ಪ್ರತಿಭಟನೆ ಮಾಡೋದಿಲ್ಲ ಅಂತ ಅಗ್ರಿಮೆಂಟಿಗೆ ಸಹಿಹಾಕಿ

ಮಾರುತಿ ಸಿಬ್ಬಂದಿಗಳು ಮಾನೆಸರ್ ಘಟಕ ಪ್ರವೇಶಿಸುವಾಗ ಅವರಲ್ಲಿ ಬಾಂಡ್ ಪೇಪರ್ ಗೆ ಸಹಿ ಹಾಕಿಸಲಾಗುತ್ತದೆ. ಯಾರು ಸಹಿ ಹಾಕುವುದಿಲ್ಲವೋ ಅವರಿಗೆ ಫ್ಯಾಕ್ಟರಿಯೊಳಗೆ ಪ್ರವೇಶವಿಲ್ಲ. ಕಂಪನಿಯ ಸಿಬ್ಬಂದಿಗಳು ಗುಡ್ ಕಂಡಕ್ಟ್ ಬಾಂಡಿಗೆ ಸಹಿ ಹಾಕಲು ನಿರಾಕರಿಸಿದರೆ ಮತ್ತೊಂದು ಪ್ರತಿಭಟನೆಗೆ ಮಾನೆಸರ್ ಘಟಕ ಸಾಕ್ಷಿಯಾಗುವ ನಿರೀಕ್ಷೆಯಿದೆ.

"ಉತ್ತಮ ನಡತೆ ಒಪ್ಪಂದ"ಕ್ಕೆ ಸಹಿ ಹಾಕುವಂತೆ ಸಿಬ್ಬಂದಿಗಳಿಗೆ ತಿಳಿಸಲಾಗಿದೆ. ಈ ರೀತಿ ಸಹಿ ಹಾಕದ ನೌಕರರನ್ನು ಫ್ಯಾಕ್ಟರಿಯೊಳಗೆ ಪ್ರವೇಶಿಸಲು ಬಿಡುವುದಿಲ್ಲ" ಎಂದು ಕಂಪನಿಯ ಮೂಲಗಳು ತಿಳಿಸಿವೆ.

ಉತ್ಪಾದನೆಯ ಗುಣಮಟ್ಟದ ಹಿನ್ನಡೆಗೆ ಕಾರಣವಾಗುತ್ತಿರುವ ಸಿಬ್ಬಂದಿಗಳ ಮೇಲೆ ಕಂಪನಿಯು ಕಠಿಣ ನಿಲುವು ತೆಗೆದುಕೊಳ್ಳಲು ಕಂಪನಿ ನಿರ್ಧರಿಸಿದೆ. ಕಂಪನಿಯು ಇತ್ತೀಚೆಗೆ ಗುಣಮಟ್ಟ ಪರೀಕ್ಷೆಗೆ ಬಿಟ್ಟ 437 ಕಾರುಗಳಲ್ಲಿ ಕೇವಲ 96 ಕಾರುಗಳು ಮಾತ್ರ ಗುಣಮಟ್ಟ ಹೊಂದಿದ್ದವು.

ಮಾರುತಿ ಸುಜುಕಿ ಸಿಬ್ಬಂದಿಗಳು ನೂತನ ಕಾರ್ಮಿಕ ಸಂಘಕ್ಕೆ ಅನುಮತಿ ನೀಡಬೇಕೆಂದು ಪ್ರತಿಭಟನೆ ನಡೆಸಿದ್ದರು. ಆದರೆ ಇದನ್ನು ಕಂಪನಿ ನಿರಾಕರಿಸಿತ್ತು. ಇದಕ್ಕಾಗಿ ಇತ್ತೀಚೆಗೆ ಮಾನೆಸರ್ ಘಟಕದ ಸಿಬ್ಬಂದಿಗಳು 13 ದಿನಗಳ ಪ್ರತಿಭಟನೆ ನಡೆಸಿದ್ದಾರೆ. ಇಂತಹ ಘಟನೆ ಭವಿಷ್ಯದಲ್ಲಿ ನಡೆಯದಂತೆ ಕಂಪನಿಯು ಬಾಂಡ್ ಪೇಪರಿಗೆ ಸಹಿ ಹಾಕಿಸಲು ನಿರ್ಧರಿಸಿದೆ.