ರಾಯಲ್ ಎನ್‌ಫೀಲ್ಡ್‌ನ ಹೊಸ Flying Flea S6 ಎಲೆಕ್ಟ್ರಿಕ್ ಸ್ಕ್ರ್ಯಾಂಬ್ಲರ್ ಅನಾವರಣ: ಆಫ್-ರೋಡ್ ಪ್ರಿಯರಿಗೆ ಇದುವೇ ಬೆಸ್ಟ್ ಆಯ್ಕೆ?

ರಾಯಲ್ ಎನ್‌ಫೀಲ್ಡ್ ತನ್ನ ಎರಡನೇ ಎಲೆಕ್ಟ್ರಿಕ್ ಬೈಕ್ 'ಫ್ಲೈಯಿಂಗ್ ಫ್ಲೀ S6' (Flying Flea S6) ಎಲೆಕ್ಟ್ರಿಕ್ ಸ್ಕ್ರ್ಯಾಂಬ್ಲರ್ ಅನ್ನು ಇಟಲಿಯ ಮಿಲಾನ್‌ನಲ್ಲಿ ನಡೆಯುತ್ತಿರುವ EICMA ಆಟೋ ಶೋನಲ್ಲಿ ಇಂದು ಅನಾವರಣಗೊಳಿಸಿದೆ. ಫ್ಲೈಯಿಂಗ್ ಫ್ಲೀ ಬ್ರ್ಯಾಂಡ್ ಅಡಿಯಲ್ಲಿ ಹೊರಬರುತ್ತಿರುವ ಕಂಪನಿಯ ಎರಡನೇ ಇ-ಬೈಕ್ ಇದಾಗಿದೆ. ಬೈಕ್‌ನ ಸ್ಪೆಸಿಫಿಕೇಷನ್ ಹಾಗೂ ಬೆಲೆಯನ್ನು ರಾಯಲ್ ಎನ್‌ಫೀಲ್ಡ್ ಸದ್ಯಕ್ಕೆ ಗುಟ್ಟಾಗಿಟ್ಟಿದೆ. ಭಾರತೀಯ ಮಾರುಕಟ್ಟೆಗೆ 2027ರ ಬೇಸಿಗೆಯ ವೇಳೆಗೆ ಇದು ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಸ್ಥಳೀಯ ಉತ್ಪಾದನೆಗೆ ಅನುಗುಣವಾಗಿ ಇದರ ಬೆಲೆ 2 ರಿಂದ 3 ಲಕ್ಷ ರೂಪಾಯಿ ಆಸುಪಾಸಿನಲ್ಲಿ ಇರಬಹುದು. ಪ್ರಸ್ತುತ S6 ಬುಕಿಂಗ್‌ಗಳು ಇನ್ನೂ ಆರಂಭವಾಗಿಲ್ಲ.

ಸರಳವಾಗಿ ಹೇಳಬೇಕೆಂದರೆ, S6 ಬೈಕ್ C6 ಮಾಡೆಲ್‌ಗಿಂತಲೂ ಹೆಚ್ಚು ರಫ್ ಅಂಡ್ ಟಫ್ ಆಗಿದೆ. C6 ನಲ್ಲಿದ್ದ ಗಿರ್ಡರ್ ಫೋರ್ಕ್ ಬದಲಿಗೆ ಇದರಲ್ಲಿ ಅಪ್‌ಸೈಡ್‑ಡೌನ್ (USD) ಫೋರ್ಕ್‌ ಹಾಗೂ ರಫ್ ಯೂಸ್‌ಗಾಗಿ ಬೆಲ್ಟ್ ಬದಲಿಗೆ ಚೈನ್ ಡ್ರೈವ್ ಬಳಸಲಾಗಿದೆ. ಮುಂದೆ 19-ಇಂಚು ಮತ್ತು ಹಿಂದೆ 18-ಇಂಚಿನ ವೀಲ್‌ಗಳು, ಆಫ್-ರೋಡ್ ನಾಬಿ ಟೈರ್‌ಗಳು ಹಾಗೂ ವಿಶೇಷ ಆಫ್-ರೋಡ್ ಮೋಡ್‌ಗಳು ಇದರಲ್ಲಿದ್ದು, ರಫ್ ರೈಡಿಂಗ್‌ಗೆ ಸೈ ಎನಿಸಿಕೊಳ್ಳಲಿದೆ. ಪ್ರದರ್ಶನದಲ್ಲಿ ಈ ಬೈಕ್ 'ಡಾರ್ಟ್ ಯೆಲ್ಲೋ' ಮತ್ತು 'ಲೈಟ್ನಿಂಗ್ ಗ್ರೇ' ಬಣ್ಣಗಳಲ್ಲಿ ಕಣ್ಣಸೆಳೆದಿದೆ.

ಫ್ಲೈಯಿಂಗ್ ಫ್ಲೀ S6 ಎಲೆಕ್ಟ್ರಿಕ್: ಭಾರತದಲ್ಲಿ ಬಿಡುಗಡೆ ಯಾವಾಗ? ಬೆಲೆ ಎಷ್ಟಿರಬಹುದು?

ರಾಯಲ್ ಎನ್‌ಫೀಲ್ಡ್ ಈ ಹಿಂದೆ ಹೇಳಿದ್ದಕ್ಕಿಂತ ಕೊಂಚ ತಡವಾಗಿ ಈ ಬೈಕ್ ಅನ್ನು ಮಾರುಕಟ್ಟೆಗೆ ತರಲಿದೆ. ಕಳೆದ ವರ್ಷ 2026ರ ಕೊನೆಯಲ್ಲಿ ತರುವುದಾಗಿ ಹೇಳಿದ್ದ ಕಂಪನಿ, ಈಗ 2027ರ ಬೇಸಿಗೆಯಲ್ಲಿ ಭಾರತೀಯ ರಸ್ತೆಗೆ ಇಳಿಸುವುದಾಗಿ ತಿಳಿಸಿದೆ. ತಮಿಳುನಾಡಿನ ವಲ್ಲಮ್ ವಡಗಲ್‌ನಲ್ಲಿರುವ ಫ್ಲೈಯಿಂಗ್ ಫ್ಲೀ ಪ್ರತ್ಯೇಕ ಪ್ಲಾಂಟ್‌ನಲ್ಲಿ ಸ್ಥಳೀಯ ಬಿಡಿಭಾಗಗಳ ಜೋಡಣೆ ಕಾರ್ಯ ಈಗಾಗಲೇ ಆರಂಭವಾಗಿದೆ. ಆರಂಭದಲ್ಲಿ ಮೆಟ್ರೋ ನಗರಗಳಲ್ಲಿ ಇದು ಲಭ್ಯವಾಗಲಿದ್ದು, ಸದ್ಯಕ್ಕೆ C6 ಬೈಕ್‌ನ ಬುಕಿಂಗ್ ಬೆಂಗಳೂರು, ಹೈದರಾಬಾದ್ ಮತ್ತು ಪುಣೆಯಲ್ಲಿ ಮಾತ್ರ ಮುಂದುವರಿದಿದೆ.

ಫ್ಲೈಯಿಂಗ್ ಫ್ಲೀ S6 ಎಲೆಕ್ಟ್ರಿಕ್: ಭಾರತೀಯ ಮಾಡೆಲ್‌ನಲ್ಲಿ ಏನೆಲ್ಲಾ ಫೀಚರ್‌ಗಳಿರಲಿವೆ?

ಈ ಬೈಕ್‌ನಲ್ಲಿ ಫ್ಲೈವೇರ್.ಒಎಸ್ (Fleaware.OS) ಚಾಲಿತ 3.5-ಇಂಚಿನ ರೌಂಡ್ ಟಿಎಫ್‌ಟಿ ಡಿಸ್‌ಪ್ಲೇ ಪ್ರಮುಖ ಆಕರ್ಷಣೆಯಾಗಲಿದೆ. ಕ್ವಾಲ್ಕಾಮ್‌ನ ಸ್ನ್ಯಾಪ್‌ಡ್ರಾಗನ್ QWM2290 ಪ್ಲಾಟ್‌ಫಾರ್ಮ್ ಬೆಂಬಲದೊಂದಿಗೆ ಬ್ಲೂಟೂತ್, 4G, ವೈ-ಫೈ, ಓವರ್-ದಿ-ಏರ್ (OTA) ಅಪ್‌ಡೇಟ್‌ಗಳು ಮತ್ತು ವಾಯ್ಸ್ ಅಸಿಸ್ಟ್ ಸೌಲಭ್ಯಗಳು ಸಿಗಲಿವೆ. ಜೊತೆಗೆ 6 ರೈಡಿಂಗ್ ಮೋಡ್‌ಗಳು, ಲೀನ್-ಸೆನ್ಸಿಟಿವ್ ABS, ಟ್ರ್ಯಾಕ್ಷನ್ ಕಂಟ್ರೋಲ್ ಹಾಗೂ ಬೈಡೈರೆಕ್ಷನಲ್ ಕ್ರಾಲ್ ಫಂಕ್ಷನ್ ಸಹ ಇರಲಿದೆ ಎಂದು ವರದಿಗಳು ತಿಳಿಸಿವೆ. ಆದರೆ ಬ್ಯಾಟರಿ ಸಾಮರ್ಥ್ಯ, ರೇಂಜ್ ಮತ್ತು ಚಾರ್ಜಿಂಗ್ ವೇಗದ ಮಾಹಿತಿಯನ್ನು ಕಂಪನಿ ಇನ್ನೂ ಬಿಟ್ಟುಕೊಟ್ಟಿಲ್ಲ.

ಫ್ಲೈಯಿಂಗ್ ಫ್ಲೀ S6 ಎಲೆಕ್ಟ್ರಿಕ್: ಮಾರುಕಟ್ಟೆಯಲ್ಲಿ ಯಾರಿಗೆ ಪೈಪೋಟಿ?

ಭಾರತದಲ್ಲಿ S6 ಸಾಮಾನ್ಯ ಇ-ಸ್ಕೂಟರ್‌ಗಳಿಗಿಂತ ಹೆಚ್ಚಾಗಿ ಪರ್ಫಾರ್ಮೆನ್ಸ್ ಎಲೆಕ್ಟ್ರಿಕ್ ಬೈಕ್‌ಗಳಿಗೆ ತೀವ್ರ ಸ್ಪರ್ಧೆ ನೀಡಲಿದೆ. ಬೆಲೆ ಮತ್ತು ಕಾರ್ಯಕ್ಷಮತೆಯ ವಿಷಯದಲ್ಲಿ ಅಲ್ಟ್ರಾವಯೊಲೆಟ್‌ನ ಮುಂಬರುವ 'ಶಾಕ್‌ವೇವ್' ಮತ್ತು ಟಾರ್ಕ್‌ನ ಟಾಪ್-ಎಂಡ್ 'ಕ್ರಾಟೋಸ್' ಮಾಡೆಲ್‌ಗಳಿಗೆ ಇದು ಸವಾಲಾಗಲಿದೆ. ಅಷ್ಟೇ ಅಲ್ಲ, ಹೀರೋ ಎಕ್ಸ್‌ಪಲ್ಸ್ 210 ಮತ್ತು ಕವಾಸಕಿ KLX230 ನಂತಹ ಪೆಟ್ರೋಲ್ ಆಫ್-ರೋಡ್ ಬೈಕ್ ಪ್ರಿಯರನ್ನೂ ಇದು ಸೆಳೆಯುವ ಸಾಧ್ಯತೆಯಿದೆ. ನವೆಂಬರ್ 3-4 ರಂದು EICMA ಪ್ರೆಸ್ ಡೇಸ್ ನಡೆಯುತ್ತಿದ್ದು, ಈ ವಾರದ ಮಧ್ಯಭಾಗದಲ್ಲಿ ಭಾರತಕ್ಕೆ ಸಂಬಂಧಿಸಿದ ಮತ್ತಷ್ಟು ಅಪ್‌ಡೇಟ್‌ಗಳು ಹೊರಬೀಳಬಹುದು.

ಆಫ್-ರೋಡಿಂಗ್ ಕ್ರೇಜ್ ಇರುವ ರಾಯಲ್ ಎನ್‌ಫೀಲ್ಡ್ ಅಭಿಮಾನಿಗಳಿಗೆ S6 ರೂಪದಲ್ಲಿ ಅತ್ಯುತ್ತಮ ಎಲೆಕ್ಟ್ರಿಕ್ ಆಯ್ಕೆ ಸಿಕ್ಕಂತಾಗಿದೆ. ಬಣ್ಣ, ಫೀಚರ್‌ಗಳು ಹಾಗೂ ಭಾರತೀಯ ಆವೃತ್ತಿಯ ಹೆಚ್ಚಿನ ಮಾಹಿತಿಗಳು ಈ ವಾರದಲ್ಲಿ ಮತ್ತು ಈ ತಿಂಗಳ ಕೊನೆಯಲ್ಲಿ ಗೋವಾದಲ್ಲಿ ನಡೆಯಲಿರುವ 'ಮೋಟೋವರ್ಸ್' (Motoverse) ಕಾರ್ಯಕ್ರಮದಲ್ಲಿ ಸ್ಪಷ್ಟವಾಗಲಿವೆ. ಬೆಲೆ ಮತ್ತು ರೇಂಜ್ ವಿವರಗಳು ಅಧಿಕೃತವಾಗಿ ಹೊರಬರುವವರೆಗೆ, ಸಿ6 ಬೈಕ್‌ನ ರೋಲ್‌ಔಟ್ ಮಾದರಿಯೇ ನಮಗೆ ಪ್ರಮುಖ ಸೂಚನೆಯಾಗಲಿದೆ.