ಓಲಾ ಸ್ಕೂಟರ್ ಬೇಡವೆಂದ ಜನ... ಬಜಾಜ್, ಟಿವಿಎಸ್, ಎಥರ್ ಬೆಸ್ಟ್! ಟಾಪ್-5 ಪಟ್ಟಿ ಇಲ್ಲಿದೆ...

ದೇಶದಲ್ಲಿ ಇಂಧನ ಬೆಲೆಗಳ ಏರಿಕೆಯಿಂದಾಗಿ ಜನ ಎಲೆಕ್ಟ್ರಿಕ್ ವಾಹನಗಳ ಖರೀದಿಗೆ ಆಸಕ್ತಿ ತೋರುತ್ತಿದ್ದಾರೆ. ಕಳೆದ ಒಂದು ವರ್ಷದಲ್ಲಿ ಇವಿಗಳ ಮಾರಾಟದಲ್ಲಿ ತುಂಬಾ ಏರಿಕೆ ಕಂಡುಬಂದಿದೆ. ಇದೇ ನವೆಂಬರ್ ತಿಂಗಳಲ್ಲಿ ಭಾರತದ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ (EV 2W) ವಿಭಾಗವು ಉತ್ತಮ ಲಾಭವನ್ನು ಕಂಡಿದೆ. ಈ ಬಾರಿ TVS ಮೋಟಾರ್ ಕಂಪನಿಯು ಇವಿ ಮಾರುಕಟ್ಟೆಯಲ್ಲಿ ತನ್ನ ಪ್ರಾಬಲ್ಯವನ್ನು ತೋರಿಸಿದೆ. ಮತ್ತೊಂದೆಡೆ ಹೀರೋ ಮೋಟೊಕಾರ್ಪ್‌ನ ವಿಡಾ ಇವಿ' ಓಲಾ ಎಲೆಕ್ಟ್ರಿಕ್ ಅನ್ನು ಹಿಂದಿಕ್ಕಿದೆ.

ವಾಹನ್ ಡೇಟಾದ (Vahan registration) ಪ್ರಕಾರ ಟಿವಿಎಸ್ ಮೋಟಾರ್‌ ಕಂಪನಿಯು ತನ್ನ ಎಲೆಕ್ಟ್ರಿಕ್ ಸ್ಕೂಟರ್‌ಗಳ ಮಾರಾಟದೊಂದಿಗೆ ಶೇ26 ರಷ್ಟು ಮಾರುಕಟ್ಟೆ ಪಾಲನ್ನು ದಕ್ಕಿಸಿಕೊಂಡಿದೆ, ಬರೋಬ್ಬರಿ 27,382 ಯುನಿಟ್‌ ಟಿವಿಎಸ್ ಎಲೆಕ್ಟ್ರಿಕ್ ಸ್ಕೂಟರ್‌ಗಳನ್ನು ನೋಂದಾಯಿಸಿದೆ. ಬಜಾಜ್ ಆಟೋ 23,097 ಯುನಿಟ್‌ಗಳೊಂದಿಗೆ (21.9% ಪಾಲು) ಎರಡನೇ ಸ್ಥಾನದಲ್ಲಿದೆ, ಇದು ತನ್ನ ಚೇತಕ್ ಸ್ಕೂಟರ್‌ಗಳಿಂದ ನಡೆಸಲ್ಪಡುತ್ತಿದೆ.

ಎಥರ್ ಎನರ್ಜಿ 18,356 ಯುನಿಟ್‌ಗಳೊಂದಿಗೆ (17.4% ಪಾಲು) ಮೂರನೇ ಸ್ಥಾನದಲ್ಲಿದ್ದರೆ, ಹೀರೋ ಮೋಟೋಕಾರ್ಪ್‌ನ ವಿಡಾ ಬ್ರ್ಯಾಂಡ್ ಓಲಾ ಎಲೆಕ್ಟ್ರಿಕ್ ಅನ್ನು ಹಿಂದಿಕ್ಕಿ 10,579 ಯುನಿಟ್‌ಗಳೊಂದಿಗೆ (10% ಪಾಲು) ನಾಲ್ಕನೇ ಸ್ಥಾನಕ್ಕೆ ತಳ್ಳಿದೆ, ಏಕೆಂದರೆ ಓಲಾ 7,567 ಯುನಿಟ್‌ಗಳಿಗೆ (7.2% ಪಾಲು) ಕುಸಿದಿದೆ.

ಹೊಸ ಇವಿ ಬ್ರಾಂಡ್ ಆಂಪಿಯರ್ ಎಲೆಕ್ಟ್ರಿಕ್, 5,360 ಯೂನಿಟ್‌ ವಾಹನಗಳ ಮಾರಾಟ ಮತ್ತು ಬಿಗಾಸ್ ಕಂಪನಿಯ 2,410 ಯೂನಿಟ್ ವಾಹನಗಳು ಹಾಗೂ ರಿವರ್ ಕಂಪನಿಯ 1,612 ಯೂನಿಟ್ ವಾಹನಗಳು ಮಾರಾಟವಾಗಿವೆ. ಉದಯೋನ್ಮುಖ ಬ್ರ್ಯಾಂಡ್ ಗಳು ಕೂಟ ಇವಿ ಸ್ಕೂಟರ್ ವಿಭಾಗದಲ್ಲಿ ಉತ್ತಮ ಲಾಭ ಕಾಣುತ್ತಿವೆ. ಮುಂಬರುವ ವರ್ಷಗಳಲ್ಲಿ ಇನ್ನೂ ಹೆಚ್ಚಿನ ಮಾರಾಟ ಮೈಲಿಗಲ್ಲು ಸಾಧಿಸುವ ನಿರೀಕ್ಷೆಯಲ್ಲಿವೆ.

ಓಲಾಗೆ ಭಾರೀ ಹೊಡೆತ: ಒಂದು ಕಾಲದಲ್ಲಿ ಭಾರತದ ಇವಿ ದ್ವಿಚಕ್ರ ವಾಹನ ವಿಭಾಗದಲ್ಲಿ ಪ್ರಾಬಲ್ಯ ಹೊಂದಿದ್ದ ಮತ್ತು ವಾಡಿಕೆಯಂತೆ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದ ಓಲಾ ಕಂಪನಿ ಈಗ ಕುಸಿತ ಕಂಡಿದೆ. ತೀವ್ರಗೊಳ್ಳುತ್ತಿರುವ ಸ್ಪರ್ಧೆ, ಕಾರ್ಯಾಚರಣೆಯ ಸವಾಲುಗಳು ಮತ್ತು ಸರ್ವಿಸ್‌ಗೆ ಸಂಬಂಧಿಸಿದಂತೆ ಗ್ರಾಹಕರಿಂದ ಹೆಚ್ಚಾಗಿರುವ ದೂರುಗಳು ಓಲಾ ಮೇಲೆ ತೀವ್ರ ಪರಿಣಾಮ ಬೀರಿವೆ ಎಂದು ವರದಿಯಾಗಿದೆ.

ಇನ್ನು ಅಕ್ಟೋಬರ್ ತಿಂಗಳಲ್ಲಿ ಭಾರತದ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ಮಾರುಕಟ್ಟೆಯನ್ನು ಬಜಾಜ್ ಆಟೋ ಮುನ್ನಡೆಸಿತು, ನಂತರ ಟಿವಿಎಸ್ ಮೋಟಾರ್ ಕಂಪನಿ ಮತ್ತು ಎಥರ್ ಎನರ್ಜಿ ಇದ್ದವು. ವಾಹನ್ ಡೇಟಾದ ಪ್ರಕಾರ, ಒಟ್ಟಾರೆ ಉದ್ಯಮದ ಮಾರಾಟವು ಮಿಶ್ರ ಪ್ರವೃತ್ತಿಯನ್ನು ಪ್ರತಿಬಿಂಬಿಸಿತ್ತು, ಹಲವಾರು ಬ್ರ್ಯಾಂಡ್‌ಗಳು ವರ್ಷದಿಂದ ವರ್ಷಕ್ಕೆ ಬಲವಾದ ಬೆಳವಣಿಗೆಯನ್ನು ದಾಖಲಿಸಿದರೆ, ಕೆಲವು ಬ್ರ್ಯಾಂಡ್‌ಗಳು ಕುಸಿತ ಕಂಡಿದ್ದವು ಇದರಲ್ಲಿ ಓಲಾ ಕೂಡ ಇತ್ತು.

ಅಕ್ಟೋಬರ್ ನಲ್ಲಿ ಬಜಾಜ್ ಆಟೋ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನ ತಯಾರಕರಲ್ಲಿ ಅಗ್ರ ಸ್ಥಾನವನ್ನು ಪಡೆದುಕೊಂಡು ಬರೋಬ್ಬರಿ 31,168 ಯುನಿಟ್‌ ವಾಹನಗಳನ್ನು ಮಾರಾಟ ಮಾಡಲಾಗಿತ್ತು. ನಂತರ ಟಿವಿಎಸ್ ಮೋಟಾರ್ 29,484 ಯುನಿಟ್‌ ವಾಹನಗಳೊಂದಿಗೆ ಎರಡನೇ ಸ್ಥಾನದಲ್ಲಿದ್ದರೇ, 28,061 ಯುನಿಟ್‌ ವಾಹನಗಳನ್ನು ಮಾರಾಟ ಮಾಡುವ ಮೂಲಕ ಎಥರ್ ಎನರ್ಜಿ ಮೂರನೇ ಸ್ಥಾನ ಪಡೆದುಕೊಂಡಿತ್ತು.

ಅಕ್ಟೋಬರ್ ನಲ್ಲಿ ಓಲಾ ಎಲೆಕ್ಟ್ರಿಕ್ ಮಾರಾಟದಲ್ಲಿ 4ನೇ ಸ್ಥಾನಕ್ಕೆ ಕುಸಿದಿತ್ತು, ಕಳೆದ ವರ್ಷ ಅಕ್ಟೋಬರ್ 2024 ರಲ್ಲಿ ಮಾರಾಟವಾದ 41,843 ಯುನಿಟ್‌ ವಾಹನಗಳಿಗೆ ಹೋಲಿಸಿದರೆ ವರ್ಷದಿಂದ ವರ್ಷಕ್ಕೆ ಶೇ. 62 ರಷ್ಟು ಕುಸಿತವನ್ನು ಪ್ರತಿಬಿಂಬಿಸುವ ಮೂಲಕ 16,034 ಯುನಿಟ್‌ಗಳನ್ನು ಮಾರಾಟ ಮಾಡಿತ್ತು. ಇದು ಟಾಪ್ 10 ಎಲೆಕ್ಟ್ರಿಕ್ ವಾಹನ ಕಂಪನಿಗಳಲ್ಲಿ ವರ್ಷದಿಂದ ವರ್ಷಕ್ಕೆ ಅತಿದೊಡ್ಡ ಕುಸಿತವಾಗಿದೆ.

ಡ್ರೈವ್‌ಸ್ಪಾರ್ಕ್ ಕನ್ನಡ ವೆಬ್‌ಸೈಟ್ ತ್ವರಿತ ಆಟೋಮೊಬೈಲ್ ಸುದ್ದಿಗಳನ್ನು ಒದಗಿಸುತ್ತದೆ, ಎಲ್ಲಾ ಸಾಮಾಜಿಕ ಮಾಧ್ಯಮಗಳ ಮೂಲಕ ತಕ್ಷಣವೇ ಓದುಗರೊಂದಿಗೆ ಸುದ್ದಿಗಳನ್ನು ಹಂಚಿಕೊಳ್ಳುತ್ತದೆ. ಇತ್ತೀಚಿನ ಕಾರು, ಬೈಕ್ ಸುದ್ದಿ, ಟೆಸ್ಟ್ ಡ್ರೈವ್ ವರದಿಗಳು ಮತ್ತು ವೀಡಿಯೊಗಳನ್ನು ಪಡೆಯಲು ನಮ್ಮ ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್ ಮತ್ತು ಯೂಟ್ಯೂಬ್ ಪೇಜ್‌ಗಳೊಂದಿಗೆ ಸಂಪರ್ಕದಲ್ಲಿರಿ. ನಿಮಗೆ ಯಾವುದೇ ಸುದ್ದಿ ಇಷ್ಟವಾದರೆ ಲೈಕ್, ಕಮೆಂಟ್ ಮಾಡುವುದನ್ನು ಮರೆಯದಿರಿ. ಜೊತೆಗೆ ನಿಮ್ಮ ಸ್ನೇಹಿತರಿಗೂ ತಪ್ಪದೆ ಶೇರ್ ಮಾಡಿ.