ಕಮ್ಮಿ ಬೆಲೆಯ ಪರ್ಫೆಕ್ಟ್ ಸ್ಕೂಟರ್ ಖರೀದಿಸಲು ಗೊಂದಲವೇ? ಇವೆರಡು ಫುಲ್ ಟ್ರೆಂಡಿಂಗ್: ಯಾವುದು ಬೆಸ್ಟ್?

ಭಾರತದಲ್ಲಿ ಸ್ಕೂಟರ್‌ಗಳು ದಿನನಿತ್ಯದ ಒಡನಾಡಿಗಳಾಗಿವೆ, ಪ್ರತಿ ತಿಂಗಳು ದಾಖಲೆ ಮಟ್ಟದಲ್ಲಿ 125cc ಸ್ಕೂಟರ್‌ಗಳು ದೇಶದಲ್ಲಿ ಮಾರಾಟ ಕಾಣುತ್ತವೆ. ಮಹಿಳೆಯರಿಂದ ಹಿಡಿದು ವೃದ್ಧರವರೆಗೆ ಓಡಿಸಬಹುದಾದ 125cc ಸ್ಕೂಟರ್ ವಿಭಾಗವು ತುಂಬಾ ಬೇಡಿಕೆಯನ್ನು ಪಡೆದುಕೊಂಡಿದೆ. ಪ್ರಮುಖ ಕಂಪನಿಗಳು ಮೈಲೇಜ್ ಜೊತೆಗೆ ಉತ್ತಮ ಫೀಚರ್ಸ್, ಆಕರ್ಷಕ ಡಿಸೈನ್‌ನೊಂದಿಗೆ ತಮ್ಮ ಸ್ಕೂಟರ್‌ಗಳನ್ನು ಮಾರುಕಟ್ಟೆಗೆ ಪರಿಚಯಿಸಿವೆ. ಈ ವಿಭಾಗದಲ್ಲಿ ಹಲವಾರು ಕಂಪನಿಗಳ ಸ್ಕೂಟರ್‌ಗಳು ಇರುವುದರಿಂದ ಖರೀದಿದಾರರಿಗೆ ಯಾವುದನ್ನು ಖರೀದಿಸಬೇಕು ಎಂಬುದರ ಬಗ್ಗೆ ಗೊಂದಲವಿದೆ. ಅಂಥವರಿಗಾಗಿ ಉತ್ತಮ ಮಾರಾಟ ಕಾಣುವ ಎರಡು ಸ್ಕೂಟರ್‌ಗಳನ್ನು ಇಲ್ಲಿ ಹೋಲಿಕೆ ಮಾಡಿದ್ದೇವೆ.

ದೈನಂದಿನ ಬಳಕೆಗೆ ಉತ್ತಮ ಮೈಲೇಜ್ ಮತ್ತು ನವೀಕರಿಸಿದ ಫೀಚರ್‌ಗಳೊಂದಿಗೆ ಭಾರತದಲ್ಲಿ ಅತ್ಯಂತ ಜನಪ್ರಿಯ 125cc ಸ್ಕೂಟರ್‌ಗಳನ್ನು ನೋಡುವ ಖರೀದಿದಾರರಿಗೆ ಸುಜುಕಿ ಆಕ್ಸೆಸ್ 125 ಹಾಗೂ ಹೀರೋ ಡೆಸ್ಟಿನಿ 125 ಬೆಸ್ಟ್ ಆಯ್ಕೆಯಾಗಿವೆ. ಎರಡೂ ಸ್ಕೂಟರ್‌ಗಳು ಏರ್-ಕೂಲ್ಡ್, ಸಿಂಗಲ್-ಸಿಲಿಂಡರ್ ಎಂಜಿನ್‌ಗಳನ್ನು ಹೊಂದಿದ್ದು, ದೈನಂದಿನ ಪ್ರಯಾಣಕ್ಕೆ ಉತ್ತಮ ಚಾಲನಾ ಅನುಭವ ನೀಡುತ್ತವೆ, ಆದರೆ ಇವೆರಡಲ್ಲಿ ಯಾವದು ಬೆಸ್ಟ್ ನೋಡೋಣ ಬನ್ನಿ.

ಬೆಲೆ: ಭಾರತೀಯ ಮಾರುಕಟ್ಟೆಯಲ್ಲಿ ಪ್ರಸ್ತುತ ಡೆಸ್ಟಿನಿ 125 ಸ್ಕೂಟರ್ ಆರಂಭಿಕ ಬೆಲೆಯು ರೂ. 78,405 (ಎಕ್ಸ್ - ಶೋರೂಂ) ರಿಂದ ಪ್ರಾರಂಭವಾಗಿ ರೂ. 87,986 (ಎಕ್ಸ್ - ಶೋರೂಂ) ವರೆಗೆ ಇದೆ. ಹಾಗೆಯೇ ಸುಜುಕಿ ಆಕ್ಸೆಸ್ 125 ಬೆಲೆ ಆರಂಭಿಕ ಬೆಲೆಯು ರೂ. 81,508 (ಎಕ್ಸ್ - ಶೋರೂಂ) ರಿಂದ ರೂ. 97,202 (ಎಕ್ಸ್ - ಶೋರೂಂ) ರವರೆಗೆ ಇದೆ.

ಫೀಚರ್ಸ್ ಮತ್ತು ಪ್ರಾಯೋಗಿಕತೆ

ಹೀರೋ ಡೆಸ್ಟಿನಿ 125 ಸ್ಕೂಟರ್ ವಿನ್ಯಾಸವು ಸ್ವಲ್ಪ ಸ್ಪೋರ್ಟಿಯರ್ ಆಗಿದ್ದು, ದೈನಂದಿನ ಬಳಕೆಗೆ ಸೂಕ್ತವಾಗಿದೆ. LED ಲೈಟಿಂಗ್, USB ಚಾರ್ಜರ್ ಮತ್ತು ಬಾಹ್ಯ ಇಂಧನ ತುಂಬುವಿಕೆಯನ್ನು ಹೊಂದಿದೆ. ಹೀರೋ ಮೋಟೋಕಾರ್ಪ್ ಡ್ರಮ್ ಮತ್ತು ಡಿಸ್ಕ್ ಬ್ರೇಕ್ ಆಯ್ಕೆಗಳನ್ನು ಒದಗಿಸುತ್ತದೆ, ತನ್ನ ಡಿಜಿಟಲ್ ಕನ್ಸೋಲ್ ಮೂಲಕ ನ್ಯಾವಿಗೇಷನ್ ಮತ್ತು ಕರೆ ಎಚ್ಚರಿಕೆಗಳೊಂದಿಗೆ ಬ್ಲೂಟೂತ್ ಸಂಪರ್ಕವನ್ನು ಸಹ ನೀಡಲಾಗಿದೆ. ಇದು ಕಂಬೈನ್ಡ್ ಬ್ರೇಕಿಂಗ್ ಸಿಸ್ಟಮ್ ಪಡೆದುಕೊಂಡಿದೆ.

ಸುಜುಕಿ ಆಕ್ಸೆಸ್ 125 LED ಹೆಡ್‌ಲ್ಯಾಂಪ್‌ಗಳು, ಬಾಹ್ಯ ಇಂಧನ ತುಂಬುವಿಕೆ, USB ಚಾರ್ಜಿಂಗ್, ಕರೆ ಎಚ್ಚರಿಕೆಗಳು, SMS ನೋಟಿಫಿಕೇಷನ್‌ಗಳು ಮತ್ತು ಟರ್ನ್-ಬೈ-ಟರ್ನ್ ನ್ಯಾವಿಗೇಷನ್ ಹೊಂದಿದೆ. ಬ್ಲೂಟೂತ್-ಹೊಂದಿರುವ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್‌ನೊಂದಿಗೆ ಬರುತ್ತದೆ, ಒಟ್ಟಾರೆ ವಿನ್ಯಾಸವು ಬಳಕೆಯ ಸುಲಭತೆ ಮತ್ತು ಪ್ರಾಯೋಗಿಕ ಫೀಚರ್‌ಗಳ ಮೇಲೆ ಕೇಂದ್ರೀಕರಿಸುತ್ತದೆ. ಇದು ಕೂಡ ಕಂಬೈನ್ಡ್ ಬ್ರೇಕಿಂಗ್ ಸಿಸ್ಟಮ್ ಪಡೆದುಕೊಂಡಿದೆ.

ಎಂಜಿನ್ ಮತ್ತು ಪರ್ಫಾಮೆನ್ಸ್

ಸುಜುಕಿ ಆಕ್ಸೆಸ್ ಸ್ಕೂಟರ್ 124 ಸಿಸಿ, ಸಿಂಗಲ್-ಸಿಲಿಂಡರ್, ಏರ್-ಕೂಲ್ಡ್ ಎಂಜಿನ್‌ನಿಂದ ನಿಯಂತ್ರಿಸಲ್ಪಡುತ್ತದೆ, ಇದು ಸುಮಾರು 8.31 ಎಚ್‌ಪಿ ಪವರ್ ಮತ್ತು 10.2 ಎನ್‌ಎಂ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. ಸುಗಮ ಥ್ರೊಟಲ್ ಪ್ರತಿಕ್ರಿಯೆ ಮತ್ತು ಸ್ಥಿರವಾದ ಪರ್ಫಾಮೆನ್ಸ್ ನೀಡುತ್ತದೆ. ಇದು ನಗರ ಸಂಚಾರ ಮತ್ತು ಸಣ್ಣ ಹೆದ್ದಾರಿ ಓಟಗಳಿಗೆ ಸೂಕ್ತವಾಗಿದೆ. ಸುಜುಕಿ ಆಕ್ಸೆಸ್ ಸ್ಕೂಟರ್ ಸುಮಾರು 45 ಕಿ.ಮೀ ಮೈಲೇಜ್ ನೀಡುತ್ತದೆ.

ಹೀರೋ ಡೆಸ್ಟಿನಿ ಸ್ಕೂಟರ್ 124.6 ಸಿಸಿ, ಸಿಂಗಲ್-ಸಿಲಿಂಡರ್, ಏರ್-ಕೂಲ್ಡ್ ಎಂಜಿನ್ ಹೊಂದಿದೆ, ಇದು ಸುಮಾರು 9 ಎಚ್‌ಪಿ ಪವರ್ ಮತ್ತು 10.4 ಎನ್‌ಎಂ ಟಾರ್ಕ್ ಹೊರಹಾಕುತ್ತದೆ. ಇದು ಆಕ್ಸೆಸ್ 125 ಗಿಂತ ಸ್ವಲ್ಪ ಹೆಚ್ಚಿನ ಪವರ್ ಮತ್ತು ಟಾರ್ಕ್ ನೀಡುತ್ತದೆ. ಇದು ಸ್ವಲ್ಪ ಹೆಚ್ಚಿನ ಆರಂಭಿಕ ಪಿಕಪ್ ಹೊಂದಿದೆ, ಸವಾರಿ ಪರಿಸ್ಥಿತಿಗಳನ್ನು ಅವಲಂಬಿಸಿ 40 ಕಿ.ಮೀ ಮೈಲೇಜ್ ನೀಡುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ.

ಸುಜುಕಿ ಆಕ್ಸೆಸ್ 125 ಸ್ಥಿರ ಕಾರ್ಯಕ್ಷಮತೆ ಮತ್ತು ಸಂಸ್ಕರಿಸಿದ ಎಂಜಿನ್ ಪ್ರತಿಕ್ರಿಯೆಗೆ ಖ್ಯಾತಿಯನ್ನು ಗಳಿಸಿದೆ, ಆದರೆ ಹೀರೋ ಡೆಸ್ಟಿನಿ 125 ಹೆಚ್ಚಿನ ಟಾರ್ಕ್ ಮತ್ತು ಹೊಸ ತಂತ್ರಜ್ಞಾನವನ್ನು ಬಯಸುವ ಖರೀದಿದಾರರಿಗೆ ಬೆಸ್ಟ್ ಆಯ್ಕೆಯಾಗಿದೆ. ಎರಡೂ ಸ್ಕೂಟರ್‌ಗಳ ಬಗ್ಗೆ ವಿವರವಾದ ಮಾಹಿತಿ ತಿಳಿದ ಬಳಿಕ ನಿಮ್ಮ ಅನಿಸಿಕೆಗಳನ್ನು ಕಮೆಂಟ್‌ನಲ್ಲಿ ತಿಳಿಸಿ.