ರಾತ್ರಿ ಸವಾರಿ: ಹೊಸ ಪ್ರೀತಿಗೆ ಬಿದ್ದ ಶಾಹಿದ್ ಕಪೂರ್

ಸೂರ್ಯ ಮುಳುಗಿದ ನಂತರ ಹಯಾಬುಸ ರೈಡ್ ಮಾಡೋ ಕ್ರೇಝ್ ಇವನದು. ಇತ್ತೀಚಿಗೆ ರಣಬೀರ್ ಕಪೂರ್ ಪಾರ್ಟಿಗೆ ಈತ ಬಂದಾಗ ಎಲ್ಲರೂ ಕಣ್ಣು ಈತನ ಹಯಾಬುಸದ ಮೇಲಿದ್ದದ್ದು ಸುಳ್ಳಲ್ಲ. ಅಷ್ಟು ಜೋಷಾಗಿ ಬಂದಿದ್ದನಂತೆ. ಪ್ರಿಯಾಂಕ ಛೋಪ್ರಾ ತನ್ನ ಪ್ರೀತಿಯ ಹಯಾಬುಸದಲ್ಲಿದ್ದರೆ ಸ್ವರ್ಗಕ್ಕೆ ಕಿಚ್ಚು ಹಚ್ಚೆಂದ ಶಾಹಿದ್ ಕಪೂರ್. ಬೈಕ್ ಬ್ಯೂಟಿ ಹಯಾಬುಸವೆಂದರೆ ಬರೀ ಶಾಹಿದ್ ಗೆ ಮಾತ್ರ ಇಷ್ಟವಲ್ಲ. ಜಾನ್ ಅಬ್ರಾಹಂನಿಂದ ಹಿಡಿದು, ಅರ್ಜುನ್ ರಾಂಪಾಲ್, ಅಜಯ್ ದೇವ್ ಗನ್, ಸಂಜಯ್ ದತ್ ಎಲ್ಲರಿಗೂ ಈ ಬ್ಯೂಟಿ ಇಷ್ಟವಂತೆ!

ಹೊಸ ಹಯಾಬುಸ ಶಾಹೀದ್ ವಾಹನ ಲೋಕಕ್ಕೆ ನ್ಯೂ ಎಂಟ್ರಿ. ಈತನಲ್ಲಿ ಸಾಕಷ್ಟು ಬೈಕ್ ಮತ್ತು ಕಾರುಗಳಿವೆ. ಹೆಚ್ಚಿನವು ಜಾಲಿ ರೈಡ್ ಗೆ ಸೂಕ್ತವಾದದ್ದು. ಆತ ಪದವಿಯಲ್ಲಿದ್ದಾಗ ಮಾರುತಿ 800 ಕಾರು ಹೊಂದಿದ್ದ. 18ರ ಪ್ರಾಯದಲ್ಲಿ ಬಜಾಜ್ ಕ್ಯಾಲಿಬಾರ್ ಬೈಕ್ ಶಾಹೀದ್ ನಲ್ಲಿತ್ತು. ಈಗ ಆತನಲ್ಲಿರುವುದು ಲಕ್ಷುರಿ ಕಾರುಗಳು. ಈಗ ಶಾಹೀದ್ ಜಾಗ್ವಾರ್ ಲ್ಯಾಂಡ್ ರೋವರ್ ಕಾರ್ ಮಾಲಿಕ ಅಂದ್ರೆ ಆಶ್ಚರ್ಯದ ಸಂಗತಿಯೇನಲ್ಲ ಬಿಡಿ. ಭಾರತದಲ್ಲಿ 2010ರ ಲ್ಯಾಂಡ್ ರೋವರ್ ಮೊದಲ ಗ್ರಾಹಕ ಕೂಡ ಇವನೇ.

ಕೆಲವು ತಿಂಗಳ ಹಿಂದೆ ಆತ ಹರ್ಲಿ ಡೇವಿಡ್ ಸನ್ ಬೈಕ್ ಕೂಡ ಖರೀದಿಸಿದ್ದ. ಶಾಹೀದ್ ಗ್ಯಾರೇಜ್ ನಲ್ಲಿ ಯಮಾಹ ಎಂಟಿ-01 ಮತ್ತು ಹೋಂಡಾ ಸಿಬಿಆರ್ 954 ಎಂಬ ಬೈಕ್ ಗಳೂ ಇವೆ. ಬರೀ ಸಿನಿಮಾಗಳಲ್ಲಿ ಮಾತ್ರವಲ್ಲದೇ ನಿಜ ಜೀವನದಲ್ಲೂ ವಾಹನ ಸವಾರಿಯೆಂದರೆ ಶಾಹೀದ್ ಗೆ ಸಕತ್ ಇಷ್ಟ. ಅದರಲ್ಲೂ ರಾತ್ರಿ ಸವಾರಿ ನೀಡುವ ಮಜನೇ ಬೇರೆ ಅಂತಾನೆ. ಲಕ್ಷುರಿ ಸ್ಪೋರ್ಟ್ಸ್ ಕಾರು ಫೋರ್ಡ್ ಮಸ್ಟಾಂಗ್ ಖರೀದಿಸುವುದು ಶಾಹೀದ್ ಕಪೂರ್ ಮುಂದಿನ ಕನಸಂತೆ.