ಮನೆಯಲ್ಲೇ ಕುಳಿತು ಬುಕ್ ಮಾಡಿ: ಆಫರ್ ಜೊತೆಗೆ Rorr EZ ಫ್ಲಿಪ್‌ಕಾರ್ಟ್‌ನಲ್ಲಿ ಲಭ್ಯ

ಭಾರತದ ಪ್ರಮುಖ ಎಲೆಕ್ಟ್ರಿಕ್ ಮೋಟಾರ್‌ಸೈಕಲ್ ತಯಾರಕರಾದ ಒಬೆನ್ ಎಲೆಕ್ಟ್ರಿಕ್, ತನ್ನ ಹೊಸ ರೋರ್ ಇಝಡ್ (Rorr EZ) ಜೊತೆಗೆ ರೋರ್ ಇಝಡ್ ಸಿಗ್ಮಾ (Rorr EZ Sigma) ಮೋಟಾರ್‌ಸೈಕಲ್‌ಗಳನ್ನು ಭಾರತದ ಸ್ವದೇಶಿ ಇ-ಕಾಮರ್ಸ್ ಮಾರುಕಟ್ಟೆಯಾದ ಫ್ಲಿಪ್‌ಕಾರ್ಟ್ (Flipkart) ‌ನಲ್ಲಿ ಖರೀದಿಸಬಹುದು ಎಂದು ಘೋಷಿಸಿದೆ. ಈ ಪಾಲುದಾರಿಕೆಯು ಒಬೆನ್ ಎಲೆಕ್ಟ್ರಿಕ್‌ನ ಡಿಜಿಟಲ್ ವ್ಯಾಪಾರದ ವಿಸ್ತರಣೆಯಲ್ಲಿ ಪ್ರಮುಖ ಹೆಜ್ಜೆಯಾಗಿದೆ ಎಂದು ಕಂಪನಿ ಹೇಳಿಕೊಂಡಿದೆ. ಅನುಕೂಲಕರ, ಸುಸ್ಥಿರ ಮತ್ತು ವಿವಿಧ ಆಯ್ಕೆಗಳ ಮೂಲಕ ವಾಹನಗಳನ್ನು ಖರೀದಿಸಲು ಬಯಸುವ ಗ್ರಾಹಕರಿಗೆ ಈ ಸೌಲಭ್ಯವು ಇನ್ನೂ ಸುಲಭವಾಗಿಸುತ್ತದೆ.

ಒಬೆನ್‌ನ ಇತ್ತೀಚಿನ ಹಾರ್ಡ್‌ವೇರ್ ಮತ್ತು ಸಾಫ್ಟ್‌ವೇರ್ ಅಪ್‌ಗ್ರೇಡ್‌ಗಳೊಂದಿಗೆ ಸಜ್ಜುಗೊಂಡ ರೋರ್ ಇಝಡ್ ಸಿಗ್ಮಾ, ಫ್ಲಿಪ್‌ಕಾರ್ಟ್‌ನಲ್ಲಿ ರೂ. 1.29 ಲಕ್ಷ (ಎಕ್ಸ್‌ ಶೊರೂಂ) ದಿಂದ ಪ್ರಾರಂಭವಾಗುವ ಪರಿಚಯಾತ್ಮಕ ಬೆಲೆಯಲ್ಲಿ ಲಭ್ಯವಿದೆ. ಇದರಲ್ಲಿ ರೂ. 17,000 ರಿಯಾಯಿತಿ ಸೇರಿದೆ. ಹಾಗೆಯೇ ರೋರ್ ಇಝಡ್, ರೂ. 1.19 ಲಕ್ಷದಿಂದ ಪ್ರಾರಂಭವಾಗುವ ಬೆಲೆಯನ್ನು ಹೊಂದಿದ್ದು, ರೂ. 20,000 ಆಫರ್ ಹೊಂದಿದೆ.

ಬೈಕ್ ವಿಶೇಷತೆಗಳು: ಹೊಸದಾಗಿ ಬಿಡುಗಡೆಯಾದ ರೋರ್ ಇಝಡ್ ಸಿಗ್ಮಾ ಪ್ರಮುಖ ನವೀಕರಣಗಳೊಂದಿಗೆ, 3.4 ಕಿ.ವ್ಯಾ ಮತ್ತು 4.4 ಕಿ.ವ್ಯಾ ಬ್ಯಾಟರಿ ಆಯ್ಕೆಗಳಲ್ಲಿ ಲಭ್ಯವಿದೆ. ಇದು ಒಮ್ಮೆ ಚಾರ್ಜ್ ಮಾಡಿದರೆ 175 ಕಿ.ಮೀ ವರೆಗೆ ರೇಂಜ್ ನೀಡುತ್ತದೆ. ಕೇವಲ 3.3 ಸೆಕೆಂಡುಗಳಲ್ಲಿ 40 ಕಿ.ಮೀ ವೇಗವನ್ನು ತಲುಪುವ ಸಾಮರ್ಥ್ಯವನ್ನು ಹೊಂದಿದೆ. 95 ಕಿ.ಮೀ ಟಾಪ್ ಸ್ಪಿಡ್ ತಲುಪಬಲ್ಲದು ಹಾಗೂ ಇಕೋ, ಸಿಟಿ ಮತ್ತು ಹ್ಯಾವೋಕ್ ಎಂಬ ಮೂರು ರೈಡ್ ಮೋಡ್‌ಗಳೊಂದಿಗೆ ಬರುತ್ತದೆ.

ಇವಿಷ್ಟೆ ಅಲ್ಲದೆ ರೋರ್ ಇಝಡ್ ಸಿಗ್ಮಾದ ಪ್ರಮುಖ ವೈಶಿಷ್ಟ್ಯಗಳಲ್ಲಿ ಸುಲಭ ಕುಶಲತೆಗಾಗಿ ರಿವರ್ಸ್ ಮೋಡ್, ನ್ಯಾವಿಗೇಷನ್ ಮತ್ತು ನೈಜ-ಸಮಯದ ಎಚ್ಚರಿಕೆಗಳೊಂದಿಗೆ (ರಿಯಲ್ ಟೈಮ್ ಅಲರ್ಟ್) 5 - ಇಂಚಿನ ಕಲರ್ ಟಿಎಫ್‌ಟಿ ಡಿಸ್ಪ್ಲೇ, ದಕ್ಷತಾಶಾಸ್ತ್ರೀಯವಾಗಿ ಮರುವಿನ್ಯಾಸಗೊಳಿಸಲಾದ ಸೀಟ್ ಮತ್ತು ಆಕರ್ಷಕ ಹೊಸ ಎಲೆಕ್ಟ್ರಿಕ್ ರೆಡ್ ಬಣ್ಣವನ್ನು ನೀಡಲಾಗಿದೆ.

ಒಬೆನ್‌ನ ಪೇಟೆಂಟ್ ಪಡೆದ ಎಲ್‌ಎಫ್‌ಪಿ ಬ್ಯಾಟರಿ ತಂತ್ರಜ್ಞಾನದಿಂದ ನಡೆಸಲ್ಪಡುವ ಈ ಮೋಟಾರ್‌ಸಯಕಲ್‌ಗಳು, 50% ಹೆಚ್ಚಿನ ಶಾಖ ಪ್ರತಿರೋಧವನ್ನು ನೀಡುತ್ತದೆ. ಈ ಮೂಲಕ ಬೈಕ್‌ನ ಬಾಳಿಕೆಯನ್ನು ದ್ವಿಗುಣಗೊಳಿಸುತ್ತದೆ, ಭಾರತದ ವೈವಿಧ್ಯಮಯ ಹವಾಮಾನಗಳಲ್ಲಿ ವಿಶ್ವಾಸಾರ್ಹತೆಯನ್ನು ಖಚಿತಪಡಿಸುತ್ತದೆ ಎಂದು ಕಂಪನಿ ಹೇಳಿದೆ.

ಗ್ರಾಹಕರ ವಿಶ್ವಾಸವನ್ನು ಹೆಚ್ಚಿಸಲು, ಒಬೆನ್ ಎಲೆಕ್ಟ್ರಿಕ್ 8 ವರ್ಷ ಅಥವಾ 80,000 ಕಿ.ಮೀ ಬ್ಯಾಟರಿ ವಾರೆಂಟಿಯನ್ನು ನೀಡುತ್ತಿದೆ. ಜೊತೆಗೆ 5 ವರ್ಷಗಳ ಡೇಟಾ ಸಂಪರ್ಕ ಮತ್ತು ಒಬೆನ್ ಅಪ್ಲಿಕೇಶನ್‌ಗೆ ಪ್ರವೇಶವನ್ನು ನೀಡುತ್ತದೆ. ಪ್ರಸ್ತುತ, ಒಬೆನ್ ಎಲೆಕ್ಟ್ರಿಕ್ ಬೆಂಗಳೂರು, ದೆಹಲಿ, ಪುಣೆ, ಜೈಪುರ, ಅಮೃತಸರ, ಹೈದರಾಬಾದ್ ಮತ್ತು ಲಕ್ನೋ ಸೇರಿದಂತೆ ಭಾರತದಾದ್ಯಂತ 50+ ಶೋರೂಂಗಳನ್ನು ನಿರ್ವಹಿಸುತ್ತಿದೆ.

"ಫ್ಲಿಪ್‌ಕಾರ್ಟ್‌ನಲ್ಲಿ ರೋರ್ ಇಝಡ್ ಸಿಗ್ಮಾ ಮತ್ತು ರೋರ್ ಇಝಡ್ ಅನ್ನು ಆನ್‌ಲೈನ್‌ನಲ್ಲಿ ಗ್ರಾಹಕರು ಇರುವಲ್ಲಿಯೇ ಬುಕ್ ಮಾಡಬಹುದಾಗಿದೆ. ಫ್ಲಿಪ್‌ಕಾರ್ಟ್‌ನ ವಿಶ್ವಾಸಾರ್ಹ ವೇದಿಕೆ ಮತ್ತು ಭಾರತದಾದ್ಯಂತದ ವ್ಯಾಪ್ತಿಯು ನಮ್ಮ ಸುಧಾರಿತ ಎಲೆಕ್ಟ್ರಿಕ್ ಮೋಟಾರ್‌ಸೈಕಲ್‌ಗಳನ್ನು ವ್ಯಾಪಕ ಗ್ರಾಹಕರಿಗೆ ಪ್ರದರ್ಶಿಸಲು ನಮಗೆ ಅನುವು ಮಾಡಿಕೊಡುತ್ತದೆ. ಅದೇ ಸಮಯದಲ್ಲಿ ಅನ್ವೇಷಣೆ, ಬುಕಿಂಗ್ ಮತ್ತು ವಿತರಣೆಯಲ್ಲಿ ಉತ್ತಮ ಅನುಭವವನ್ನು ನೀಡುತ್ತದೆ.

ನಮ್ಮ ವಿಸ್ತರಿಸುತ್ತಿರುವ ಶೋರೂಂ ಮತ್ತು ಸೇವಾ ಜಾಲದೊಂದಿಗೆ ಸಂಯೋಜಿಸಲ್ಪಟ್ಟ ಈ ಡಿಜಿಟಲ್ ಉಪಸ್ಥಿತಿಯು ಗ್ರಾಹಕರು ತಮ್ಮ ಮೋಟಾರ್‌ಸೈಕಲ್‌ಗಳನ್ನು ಕೊನೆಯವರೆಗೆ ವಿಶ್ವಾಸದಿಂದ ಮೌಲ್ಯಮಾಪನ ಮಾಡಬಹುದು, ಖರೀದಿಸಬಹುದು ಮತ್ತು ನಿರ್ವಹಿಸಬಹುದು. ಒಬೆನ್ ಎಲೆಕ್ಟ್ರಿಕ್‌ನ ರೋರ್ ಇಝಡ್ ಸಿಗ್ಮಾ ಮತ್ತು ರೋರ್ ಇಝಡ್ ಅನ್ನು ಫ್ಲಿಪ್‌ಕಾರ್ಟ್‌ನ ಬೆಳೆಯುತ್ತಿರುವ ಎಲೆಕ್ಟ್ರಿಕ್ ವಾಹನ ಕೊಡುಗೆಗಳ ಪೋರ್ಟ್‌ಫೋಲಿಯೊಗೆ ತರಲು ನಾವು ಸಂತೋಷಪಡುತ್ತೇವೆ.

ಭಾರತದಾದ್ಯಂತ ಹೆಚ್ಚಿನ ಗ್ರಾಹಕರು ದೈನಂದಿನ ಪ್ರಯಾಣಕ್ಕಾಗಿ ಚುರುಕಾದ ಪರ್ಯಾಯಗಳನ್ನು ಅನ್ವೇಷಿಸುತ್ತಿದ್ದಂತೆ, ನಮ್ಮ ವಿಶ್ವಾಸಾರ್ಹ ಡಿಜಿಟಲ್ ಪ್ಲಾಟ್‌ಫಾರ್ಮ್ ಮತ್ತು ಉತ್ತಮ ವಿತರಣಾ ಅನುಭವದ ಮೂಲಕ ಪ್ರೀಮಿಯಂ ಇವಿಗಳನ್ನು ಹೆಚ್ಚು ಖರೀದಿಸುವಂತೆ ಮಾಡುವ ಗುರಿಯನ್ನು ನಾವು ಹೊಂದಿದ್ದೇವೆ'' ಎಂದು ಫ್ಲಿಪ್‌ಕಾರ್ಟ್‌ನ ಎಲೆಕ್ಟ್ರಾನಿಕ್ಸ್ ಮತ್ತು ಆಟೋಮೊಬೈಲ್ಸ್ ಉಪಾಧ್ಯಕ್ಷ ಸುಜಿತ್ ಅಗಾಶೆ ಹೇಳಿದರು.