Hero: ಇಟಲಿಯಲ್ಲಿ ಧೂಳೆಬ್ಬಿಸಲಿವೆ ಹೀರೋ ಬೈಕ್‌ಗಳು: ಅಧಿಕೃತ ಪ್ರವೇಶ ಘೋಷಣೆ

ವಿಶ್ವದ ಅತಿದೊಡ್ಡ ದ್ವಿಚಕ್ರ ವಾಹನ ತಯಾರಕರಾದ ಹೀರೋ ಮೋಟೋಕಾರ್ಪ್ (Hero Motocorp), ಇಂದು ಇಟಲಿ ಗಣರಾಜ್ಯಕ್ಕೆ (Republic of Italy) ಅಧಿಕೃತ ಪ್ರವೇಶವನ್ನು ಘೋಷಿಸಿದೆ. 24 ವರ್ಷಗಳಿಗೂ ಹೆಚ್ಚು ಕಾಲ ದ್ವಿಚಕ್ರ ವಾಹನ ತಯಾರಕರಾಗಿ, ಜಾಗತಿಕವಾಗಿ 125 ಮಿಲಿಯನ್ ಗ್ರಾಹಕರ ನೆಲೆಯನ್ನು ಹೊಂದಿರುವ ಹೀರೋ ಮೋಟೋಕಾರ್ಪ್, ಇದೀಗ ತನ್ನ 49ನೇ ಅಂತರರಾಷ್ಟ್ರೀಯ ಮಾರುಕಟ್ಟೆಗೆ ಪ್ರವೇಶಮಾಡಿದೆ. ಜರ್ಮನಿ ಮತ್ತು ಭಾರತದಲ್ಲಿ ಎರಡು ಅತ್ಯಾಧುನಿಕ ಆರ್ & ಡಿ ಸೌಲಭ್ಯಗಳೊಂದಿಗೆ, ಕಂಪನಿಯು ಜಾಗತಿಕವಾಗಿ ವೈವಿಧ್ಯಮಯ ರೈಡರ್ ಆದ್ಯತೆಗಳನ್ನು ಸಬಲೀಕರಣಗೊಳಿಸುವ ಭವಿಷ್ಯ ಸಿದ್ಧ ಸ್ಮಾರ್ಟ್ ವಾಹನಗಳನ್ನು ತಲುಪಿಸಲು ಬದ್ಧವಾಗಿದೆ ಎಂದು ಹೇಳಿದೆ.

ಹೀರೋನಿಂದ ವಾಹನಗಳ ವಿತರಣೆಯನ್ನು ಇಟಲಿಯ ಅತಿದೊಡ್ಡ ವಿತರಕರಲ್ಲಿ ಒಂದಾದ ಪೆಲ್ಪಿ ಇಂಟರ್ನ್ಯಾಷನಲ್ ನಿರ್ವಹಿಸುತ್ತದೆ, ಇದು 160 ಕ್ಕೂ ಹೆಚ್ಚು ಡೀಲರ್‌ಗಳ ಜಾಲ ಮತ್ತು ಸಿಸೇರ್ ಗಲ್ಲಿ ನೇತೃತ್ವದ ಉತ್ಸಾಹಭರಿತ ರೈಡರ್‌ಗಳ ಬಲವಾದ ತಂಡದ ಮೂಲಕ ಇಟಲಿಯಾದ್ಯಂತ ದ್ವಿಚಕ್ರ ವಾಹನ ಮಾರಾಟ, ಸೇವೆ ಮತ್ತು ಬಿಡಿ-ಭಾಗಗಳನ್ನು ನೀಡುತ್ತದೆ. ಆರಂಭಿಕ ವಿತರಣೆಯು 36+ ಡೀಲರ್‌ಗಳನ್ನು ಹೊಂದಿರುವ ಪ್ರಮುಖ ನಗರಗಳ ಮೇಲೆ ಕೇಂದ್ರೀಕರಿಸುತ್ತದೆ, ಕ್ರಮೇಣ 54ಕ್ಕೆ ವಿಸ್ತರಿಸಲಾಗುತ್ತದೆ.

Xpulse 200 4V, Xpulse 200 4V Pro ಮತ್ತು Hunk 440 - ಮೂರು ಪ್ರಮುಖ ಮಾಡಲ್‌ಗಳು ಅಲ್ಲಿನ ಮಾರುಕಟ್ಟೆ ಪ್ರತಿನಿಧಿಸುತ್ತವೆ. ಅಡ್ವೆಂಚರ್ ವಿಭಾಗದ Xpulse ಮತ್ತು ಸ್ಟೈಲಿಷ್ Hunk 440 ಎರಡೂ ಮಾಡಲ್‌ಗಳು E5+ ಮತ್ತು EU- ಕಂಪ್ಲೈಂಟ್ ಆಗಿದ್ದು, ಹೊಸ ಪೀಳಿಗೆಯ ಸವಾರರಿಗಾಗಿ ನಿರ್ಮಿಸಲಾಗಿದೆ ಎಂದು ಹೀರೋ ಹೇಳಿಕೊಂಡಿದೆ.

ಹಂಕ್ 440: ಹಂಕ್ 440 ಸುಲಭ ನಗರ ಪ್ರಯಾಣ ಮತ್ತು ಶಕ್ತಿಯುತ ಮೋಟಾರ್‌ವೇ ವೇಗವರ್ಧನೆಗಾಗಿ ನಿರ್ಮಿಸಲಾಗಿದೆ. ಇದರ ಎಂಜಿನ್ 4000 rpm ನಲ್ಲಿ 36.0 Nm ಟಾರ್ಕ್ ಮತ್ತು 6000 rpm ನಲ್ಲಿ 27 BHP ಪವರ್ ನೀಡುತ್ತದೆ. ಯುರೋ 5+ ಮಾನದಂಡಗಳನ್ನು ಅನುಸರಿಸಲು ಇದನ್ನು ವಿನ್ಯಾಸಗೊಳಿಸಲಾಗಿದೆ. ಇದರ ಉಕ್ಕಿನ ಟ್ರೆಲ್ಲಿಸ್ ಫ್ರೇಮ್ ದೀರ್ಘ ಪ್ರವಾಸಗಳಲ್ಲಿ ಹೆಚ್ಚಿನ ವೇಗದ ಸ್ಥಿರತೆ ನೀಡುತ್ತದೆ.

ಹಂಕ್ 440 ದೊಡ್ಡ 320 mm ಮುಂಭಾಗ ಮತ್ತು 240 mm ಹಿಂಭಾಗದ ಡಿಸ್ಕ್‌ಗಳನ್ನು ಹೊಂದಿರುವ ಡ್ಯುಯಲ್ - ಚಾನೆಲ್ ABS ಅನ್ನು ಹೊಂದಿದೆ. USD ಕಾರ್ಟ್ರಿಡ್ಜ್ ಫೋರ್ಕ್ಸ್, ಪೂರ್ಣ-ಡಿಜಿಟಲ್ ಮತ್ತು ಸಂಪರ್ಕಿತ TFT ಡಿಸ್ಪ್ಲೇ, ಟರ್ನ್-ಬೈ-ಟರ್ನ್ ನ್ಯಾವಿಗೇಷನ್, ಆಲ್-LED ಲೈಟಿಂಗ್ ಮತ್ತು ಅಗಲವಾದ 150/60 ZR 17 ರೇಡಿಯಲ್ ಟೈರ್‌ಗಳನ್ನು ಹೊಂದಿದೆ. ಟ್ವಿಲೈಟ್ ಬ್ಲೂ ಮತ್ತು ಫ್ಯಾಂಟಮ್ ಬ್ಲ್ಯಾಕ್ ಎಂಬ 2 ಅತ್ಯಾಕರ್ಷಕ ಬಣ್ಣಗಳಲ್ಲಿ ಸಿಗಲಿದೆ.

Xpulse 200: Xpulse ಕಠಿಣವಾದ ಆಫ್-ರೋಡ್ ಸಾಮರ್ಥ್ಯದೊಂದಿಗೆ ಬರುತ್ತದೆ, 18.9 BHP ಪವರ್ ಮತ್ತು 17.35 Nm ಟಾರ್ಕ್ ಅನ್ನು ಉತ್ಪಾದಿಸುವ ಶಕ್ತಿಶಾಲಿ 4 - ವಾಲ್ವ್ ಹೆಡ್ ಅನ್ನು ಹೊಂದಿದ್ದು, ಕಡಿದಾದ ಇಳಿಜಾರುಗಳನ್ನು ಹತ್ತಲು ಮತ್ತು ದೀರ್ಘ-ದೂರ ಪ್ರಯಾಣಗಳನ್ನು ಮಾಡಲು ಟ್ಯೂನ್ ಮಾಡಲಾಗಿದೆ. ಮೂರು ABS ಮೋಡ್‌ಗಳೊಂದಿಗೆ (ರೋಡ್, ಆಫ್-ರೋಡ್ ಮತ್ತು ರ್ಯಾಲಿ), ವೈವಿಧ್ಯಮಯ ಯುರೋಪ್ ಭೂಪ್ರದೇಶಗಳನ್ನು ಕರಗತ ಮಾಡಿಕೊಳ್ಳಲು ಸೂಕ್ತವಾಗಿದೆ.

Xpulse 200 4V Pro ಅನ್ನು ಟೂರಿಂಗ್ ಟೆಕ್ನಾಲಜಿ ರೆಡಿಯಾಗಿ ವಿನ್ಯಾಸಗೊಳಿಸಲಾದ ಇದು ಡಿಜಿಟಲ್ ಸ್ಪೀಡೋಮೀಟರ್, LCD ಡಿಸ್ಪ್ಲೇ, ಟ್ಯಾಕೋಮೀಟರ್, ಗೇರ್ ಪೊಸಿಷನ್ ಇಂಡಿಕೇಟರ್, ಬ್ರೈಟ್‌ನೆಸ್ ಹೊಂದಾಣಿಕೆ, ಬ್ಲೂಟೂತ್ ಟರ್ನ್-ಬೈ-ಟರ್ನ್ ನ್ಯಾವಿಗೇಷನ್ ಮತ್ತು LED ಪ್ರೊಜೆಕ್ಟರ್ ಹೆಡ್‌ಲ್ಯಾಂಪ್‌ಗಳಂತಹ ಅತ್ಯಾಕರ್ಷಕ ವೈಶಿಷ್ಟ್ಯಗಳೊಂದಿಗೆ ಬರುತ್ತದೆ.

Xpulse 200 4V ಮ್ಯಾಟ್ ನೆಕ್ಸಸ್ ಬ್ಲೂ ಮತ್ತು Xpulse 200 4V Pro ಪರ್ಲ್ ಫೇಡ್‌ಲೆಸ್ ವೈಟ್‌ನಲ್ಲಿ ಲಭ್ಯವಿದೆ. ಹೀರೋ ತನ್ನ ವಾಹನಗಳ ಮೇಲೆ 3-ವರ್ಷಗಳ ವಾರೆಂಟಿಯನ್ನು ನೀಡುತ್ತದೆ. ವಿಶೇಷ ಬಿಡುಗಡೆ ಕೊಡುಗೆಯ ಭಾಗವಾಗಿ ತನ್ನ ವಾಹನಗಳೊಂದಿಗೆ ಹೆಚ್ಚುವರಿ 2-ವರ್ಷಗಳ ವಾರೆಂಟಿಯನ್ನು ನೀಡಲಿದೆ, ಒಟ್ಟು ವಾರೆಂಟಿಯನ್ನು 5 ವರ್ಷಗಳಿಗೆ ವಿಸ್ತರಿಸಿರುವುದಾಗಿ ಹೇಳಿದೆ.