ಅಗ್ಗದ ಬೈಕ್‌ಗೆ ಫುಲ್ ಡಿಮ್ಯಾಂಡ್: ಜನ ಮುಗಿಬಿದ್ದು ಖರೀದಿ... 60 ಕಿ.ಮೀ ಮೈಲೇಜ್

ಸೆಪ್ಟೆಂಬರ್ 16, 2021 ರಂದು ಬಿಡುಗಡೆಯಾಗಿದ್ದ ಟಿವಿಎಸ್ ರೈಡರ್ 125, ಆಗಸ್ಟ್ 2025 ರವರೆಗೆ ಜಾಗತಿಕವಾಗಿ 1.6 ಮಿಲಿಯನ್ (16 ಲಕ್ಷ) ಯುನಿಟ್‌ ವಾಹನಗಳ ಮಾರಾಟವನ್ನು ದಾಟುವ ಮೂಲಕ ಗಮನಾರ್ಹ ಮೈಲಿಗಲ್ಲನ್ನು ಸಾಧಿಸಿದೆ. ಈ ಸ್ಪೋರ್ಟಿ ಬಜೆಟ್ ಸ್ನೇಹಿ ಪ್ರಯಾಣಿಕ ಮೋಟಾರ್‌ಸೈಕಲ್ ಭಾರತದಲ್ಲಿ ಮತ್ತು ಪ್ರಮುಖ ರಫ್ತು ಮಾರುಕಟ್ಟೆಗಳಲ್ಲಿ ಅತ್ಯಂತ ಜನಪ್ರಿಯ ಮಾಡಲ್‌ಗಳಲ್ಲಿ ಒಂದಾಗಿ ಗುರ್ತಿಸಿಕೊಂಡಿದೆ. ಈ ಮೈಲಿಗಲ್ಲು ಟಿವಿಎಸ್ ರೈಡರ್ ಅನ್ನು ಬಿಡುಗಡೆಯಾದ ನಾಲ್ಕು ವರ್ಷಗಳಲ್ಲಿ ಬೆಸ್ಟ್ ಸೆಲ್ಲರ್ ಹಾಗೂ ರಫ್ತು ಮಾರುಕಟ್ಟೆಯ ಬಹುಬೇಡಿಕೆಯ ಬೈಕನ್ನಾಗಿಸಿದೆ.

ಇಲ್ಲಿಯವರೆಗೆ ಟಿವಿಎಸ್ ರೈಡರ್‌ನ 16,04,355 ಯುನಿಟ್‌ ವಾಹನಗಳನ್ನು ಮಾರಾಟ ಮಾಡಲಾಗಿದೆ, ಇದರಲ್ಲಿ 1.35 ಮಿಲಿಯನ್ (13 ಲಕ್ಷ) ಯುನಿಟ್‌ ವಾಹನಗಳು ದೇಶೀಯವಾಗಿ ಮಾರಾಟವಾಗಿವೆ. ಹಾಗೆಯೇ 2,45,000 ಕ್ಕೂ ಹೆಚ್ಚು ಯುನಿಟ್‌ ವಾಹನಗಳು ವಿದೇಶಗಳಿಗೆ ರಫ್ತು ಮಾಡಲ್ಪಟ್ಟಿವೆ. ಟಿವಿಎಸ್ ಮೋಟಾರ್‌ನ ಒಟ್ಟು ಮೋಟಾರ್‌ಸೈಕಲ್ ಮಾರಾಟದಲ್ಲಿ ಕೇವಲ ರೈಡರ್ ಮಾತ್ರ ಶೇ39 ರಷ್ಟು ಕೊಡುಗೆ ನೀಡಿದೆ ಎಂದು ವರದಿಯಾಗಿದೆ.

ರೈಡರ್‌ನ ಮಾರಾಟದ ವೇಗವು ಆರಂಭದಲ್ಲಿ ಬಲವಾದ ಬೆಳವಣಿಗೆಯನ್ನು ತೋರಿಸಿತು, ಆರ್ಥಿಕ ವರ್ಷ 2022 ರಲ್ಲಿ 76,742 ಯುನಿಟ್‌ ವಾಹನಗಳು ಮಾರಾಟವಾಗಿದ್ದವು. ಆರ್ಥಿಕ ವರ್ಷ 2023 ರಲ್ಲಿ ಸುಮಾರು 2.4 ಲಕ್ಷ ಯುನಿಟ್‌ ವಾಹನಗಳ ಮಾರಾಟದೊಂದಿಗೆ ಶೇ212 ಜಿಗಿತವನ್ನು ಕಂಡಿತು. ಈ ಮಾಡಲ್ 2024 ರ ಆರ್ಥಿಕ ವರ್ಷದಲ್ಲಿ ಉತ್ತುಂಗಕ್ಕೇರಿ, ಸುಮಾರು 4.8 ಲಕ್ಷ ಯುನಿಟ್‌ ವಾಹನಗಳ ಮಾರಾಟದೊಂದಿಗೆ ಟಿವಿಎಸ್‌ನ ಹೆಚ್ಚು ಮಾರಾಟವಾದ ಬೈಕ್ ಆಯಿತು.

ಟಿವಿಎಸ್ ರೈಡರ್ ರಫ್ತು ಕೂಡ ಬಲವಾಗಿದ್ದು, 2022 ರ ಹಣಕಾಸು ವರ್ಷದಲ್ಲಿ 22,000 ಕ್ಕೂ ಹೆಚ್ಚು ಯುನಿಟ್‌ ವಾಹನಗಳನ್ನು ರಫ್ತು ಮಾಡಲಾಗಿತ್ತು. 2025 ರ ಆರ್ಥಿಕ ವರ್ಷದಲ್ಲಿ 71,000 ಯುನಿಟ್‌ ವಾಹನಗಳಿಗೆ ಏರಿದೆ. ಇದು ರೈಡರ್‌ನ ಇದುವರೆಗಿನ ಅತ್ಯಧಿಕ ರಫ್ತು ವರ್ಷವಾಗಿದೆ. ರಫ್ತು ಆಕರ್ಷಣೆಯು ಬೆಳೆಯುತ್ತಲೇ ಇರುತ್ತದೆ ಎಂದು ನಿರೀಕ್ಷಿಸಲಾಗಿದ್ದು, ಬೇಡಿಕೆ ಕುಸಿಯದೆ ಮುನ್ನುಗ್ಗುತ್ತಿದೆ.

ಸ್ಪೋರ್ಟಿ 125 ಸಿಸಿ ಕಮ್ಯೂಟರ್ ವಿಭಾಗದಲ್ಲಿ ಹೀರೋ ಎಕ್ಸ್‌ಟ್ರೀಮ್ 125R, ಬಜಾಜ್ ಪಲ್ಸರ್ N125 ಮತ್ತು ಹೋಂಡಾ CB125 ಹಾರ್ನೆಟ್‌ನಂತಹ ಪ್ರತಿಸ್ಪರ್ಧಿಗಳಿಗೆ ಟಿವಿಎಸ್ ರೈಡರ್ 125 ಹೆಚ್ಚಿನ ಪೈಪೋಟಿ ನೀಡುತ್ತದೆ. ಸದ್ಯ ಭಾರತೀಯ ದ್ವಿಚಕ್ರ ಮೋಟಾರ್‌ಸೈಕಲ್ ವಿಭಾಗದಲ್ಲಿ ರೈಡರ್ ಅತ್ಯಾಧುನಿಕ ಹಾಗೂ ಆಕರ್ಷಕ ಡಿಸೈನ್‌ನೊಂದಿಗೆ ಸಿಗುವ ಬೆಸ್ಟ್ ಆಯ್ಕೆಯಾಗಿದೆ.

ಟಿವಿಎಸ್ ರೈಡರ್ ವಿಶೇಷತೆಗಳು: ಟಿವಿಎಸ್ ರೈಡರ್ 125 ರೂ. 87,625 ನಿಂದ ರೂ. 1,15,000 ಎಕ್ಸ್-ಶೋರೂಂ ಬೆಲೆಯಲ್ಲಿ ಖರೀದಿಗೆ ಲಭ್ಯವಿದೆ. ಆನ್-ರೋಡ್ ಬೆಲೆಗಳು ನಗರದಿಂದ ನಗರಕ್ಕೆ ಬದಲಾಗುತ್ತವೆ. ಆದರೆ ಸಾಮಾನ್ಯವಾಗಿ ಸ್ಥಳ ಮತ್ತು ವೇರಿಯೆಂಟ್ ಅವಲಂಬಿಸಿ ರೂ. 1.06 ಲಕ್ಷದಿಂದ ರೂ. 1.32 ಲಕ್ಷದವರೆಗೆ ಇರುತ್ತದೆ. (ಇವು ಅಂದಾಜು ಬೆಲೆಗಳು)

ಎಂಜಿನ್ ವಿಷಯಕ್ಕೆ ಬಂದರೆ 124.8 ಸಿಸಿ, ಸಿಂಗಲ್-ಸಿಲಿಂಡರ್, ಏರ್-ಅಂಡ್-ಆಯಿಲ್-ಕೂಲ್ಡ್, 3-ವಾಲ್ವ್, ಫ್ಯೂಲ್ - ಇಂಜೆಕ್ಟೆಡ್ SI ಎಂಜಿನ್ ಹೊಂದಿದೆ. ಈ ಎಂಜಿನ್ 11.2 bhp (11.38 PS) ಪವರ್ ಹಾಗೂ 11.2 Nm ಟಾರ್ಕ್ ಹೊರಹಾಕುತ್ತದೆ. 5-ಸ್ಪೀಡ್ ಗೇರ್‌ಬಾಕ್ಸ್ ನೀಡಲಾಗಿದೆ. 10 ಲೀಟರ್ ಇಂಧನ ಟ್ಯಾಂಕ್ ಸಾಮರ್ಥ್ಯವಿದ್ದು, ARAI-ಪ್ರಮಾಣೀಕೃತ ಮೈಲೇಜ್ 56.7 ರಿಂದ 60 ಕಿ.ಮೀ ಇದೆ.

ಸ್ಪೀಡೋಮೀಟರ್, ಟ್ಯಾಕೋಮೀಟರ್, ಟ್ರಿಪ್-ಮೀಟರ್, ಸರ್ವಿಸ್ ರಿಮೈಂಡರ್ ಮತ್ತು ಡಿಸ್ಟನ್ಸ್ ಟು ಎಂಪ್ಟಿ ಇಂಡಿಕೇಟರ್ ಸೇರಿದಂತೆ ಬ್ಲೂಟೂತ್ ಸಂಪರ್ಕದೊಂದಿಗೆ (ಸ್ಮಾರ್ಟ್‌ಕ್ಸನೆಕ್ಟ್) ಸಂಪೂರ್ಣ ಡಿಜಿಟಲ್ TFT ಡಿಸ್ಪ್ಲೇ ಹೋಂದಿದೆ. ಕೆಲವು ಟಾಪ್ ವೇರಿಯೆಂಟ್‌ಗಳಲ್ಲಿ ಸ್ಪ್ಲಿಟ್ ಸೀಟ್ ವಿನ್ಯಾಸ, ಸೀಟಿನ ಕೆಳಗೆ ಸಂಗ್ರಹಣೆ, USB ಚಾರ್ಜಿಂಗ್ ಪೋರ್ಟ್, ಇಂಧನ ಉಳಿತಾಯಕ್ಕಾಗಿ ಐಡಲ್ ಸ್ಟಾಪ್-ಸ್ಟಾರ್ಟ್ ಸಿಸ್ಟಮ್ ಇದೆ.

ಒಟ್ಟಾರೆ ಈ ಎಲ್ಲಾ ಅಂಶಗಳು 125 ಸಿಸಿ ಕಮ್ಯೂಟರ್ ಮೋಟಾರ್‌ಸೈಕಲ್ ವಿಭಾಗದಲ್ಲಿ ಇದನ್ನು ಪ್ರಬಲ ಸ್ಪರ್ಧಿಯನ್ನಾಗಿ ಮಾಡಿದೆ. ರೈಡರ್‌ನ ಯಶಸ್ಸು ಪ್ರಯಾಣಿಕ ಸ್ನೇಹಿ ಬೆಲೆಗಳೊಂದಿಗೆ ಸ್ಪೋರ್ಟಿ ಸೌಂದರ್ಯವನ್ನು ಬಯಸುವ ಯುವ, ನಗರ ಸವಾರರನ್ನು ಗುರಿಯಾಗಿಸುವ ಟಿವಿಎಸ್‌ನ ತಂತ್ರವನ್ನು ಪ್ರತಿಬಿಂಬಿಸುತ್ತದೆ. ಇದು ಸ್ಪರ್ಧಾತ್ಮಕ 125 ಸಿಸಿ ವಿಭಾಗದಲ್ಲಿ ಪ್ರಮುಖ ಬೈಕನ್ನಾಗಿ ಮಾಡುತ್ತದೆ.