ಎಲೆಕ್ಟ್ರಿಕ್ ವಾಹನಗಳಿಗೆ ಭಾರೀ ಬೇಡಿಕೆ: ಹೊಸ ಎಲೆಕ್ಟ್ರಿಕ್ ಸ್ಕೂಟರ್ ಬಿಡುಗಡೆಗೊಳಿಸಲಿದೆ ಯಮಹಾ

ಭಾರತದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ಗಗನಕ್ಕೇರಿದೆ. ಇದರಿಂದ ಪಾರಾಗಲು ಜನರು ಎಲೆಕ್ಟ್ರಿಕ್ ವಾಹನಗಳ ಕಡೆ ಮುಖ ಮಾಡುತ್ತಿದ್ದಾರೆ. ಇದರಿಂದ ಭಾರತೀಯ ಮಾರುಕಟ್ಟೆಯಲ್ಲಿ ಎಲೆಕ್ಟ್ರಿಕ್ ವಾಹನಗಳಿಗೆ ಭಾರೀ ಬೇಡಿಕೆಯನ್ನು ಪಡೆದುಕೊಂಡಿದೆ. ಎಲೆಕ್ಟ್ರಿಕ್ ವಾಹನಗಳ ಬೇಡಿಕೆ ಹೆಚ್ಚಾಗುತಿದ್ದಂತೆ, ಹಲವು ಜನಪ್ರಿಯ ವಾಹನ ತಯಾರಕ ಕಂಪನಿಗಳು ಕೂಡ ಎಲೆಕ್ಟ್ರಿಕ್ ವಾಹನಗಳನ್ನು ಉತ್ಪಾದಿಸುತ್ತಿದೆ.

ಭಾರತೀಯ ಮಾರುಕಟ್ಟೆಯಲ್ಲಿ ಜನಪ್ರಿಯ ದ್ವಿಚಕ್ರ ತಯಾರಕ ಕಂಪನಿಗಳದ ಬಜಾಜ್ ಆಟೋ, ಟಿವಿಎಸ್ ಮೋಟಾರ್ ಸಹ ಎಲೆಕ್ಟ್ರಿಕ್ ಸ್ಕೂಟರ್‌ಗಳನ್ನು ಈಗಾಗಲೇ ಬಿಡುಗಡೆಗೊಳಿಸಿವೆ. ಬಜಾಜ್‌ ಚೇತಕ್ ಎಲೆಕ್ಟ್ರಿಕ್ ಮತ್ತು ಟಿವಿಎಸ್ ಐಕ್ಯೂಬ್‌ನಂತಹ ಸ್ಕೂಟರ್‌ಗಳು ಭಾರತೀಯ ಮಾರುಕಟ್ಟೆಯಲ್ಲಿ ರಾರಾಜಿಸುತ್ತಿವೆ. ಇದರ ನಡುವೆ ಹಲವು ಎಲೆಕ್ಟ್ರಿಕ್ ದ್ವಿಚಕ್ರ ಬ್ರ್ಯಾಂಡ್ ಗಳು ಕೂಡ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳನ್ನು ಪರಿಚಯಿಸುತ್ತಿದೆ. ಇದೀಗ ಜಪಾನಿನ ತಯಾರಕರಾದ ಯಮಹಾ ಕೂಡ ಭಾರತೀಯ ಮಾರುಕಟ್ಟೆಯ ಎಲೆಕ್ಟ್ರಿಕ್ ವಿಭಾಗಕ್ಕೆ ಪ್ರವೇಶಿಸಲು ತಯಾರಾಗುತ್ತಿದ್ದಾರೆ.

ಆಯ್ದ ಜಾಗತಿಕ ಮಾರುಕಟ್ಟೆಗಳಲ್ಲಿ ಈಗಾಗಲೇ ಮಾರಾಟದಲ್ಲಿರುವ ಹೊಸ ನಿಯೋ ಇ-ಸ್ಕೂಟರ್‌ನೊಂದಿಗೆ ಯಮಹಾ ಮೋಟಾರ್ ಇಂಡಿಯಾ ಇವಿ ಬ್ಯಾಂಡ್‌ವ್ಯಾಗನ್‌ಗೆ ಸೇರಲಿದೆ. ಆನ್‌ಲೈನ್ ಮಾಧ್ಯಮ ಪ್ರಕಟಣೆಯೊಂದಿಗೆ ಮಾತನಾಡುತ್ತಾ, ಯಮಹಾ ಇಂಡಿಯಾದ ಚರಿಮನ್ ಐಶಿನ್ ಚಿಹಾನಾ, ಕಂಪನಿಯು ಪ್ರಸ್ತುತ ಭಾರತಕ್ಕಾಗಿ ಎಲೆಕ್ಟ್ರಿಕ್ ಸ್ಕೂಟರ್ ಪ್ಲಾಟ್‌ಫಾರ್ಮ್‌ನ ವ್ಯಾಪಕ ಪರೀಕ್ಷೆಗಳನ್ನು ನಡೆಸುತ್ತಿದೆ ಎಂದು ಬಹಿರಂಗಪಡಿಸಿದ್ದಾರೆ. ಜಪಾನಿನ ದ್ವಿಚಕ್ರ ವಾಹನ ತಯಾರಕರು ಆರಂಭದಲ್ಲಿ ಯಮಹಾ ನಿಯೋ ಎಲೆಕ್ಟ್ರಿಕ್ ಸ್ಕೂಟರ್ ಅನ್ನು ದೇಶದಲ್ಲಿ ಆಮದು ಮಾಡಿಕೊಳ್ಳುತ್ತಾರೆ.

ವಾಹನದ ಬ್ಯಾಟರಿ ಪ್ಯಾಕ್ ಮತ್ತು ಎಲೆಕ್ಟ್ರಿಕ್ ಮೋಟಾರ್ ಅನ್ನು ಭಾರತೀಯ ಸವಾರಿ ಪರಿಸ್ಥಿತಿಗಳನ್ನು ಪೂರೈಸಲು ರೀಟ್ಯೂನ್ ಮಾಡಲಾಗುತ್ತದೆ. ಸ್ಪರ್ಧಾತ್ಮಕ ಬೆಲೆಯನ್ನು ನಿಗಧಿಪಡಿಸಬಹುದು. ಕಂಪನಿಯು ಸ್ಥಳೀಯ ಪೂರೈಕೆದಾರರನ್ನು ಸಹ ಬಳಸಿಕೊಳ್ಳುತ್ತದೆ. ಈ ಹಿಂದೆ, ಯಮಹಾ ತನ್ನ ಹೊಸ ಎಲೆಕ್ಟ್ರಿಕ್ ಸ್ಕೂಟರ್‌ಗಳು 2025 ರ ವೇಳೆಗೆ ಭಾರತಕ್ಕೆ ಬರಲು ಪ್ರಾರಂಭಿಸುತ್ತದೆ ಎಂದು ಖಚಿತಪಡಿಸಿತು. 50cc ಸ್ಕೂಟರ್‌ಗೆ ಸಮನಾದ ಯಮಹಾ ನಿಯೋ, ಸುಮಾರು 2kW ಪವರ್ ಅನ್ನು ತಲುಪಿಸುವ ಹಬ್ ಮೋಟಾರ್ ಹೊಂದಿದೆ.

ಈ ಇ-ಸ್ಕೂಟರ್ ಬದಲಾಯಿಸಬಹುದಾದ ಬ್ಯಾಟರಿಗಳನ್ನು ಹೊಂದಿದೆ. ನಿಯೋ 68 ಕಿಮೀ ರೇಂಜ್ ಅನ್ನು ನೀಡುತ್ತದೆ ಎಂದು ಕಂಪನಿ ಹೇಳಿದೆ. ಇದು ಎಲ್‌ಇಡಿ ಲೈಟಿಂಗ್, ಸ್ಮಾರ್ಟ್‌ಫೋನ್ ಸಂಪರ್ಕದೊಂದಿಗೆ ಸಂಪೂರ್ಣ ಡಿಜಿಟಲ್ ಎಲ್‌ಸಿಡಿ ಉಪಕರಣ ಕನ್ಸೋಲ್, ಸ್ಮಾರ್ಟ್ ಕೀ ಇಂಟಿಗ್ರೇಷನ್, ಟೆಲಿಸ್ಕೋಪಿಕ್ ಫ್ರಂಟ್ ಮತ್ತು ಮೊನೊಶಾಕ್ ರಿಯರ್ ಸಸ್ಪೆನ್ಷನ್‌ನೊಂದಿಗೆ ಸಜ್ಜುಗೊಂಡಿದೆ. ಈ ಯಮಹಾ ಎಲೆಕ್ಟ್ರಿಕ್ ಸ್ಕೂಟರ್ ಸೀಟಿನ ಕೆಳಗೆ 27-ಲೀಟರ್ ಸ್ಟೋರೇಜ್ ಜಾಗವನ್ನು ನೀಡುತ್ತದೆ. ಇದು ಯಮಹಾ ಇಂಡಿಯಾ ಮತ್ತು ಯಮಹಾ ಜಪಾನ್ ನಡುವಿನ ಜಂಟಿ ಪ್ರಯತ್ನವಾಗಿದೆ.

ಸ್ಥಳೀಯ ಮಾರಾಟಗಾರರಿಂದ ಪಡೆದ ಘಟಕಗಳನ್ನು ಬಳಸಿಕೊಂಡು ಸ್ಕೂಟರ್ ಅನ್ನು ಭಾರತದಲ್ಲಿ ತಯಾರಿಸಲಾಗುತ್ತದೆ. ಭಾರತೀಯ ಹವಾಮಾನ ಪರಿಸ್ಥಿತಿಗಳನ್ನು ಗಮನದಲ್ಲಿಟ್ಟುಕೊಂಡು ಮೋಟಾರ್ ಮತ್ತು ಬ್ಯಾಟರಿಯನ್ನು ಅಭಿವೃದ್ಧಿಪಡಿಸಲಾಗುತ್ತದೆ." ಯಮಹಾ ಕಂಪನಿಯ ಮೊದಲ ಬ್ಯಾಟರಿ-ಚಾಲಿತ ದ್ವಿಚಕ್ರ ವಾಹನದ ಕೊಡುಗೆಯು ನಿಯೋಸ್ ಆಗಿದ್ದು, ಮೂಲಭೂತವಾಗಿ ಅದೇ ಹೆಸರಿನಿಂದ ಅಸ್ತಿತ್ವದಲ್ಲಿರುವ 50ಸಿಸಿ ಸ್ಕೂಟರ್‌ಗೆ ಸಮಾನವಾದ ಎಲೆಕ್ಟ್ರಿಕ್ ಆಗಿದೆ. ಇದು 2019 ರಲ್ಲಿ ಟೋಕಿಯೊ ಮೋಟಾರ್ ಶೋನಲ್ಲಿ ಬ್ರ್ಯಾಂಡ್ ಪ್ರದರ್ಶಿಸಿದ ಇ02 ಕಾನ್ಸೆಪ್ಟ್ ಮಾದರಿಯನ್ನು ಆಧರಿಸಿದೆ.

ಹೊಸ ಎಲೆಕ್ಟ್ರಿಕ್ ಸ್ಕೂಟರ್ ನಲ್ಲಿ ಇದು ಬ್ಯಾಟರಿ ವಿನಿಮಯ ತಂತ್ರಜ್ಞಾನವನ್ನು ನೀಡಬಹುದು ಎಂದು ನಿರೀಕ್ಷಿಸುತ್ತೇವೆ. ಇದು ಬದಲಾಯಿಸಬಹುದಾದ ಲಿಥಿಯಂ-ಐಯಾನ್ ಬ್ಯಾಟರಿ ಪ್ಯಾಕ್‌ನಿಂದ ಚಾಲಿತವಾಗಿದೆ, ಇದು ಹಬ್-ಮೌಂಟೆಡ್ ಎಲೆಕ್ಟ್ರಿಕ್ ಮೋಟರ್‌ಗೆ ಶಕ್ತಿಯನ್ನು ನೀಡುತ್ತದೆ, ಇದು ಸುಮಾರು 2kW ಅನ್ನು ರೇಟ್ ಮಾಡುವ ಸಾಧ್ಯತೆಯಿದೆ.ಇನ್ನು ಯಮಹಾ ಕಂಪನಿಯು ಅನಾವರಣಗೊಳಿಸಿದ ಎರಡನೇ ಎಲೆಕ್ಟ್ರಿಕ್ ಸ್ಕೂಟರ್ ಇ01 ಆಗಿದೆ. ಇದು 125ಸಿಸಿ ಪೆಟ್ರೋಲ್ ಸ್ಕೂಟರ್‌ಗೆ ಸಮನಾದ ಹೆಚ್ಚು ಶಕ್ತಿಶಾಲಿ ಉತ್ಪನ್ನವಾಗಿದೆ.

ಈ ಮಾದರಿಯು ಇ01 ಕಾನ್ಸೆಪ್ಟ್ ಅನ್ನು ಆಧರಿಸಿದೆ. ಇದನ್ನು ಇ02 ಕಾನ್ಸೆಪ್ಟ್ ನಂತೆಯೇ ಅದೇ ರೀತಿಯಲ್ಲಿ ತೋರಿಸಲಾಗಿದೆ. ಇತರ ನವೀಕರಣಗಳಲ್ಲಿ, ಜಪಾನಿನ ದ್ವಿಚಕ್ರ ವಾಹನ ತಯಾರಕರು ಐಕಾನಿಕ್ ಯಮಹಾ RX100 ಮೋಟಾರ್‌ಸೈಕಲ್ ಅನ್ನು ಆಧುನಿಕ ವಿನ್ಯಾಸ ಮತ್ತು ದೊಡ್ಡ ಸ್ಥಳಾಂತರ ಎಂಜಿನ್‌ನೊಂದಿಗೆ ಮರು-ಪರಿಚಯಿಸಲು ಯೋಜಿಸುತ್ತಿದ್ದಾರೆ. ಹೊಸ RX100 "ಶಕ್ತಿಶಾಲಿ ಎಂಜಿನ್ ಮತ್ತು ವಿನ್ಯಾಸದೊಂದಿಗೆ ಪರಿಣಾಮಕಾರಿ ಪ್ಯಾಕೇಜ್ ಆಗಿರಬೇಕು" ಎಂದು ಕಂಪನಿ ಹೇಳುತ್ತದೆ. ಸದ್ಯಕ್ಕೆ ಇದರ ಬಗ್ಗೆ ಹೆಚ್ಚಿನ ಮಾಹಿತಿಗಳು ಬಹಿರಂಗವಾಗಿಲ್ಲ.