ಯಮಹಾ R2 ಬಿಡುಗಡೆ: R15 ಗಿಂತ ಪವರ್‌ಫುಲ್, ಬೆಲೆ ಮತ್ತು ಫೀಚರ್ಸ್ ನೋಡಿ ದಂಗಾಗ್ತೀರಾ!

ಭಾರತೀಯ ಬೈಕ್ ಮಾರುಕಟ್ಟೆಗೆ ಯಮಹಾ ಸಂಸ್ಥೆ ತನ್ನ ಬಹುನಿರೀಕ್ಷಿತ 'ವೈಝಡ್‌ಎಫ್-ಆರ್‌2' (Yamaha YZF-R2) ಸ್ಪೋರ್ಟ್ಸ್ ಬೈಕ್ ಅನ್ನು ಬಿಡುಗಡೆ ಮಾಡಿದೆ. ದೆಹಲಿಯಲ್ಲಿ ಇದರ ಎಕ್ಸ್‌ಶೋರೂಮ್ ಬೆಲೆ ₹2.30 ಲಕ್ಷ ನಿಗದಿಯಾಗಿದೆ. ಯಮಹಾದ ಅಧಿಕೃತ ಇ-ಶಾಪ್‌ನಲ್ಲಿ ಈಗಾಗಲೇ ₹10,000 ಮುಂಗಡ ಹಣ ನೀಡಿ ಬುಕ್ ಮಾಡಿಕೊಳ್ಳಬಹುದು. ಸೆಪ್ಟೆಂಬರ್ ಮಧ್ಯಭಾಗದಿಂದ ಯಮಹಾದ ಪ್ರೀಮಿಯಂ 'ಬ್ಲೂ ಸ್ಕ್ವೇರ್' ಶೋರೂಮ್‌ಗಳ ಮೂಲಕ ಡೆಲಿವರಿ ಆರಂಭವಾಗಲಿದೆ. R15 ಗಿಂತ ಮೇಲಿನ ಶ್ರೇಣಿಯಲ್ಲಿ ಕಾಣಿಸಿಕೊಂಡಿರುವ ಈ ಬೈಕ್ ಮೂರು ವೇರಿಯೆಂಟ್ ಹಾಗೂ ಐದು ಅತ್ಯಾಕರ್ಷಕ ಬಣ್ಣಗಳಲ್ಲಿ ಸಿಗಲಿದೆ. ಪ್ರಮುಖ ನಗರಗಳ ಆನ್‌ರೋಡ್ ಬೆಲೆ, ವೈಶಿಷ್ಟ್ಯಗಳು ಮತ್ತು ಇಎಂಐ ವಿವರಗಳು ಇಲ್ಲಿವೆ.

200 ಸಿಸಿ ಬೈಕ್ ವಿಭಾಗದಲ್ಲೇ ಪ್ರೀಮಿಯಂ ಬಿಗ್‌-ಬೈಕ್ ಫೀಚರ್‌ಗಳನ್ನು ಹೊತ್ತು R2 ಬಂದಿದೆ. ಇದರಲ್ಲಿ ಸ್ಮಾರ್ಟ್‌ಫೋನ್ ಕನೆಕ್ಟಿವಿಟಿ ಹೊಂದಿರುವ 5-ಇಂಚಿನ ಟಿಎಫ್‌ಟಿ ಡಿಸ್‌ಪ್ಲೇ, ಟ್ರ್ಯಾಕ್ಷನ್ ಕಂಟ್ರೋಲ್ ಸಿಸ್ಟಮ್ (TCS), ಮೂರು ರೈಡಿಂಗ್ ಮೋಡ್‌ಗಳು, ಡ್ಯುಯಲ್-ಚಾನೆಲ್ ಎಬಿಎಸ್ ಮತ್ತು 37 mm ಯುಎಸ್‌ಡಿ ಫೋರ್ಕ್ ನೀಡಲಾಗಿದೆ. ಇದರ ಮಿಡ್ ವೇರಿಯೆಂಟ್‌ನಲ್ಲಿ ಬೈ-ಡೈರೆಕ್ಷನಲ್ ಕ್ವಿಕ್‌ಶಿಫ್ಟರ್ ಇದ್ದರೆ, ಟಾಪ್-ಎಂಡ್ M ವೇರಿಯೆಂಟ್‌ನಲ್ಲಿ ಅಡ್ಜಸ್ಟಬಲ್ ಸಸ್ಪೆನ್ಷನ್ ಮತ್ತು ಸ್ಮಾರ್ಟ್ ಕೀ ಸೌಲಭ್ಯ ಸಿಗಲಿದೆ. 204 ಸಿಸಿ ಎಂಜಿನ್ ಹೊಂದಿರುವ ಈ ಬೈಕ್ 26.5 ಬಿಹೆಚ್‌ಪಿ ಪವರ್ ಉತ್ಪಾದಿಸಲಿದ್ದು, ಬೈಕಿನ ಒಟ್ಟು ತೂಕ 149 ಕೆಜಿ ಇದೆ.

ಯಮಹಾ R2 ಆನ್‌ರೋಡ್ ಬೆಲೆ ಮತ್ತು ಇಎಂಐ ವಿವರ

ನಗರ	ಆನ್-ರೋಡ್ ಬೆಲೆ (ಬೇಸ್ ವೇರಿಯೆಂಟ್)
ಬೆಂಗಳೂರು	₹2,86,738
ದೆಹಲಿ	₹2,63,188
ಮುಂಬೈ	₹2,70,103
ಚೆನ್ನೈ	₹2,72,408
ಕೋಲ್ಕತಾ	₹2,67,798

'ಬೈಕ್‌ವೇಲ್' ಸಂಗ್ರಹಿಸಿದ ಡೀಲರ್ ಬೆಲೆ ಪಟ್ಟಿಯ ಆಧಾರದ ಮೇಲೆ ಈ ದರಗಳನ್ನು ಸಿದ್ಧಪಡಿಸಲಾಗಿದೆ. ಉದಾಹರಣೆಗೆ, ಬೆಂಗಳೂರಿನಲ್ಲಿ ಬೇಸ್ ವೇರಿಯೆಂಟ್ ಆನ್-ರೋಡ್ ಬೆಲೆಯಲ್ಲಿ ₹2,30,500 ಎಕ್ಸ್‌ಶೋರೂಮ್ ದರ, ₹42,990 ಆರ್‌ಟಿಒ ಶುಲ್ಕ ಮತ್ತು ₹12,748 ಕಾಂಪ್ರೆಹೆನ್ಸಿವ್ ಇನ್ಶೂರೆನ್ಸ್ ಸೇರಿದೆ. ಶೇಕಡಾ 10 ರಷ್ಟು ಬಡ್ಡಿದರದಲ್ಲಿ 36 ತಿಂಗಳ ಅವಧಿಗೆ ಅಂದಾಜು ಇಎಂಐ ₹9,837 ಬರಲಿದೆ. ಸ್ಥಳೀಯ ತೆರಿಗೆ ಮತ್ತು ಹೆಚ್ಚುವರಿ ಆಕ್ಸೆಸರೀಸ್ ಆಧಾರದ ಮೇಲೆ ಬೆಲೆಗಳು ಬದಲಾಗುವುದರಿಂದ, ಬುಕಿಂಗ್ ವೇಳೆ ನಿಖರ ವೆಚ್ಚವನ್ನು ಖಚಿತಪಡಿಸಿಕೊಳ್ಳುವುದು ಸೂಕ್ತ.

ಯಮಹಾ R2 ಗೆ ಪೈಪೋಟಿ ನೀಡುವ ಬೈಕ್‌ಗಳು: ಕೆಟಿಎಂ ಆರ್‌ಸಿ 200, ಪಲ್ಸರ್ ಆರ್‌ಎಸ್ 200, ಆರ್‌15 ವಿ4

ಅಾಧುನಿಕ ಎಲೆಕ್ಟ್ರಾನಿಕ್ಸ್ ಫೀಚರ್‌ಗಳು, ಹಗುರವಾದ ತೂಕ ಹಾಗೂ ದಿನನಿತ್ಯದ ಬಳಕೆಯ ಜೊತೆಗೆ ರೇಸ್ ಟ್ರ್ಯಾಕ್ ಅನುಭವ ಬಯಸುವವರಿಗೆ ಯಮಹಾ R2 ಸೂಕ್ತ ಆಯ್ಕೆ. ಇನ್ನು ಕಡಿದಾದ ಮೂಲೆಗಳಲ್ಲಿ ಆಕ್ರಮಣಕಾರಿ ರೇಸಿಂಗ್ ಇಷ್ಟಪಡುವವರಿಗೆ ಕೆಟಿಎಂ ಆರ್‌ಸಿ 200 ಬೆಸ್ಟ್. ಕಡಿಮೆ ನಿರ್ವಹಣಾ ವೆಚ್ಚ ಹಾಗೂ ಬಜೆಟ್ ಸ್ನೇಹಿ ಬಯಸುವವರಿಗೆ ಪಲ್ಸರ್ ಆರ್‌ಎಸ್ 200 ಸರಿಹೊಂದುತ್ತದೆ. ಹಾಗೆಯೇ ಉತ್ತಮ ಮೈಲೇಜ್, ಸ್ಮೂತ್ ರೈಡಿಂಗ್ ಹಾಗೂ ವ್ಯಾಪಕ ಸರ್ವಿಸ್ ನೆಟ್‌ವರ್ಕ್ ಬಯಸುವ ಹೊಸ ರೈಡರ್‌ಗಳಿಗೆ ಆರ್‌15 ವಿ4 ಸೂಕ್ತವಾಗಿದೆ.

ಸೆಪ್ಟೆಂಬರ್ ಮಧ್ಯಭಾಗದಿಂದ ಬ್ಲೂ ಸ್ಕ್ವೇರ್ ಶೋರೂಮ್‌ಗಳಿಗೆ ಮೊದಲ ಬ್ಯಾಚ್ ಬೈಕ್‌ಗಳು ತಲುಪಲಿದ್ದು, ಬೇಗ ಪಡೆಯಲು ಬಯಸುವವರು ಈಗಲೇ ಬುಕಿಂಗ್ ಮಾಡುವುದು ಒಳಿತು. "ವೈಝಡ್‌ಎಫ್-ಆರ್‌2 ಬರೀ ಹೊಸ ವಿಭಾಗಕ್ಕೆ ಪಾದಾರ್ಪಣೆಯಲ್ಲ; ಬದಲಿಗೆ ಯಮಹಾ ಆರ್‌-ಸಿರೀಸ್‌ನ ನೈಜ ಉತ್ಸಾಹವನ್ನು ಇಷ್ಟಪಡುವ ರೈಡರ್‌ಗಳಿಗಾಗಿಯೇ ಇದನ್ನು ವಿನ್ಯಾಸಗೊಳಿಸಲಾಗಿದೆ" ಎಂದು ಕಂಪನಿ ತಿಳಿಸಿದೆ. ಇನ್ನು ನಗರ ಮತ್ತು ಡೀಲರ್‌ಶಿಪ್‌ಗಳಿಗೆ ನೀಡಲಾಗುವ ಹಂಚಿಕೆಯ ಆಧಾರದ ಮೇಲೆ ಬಣ್ಣ ಹಾಗೂ ವೇರಿಯೆಂಟ್‌ಗಳ ವೇಟಿಂಗ್ ಪೀರಿಯಡ್ ಬದಲಾಗಬಹುದು.