರುತ್ತದೆ.

162.71 ಸಿಸಿ ಸಿಂಗಲ್ ಸಿಲಿಂಡರ್ ಏರ್ ಕೂಲ್ಡ್ ಎಂಜಿನ್ ನಿಂದ ನಿಯಂತ್ರಿಸಲ್ಪಡುವ ಹೋಂಡಾ ಸಿಬಿ ಹಾರ್ನೆಟ್ 160 ಆರ್, 14.76 ಎನ್ ಎಂ ತಿರುಗುಬಲದಲ್ಲಿ 15.6 ಅಶ್ವಶಕ್ತಿಯನ್ನು ಉತ್ಪಾದಿಸಲಿದೆ. ಇದು 5 ಸ್ಪೀಡ್ ಮ್ಯಾನುವಲ್ ಗೇರ್ ಬಾಕ್ಸ್ ಸಹ ಪಡೆದಿದೆ.

ಟೆಲಿಸ್ಕಾಪಿಕ್ ಫ್ರಂಟ್ ಫಾರ್ಕ್ ಹಾಗೂ ಮೊನೊಶಾಕ್ ರಿಯರ್ ಸಸ್ಪೆನ್ಷನ್, ಡ್ಯುಯಲ್ ಡಿಸ್ಕ್ ಬ್ರೇಕ್ ಜೊತೆ ಕಾಂಬಿ ಬ್ರೇಕಿಂಗ್ ವ್ಯವಸ್ಥೆಯನ್ನು ಪಡೆದಿದೆ. ಇನ್ನು ಸ್ಟ್ಯಾಂಡರ್ಡ್ ವೆರಿಯಂಟ್ ನಲ್ಲಿ ಡ್ರಮ್ ಬ್ರೇಕ್ ಸಹ ಇರುತ್ತದೆ.

ವೈಶಿಷ್ಟ್ಯಗಳ ಬಗ್ಗೆ ಮಾತನಾಡುವುದಾದ್ದಲ್ಲಿ ಸಂಪೂರ್ಣ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕನ್ಸಾಲ್, ಎಕ್ಸ್ ಆಕಾರದ ಎಲ್ ಇಡಿ ಟೈಲ್ ಲೈಟ್, ಹಿಂದುಗಡೆ ಅಗಲವಾದ ಚಕ್ರ, ಶಕ್ತಿಯುತ ಟ್ಯಾಂಕ್ ಇತ್ಯಾದಿ ವಿಶೇಷತೆಗಳನ್ನು ಪಡೆದಿದೆ.