ಬ್ಯಾಟರಿ ಸ್ಪೋಟ: ಗ್ರಾಹಕರಿಂದ 2 ಸಾವಿರ ಇವಿ ಸ್ಕೂಟರ್‌ಗಳನ್ನು ಹಿಂಪಡೆಯಲು ಪ್ಯೂರ್ ಇವಿ ನಿರ್ಧಾರ

ಇತ್ತೀಚೆಗೆ ಒಕಿನಾವಾ ಕಂಪನಿ ಕೂಡ ಗ್ರಾಹಕರ ನಂಬಿಕೆ ಉಳಿಸಿಕೊಳ್ಳಲು, ಇತ್ತೀಚೆಗೆ ತನ್ನ ಎಲೆಕ್ಟ್ರಿಕ್ ಸ್ಕೂಟರ್‌ಗೆ ಬೆಂಕಿ ಹೊತ್ತಿಕೊಂಡ ನಂತರ ಪ್ರೈಸ್ ಪ್ರೊ ಇ-ಸ್ಕೂಟರ್‌ನ 3,215 ಯುನಿಟ್‌ಗಳನ್ನು ಹಿಂಪಡೆದಿದೆ. ಗ್ರಾಹಕರ ಭೀತಿಯನ್ನು ಹೋಗಲಾಡಿಸಿ ಗುಣಮಟ್ಟದ ಉತ್ಪನ್ನಗಳನ್ನು ಬಿಡುಗಡೆ ಮಾಡುವುದಾಗಿ ತಿಳಿಸಿದೆ.

ಇದೀಗ ಪ್ಯೂರ್ ಇವಿ ಕಂಪನಿ ಕೂಡ ತನ್ನ ವಾಹನಗಳನ್ನು ಹಿಂಪಡಿಯಲು ಮುಂದಾಗಿದೆ. ತೆಲಂಗಾಣದ ನಿಜಾಮಾಬಾದ್ ಮತ್ತು ಚೆನ್ನೈನಲ್ಲಿ ತನ್ನ ಸ್ಕೂಟರ್‌ಗಳಲ್ಲಿ ಬೆಂಕಿ ಕಾಣಿಸಿಕೊಂಡ ಘಟನೆಗಳ ಹಿನ್ನೆಲೆಯಲ್ಲಿ ಎಲೆಕ್ಟ್ರಿಕ್ ಸ್ಕೂಟರ್ ತಯಾರಕ ಪ್ಯೂರ್ ಇವಿ ತನ್ನ ಮಾದರಿಗಳಾದ ಇಟ್ರಾನ್ಸ್ ಪ್ಲಸ್ ಮತ್ತು ಇಪ್ಲುಟೋ 7ಜಿಯ ಸುಮಾರು 2,000 ಯುನಿಟ್‌ಗಳನ್ನು ಹಿಂಪಡೆಯಲು ನಿರ್ಧರಿಸಿದೆ.

ನಿಜಾಮಾಬಾದ್ ಘಟನೆಯಲ್ಲಿ ಸ್ಕೂಟರ್ ಬ್ಯಾಟರಿ ಸ್ಫೋಟಗೊಂಡು 80 ವರ್ಷದ ವ್ಯಕ್ತಿಯೊಬ್ಬರು ಸಾವನ್ನಪ್ಪಿದ್ದರು. ಈ ಘಟನೆ ದೇಶಾದ್ಯಂತ ಭಾರೀ ಚರ್ಚೆಗೆ ಗ್ರಾಸವಾಗಿತ್ತು. ಇದರಿಂದ ಎಚ್ಚೆತ ಪ್ಯೂರ್ ಇವಿ ಈ ಬಗ್ಗೆ ಹೇಳಿಕೆಯೊಂದನ್ನು ಬಿಡುಗಡೆ ಮಾಡಿದ್ದು, ವಾಹನಗಳು ಮತ್ತು ಬ್ಯಾಟರಿಗಳು ಮತ್ತೊಮ್ಮೆ ಸಂಪೂರ್ಣ ತಪಾಸಣೆಗೆ ಒಳಗಾಗಬೇಕಿದೆ.

ವಾಹನದ ಲೋಪದೋಷಗಳು ಹಾಗೂ ಬ್ಯಾಟರಿಯನ್ನು ಪರಿಶೀಲಿಸುತ್ತೇವೆ. ನಮ್ಮ ಸಾಧನವಾದ ಮ್ಯಾಟ್ರಿಕ್ಸ್ ಫ್ಯಾರಡೆ ಮೂಲಕ ಈ ಪರಿಶೀಲನೆ ನಡೆಯಲಿದೆ. ಫ್ಯಾರಡೆ ಎಂಬುದು ಒಂದು ರೀತಿಯ ಎಐ-ಆಧಾರಿತ ಹಾರ್ಡ್‌ವೇರ್ ಆಗಿದ್ದು, ಇದು ಸ್ವಯಂಚಾಲಿತವಾಗಿ ಲಿ-ಅಯಾನ್ ಬ್ಯಾಟರಿಗಳಲ್ಲಿನ ದೋಷಗಳನ್ನು ಗುರುತಿಸಲು ಮತ್ತು ಸರಿಪಡಿಸಲು ಕೆಲಸ ಮಾಡುತ್ತದೆ.

ಇದು ನಮ್ಮ ಎಲ್ಲಾ ಮಾದರಿಗಳ ಸಮಾರ್ಥ್ಯ ಮತ್ತು ಬ್ಯಾಟರಿ ದಕ್ಷತೆಯನ್ನು ಪರಿಸೀಲಿಸುತ್ತದೆ. ಈ ಮೂಲಕ ಹೆಚ್ಚುವರಿಯಾಗಿ ಬಿಎಂಎಸ್ ಮತ್ತು ಚಾರ್ಜರ್ ಕ್ಯಾಲಿಬ್ರೇಷನ್ ಅನ್ನು ಅಗತ್ಯಕ್ಕೆ ಅನುಗುಣವಾಗಿ ಮಾಡಲಾಗುವುದು ಎಂದು ಕಂಪನಿ ಹೇಳಿದೆ. "

"ಕಂಪನಿಯು ಡೀಲರ್‌ಶಿಪ್ ನೆಟ್ವರ್ಕ್ ಮೂಲಕ ಎಲ್ಲಾ ಗ್ರಾಹಕರನ್ನು ತಲುಪಲಿದೆ. ಅಲ್ಲದೇ ಎಲ್ಲಾ ಮಧ್ಯಸ್ಥಗಾರರ ಸಹಕಾರದಿಂದ ವಾಹನಗಳ ತಪಾಸಣೆಗಾಗಿ ತ್ವರಿತ ಚಾಲನೆಯನ್ನು ನೀಡಲಿದ್ದೇವೆ" ಎಂದು ಹೇಳಿಕೆಯಲ್ಲಿ ತಿಳಿಸಿದೆ. ತೆಲಂಗಾಣದ ನಿಜಾಮಾಬಾದ್ ಜಿಲ್ಲೆಯಲ್ಲಿ ಬುಧವಾರ ವಾಹನದಲ್ಲಿ ಬ್ಯಾಟರಿ ಸ್ಫೋಟಗೊಂಡ ಘಟನೆ ವರದಿಯಾಗಿತ್ತು.

ಈ ಘಟನೆಯಲ್ಲಿ, ಎಲೆಕ್ಟ್ರಿಕ್ ಸ್ಕೂಟರ್‌ನ ಮಾಲೀಕರಾದ ಬಿ.ರಾಮಸ್ವಾಮಿ ಚಾರ್ಜ್ ಮಾಡುವ ಸಮಯದಲ್ಲಿ, ಸ್ಕೂಟರ್‌ನ ಬ್ಯಾಟರಿ ಸ್ಫೋಟಗೊಂಡಿದ್ದರಿಂದ 80 ವರ್ಷದ ವೃದ್ಧ ತಮ್ಮ ಜೀವವನ್ನು ಕಳೆದುಕೊಂಡಿದ್ದರು. ಜೊತೆಗೆ ಕುಟುಂಬದ ನಾಲ್ವರಿಗೆ ಬೆಂಕಿ ತಗುಲಿ ಆಸ್ಪತ್ರೆ ಪಾಲಾಗಿದ್ದರು.

ಈ ಕುಟುಂಬದವರು ಕಳೆದ ಒಂದು ವರ್ಷದಿಂದ ಪ್ಯೂರ್ ಇವಿ ಸ್ಕೂಟರ್ ಅನ್ನು ಬಳಸುತ್ತಿದ್ದರು. ಬಿ.ರಾಮಸ್ವಾಮಿ ಅವರ ಮರಣದ ನಂತರ ಸಂತ್ರಸ್ತ ಕುಟುಂಬ ತಂದೆಯ ಸಾವಿಗೆ ಎಲೆಕ್ಟ್ರಿಕ್ ಸ್ಕೂಟರ್ ಬ್ಯಾಟರಿಗಳ "ಕಳಪೆ ಗುಣಮಟ್ಟ" ಕಾರಣ ಎಂದು ಆರೋಪಿಸಿದರು.

ಘಟನೆಯ ನಂತರ, ನಿಜಾಮಾಬಾದ್ ಪೊಲೀಸರು ಶುದ್ಧ ಇವಿ ಮತ್ತು ಡೀಲರ್ ವಿರುದ್ಧ ಪ್ರಕರಣ ದಾಖಲಿಸಿದ್ದರು. ಐಪಿಸಿ ಸೆಕ್ಷನ್ 304 ಎ (ನಿರ್ಲಕ್ಷ್ಯದಿಂದ ಸಾವು) ಅಡಿಯಲ್ಲಿ ಅವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.

ಬಿ.ರಾಮಸ್ವಾಮಿ ಸಾವಿನ ನಂತರ, ಪ್ಯೂರ್ ಇವಿ ಘಟನೆಗೆ ವಿಷಾದಿಸಿ ಕಂಪನಿಯು ಸ್ಥಳೀಯ ತನಿಖಾ ಸಂಸ್ಥೆಗಳೊಂದಿಗೆ ಸಂಪೂರ್ಣವಾಗಿ ಸಹಕರಿಸುತ್ತಿದೆ ಎಂದು ಹೇಳಿಕೆಯನ್ನು ಬಿಡುಗಡೆ ಮಾಡಿದರು. ದೂರುದಾರನಿಂದ ಘಟನೆಯ ಬಗ್ಗೆ ಸಂಪೂರ್ಣ ಮಾಹಿತಿಯನ್ನು ಪಡೆಯುವಂತೆ ಕಂಪನಿಯು ತನ್ನ ಡೀಲರ್‌ಗೆ ನಿರ್ದೇಶಿಸಿರುವುದಾಗಿ ಕಂಪನಿ ತಿಳಿಸಿದೆ.

ಪ್ಯೂರ್ ಇವಿನಂತೆ ಇತರ ತಯಾರಕರು ತಮ್ಮ ಎಲೆಕ್ಟ್ರಿಕ್ ಸ್ಕೂಟರ್ ಮಾದರಿಗಳನ್ನು ಗ್ರಾಹಕರು ನಂಬುವಂತೆ ಮರುಸ್ಥಾಪನೆಯನ್ನು ಘೋಷಿಸಬಹುದು ಎಂದು ನಿರೀಕ್ಷಿಸಲಾಗಿದೆ. ಕಳೆದ ಎರಡು ವಾರಗಳಲ್ಲಿ ದೇಶದ ವಿವಿಧ ಭಾಗಗಳಲ್ಲಿ ಸುಮಾರು ಆರಕ್ಕೂ ಹೆಚ್ಚು ಎಲೆಕ್ಟ್ರಿಕ್ ಸ್ಕೂಟರ್‌ಗಳು ಬೆಂಕಿಗೆ ಆಹುತಿಯಾಗಿರುವ ಪ್ರಕರಣಗಳು ವರದಿಯಾಗಿವೆ.

ಈ ಘಟನೆಗಳು ಎಲೆಕ್ಟ್ರಿಕ್ ಸ್ಕೂಟರ್‌ಗಳನ್ನು ಖರೀದಿಸಲು ಯೋಜಿಸುತ್ತಿರುವ ಗ್ರಾಹಕರನ್ನು ಬೆಚ್ಚಿಬೀಳಿಸುವಂತೆ ಮಾಡಿದ್ದು, ಎಲೆಕ್ಟ್ರಿಕ್ ಸ್ಕೂಟರ್‌ಗಳ ಸುರಕ್ಷತೆಯ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿವೆ. ಎಲೆಕ್ಟ್ರಿಕ್ ವಾಹನ ಉದ್ಯಮಕ್ಕೆ ಇಂತಹ ಘಟನೆಗಳು ತುಂಬಾ ಪರಿಣಾಮಕಾರಿಯಾಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಇದು ಭಾರತದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಎಲೆಕ್ಟ್ರಿಕ್ ವಾಹನ ಉದ್ಯಮವನ್ನು ನಿಧಾನಗೊಳಿಸಬಹುದು. ಕೇಂದ್ರ ಸರ್ಕಾರದ ಅಗ್ನಿಶಾಮಕ ಮತ್ತು ಪರಿಸರ ಸಂಸ್ಥೆ (CFEEA) ವಾಹನಗಳಲ್ಲಿ ಬೆಂಕಿಯ ಕಾರಣವನ್ನು ಕಂಡುಹಿಡಿಯಲು ಎಲೆಕ್ಟ್ರಿಕ್ ವಾಹನ ತಯಾರಕರಿಗೆ ನೋಟಿಸ್ ಕಳುಹಿಸಿದೆ.

ಇತ್ತೀಚೆಗಷ್ಟೆ ಓಲಾ ಸಿಇಒ ಭವಿಷ್ ಅಗರ್ವಾಲ್ ಅವರು ಕೇಂದ್ರ ಸಚಿವ ನಿತಿನ್ ಗಡ್ಕರಿ ಅವರನ್ನು ಭೇಟಿಯಾಗಿ ಎಲೆಕ್ಟ್ರಿಕ್ ವಾಹನಗಳ ಭವಿಷ್ಯದ ಕುರಿತು ಸುದೀರ್ಘ ಚರ್ಚೆ ನಡೆಸಿ, ಓಲಾ ಸ್ಕೂಟರ್‌ ಬಗ್ಗೆ ವಿವರಿಸಿದ್ದರು. ಬಳಿಕ ಬೆಂಕಿ ಅವಘಡಗಳು ಮರುಕಳಿಸದಂತೆ ಪ್ರಮಾಣಿತ ಸ್ಕೂಟರ್‌ಗಳ ಅಭಿವೃದ್ಧಿಗೆ ಶ್ರಮಿಸುವುದಾಗಿ ತಿಳಿಸಿದ್ದರು.