ಮಾರುತಿ ಸುಜುಕಿ ವೆಚ್ಚ ಕಡಿತಕ್ಕೆ ಹೊಸ ಒಪ್ಪಂದ

"ಈ ವರ್ಷದ ಅಂತ್ಯಕ್ಕೆ ಕಂಪನಿಯು ಬಿಡಿಭಾಗಗಳ ಖರೀದಿಯನ್ನು ಸ್ಥಳೀಕರಣ ಮಾಡಲಿದೆ. ಇದಕ್ಕಾಗಿ ಹೊಸ ಒಪ್ಪಂದವೊಂದನ್ನು ಮಾಡಿಕೊಂಡಿದ್ದೇವೆ" ಎಂದು ಮಾರುತಿ ಚೇರ್ಮನ್ ಆರ್ ಸಿ ಭಾರ್ಗವ ಹೇಳಿದ್ದಾರೆ.

"ಇದರೊಂದಿಗೆ ದೇಶದ ಬಿಡಿಭಾಗಗಳ ಕಂಪನಿಗಳು ತಮ್ಮ ದಕ್ಷತೆ ಹೆಚ್ಚಿಸಲು ಅವರಿಗೆ ಸಹಾಯ ಮಾಡಲಿದ್ದೇವೆ. ದೇಶಿಯವಾಗಿ ಖರೀದಿಸುವುದು ಕಂಪನಿಗೆ ಲಾಭದಾಯಕ" ಎಂದರು.

ಇದರೊಂದಿಗೆ ಕಂಪನಿಯು ಆಲ್ಟೊ ಕಾರನ್ನು ಪರಿಷ್ಕರಿಸಲು ಯೋಜಿಸಿದೆ. ನೂತನ ಆಲ್ಟೊ ವರ್ಷನ್ ಕಾರಿಗಾಗಿ ಕಂಪನಿಯ ರೊಹ್ತಾಕ್ ಘಟಕದಲ್ಲಿ ಸಂಶೋಧನೆ ನಡೆಸಲಾಗುವುದು ಎಂದು ಭಾರ್ಗವ ಹೇಳಿದ್ದಾರೆ.

ಇದರೊಂದಿಗೆ ಮಾರುತಿ ಕಂಪನಿಯು ಫಿಯೆಟ್ ಇಂಡಿಯಾದೊಂದಿಗೆ ಡೀಸೆಲ್ ಎಂಜಿನ್ ಗಾಗಿ ಮಾತುಕತೆ ನಡೆಸುತ್ತಿದೆ. ಡೀಸೆಲ್ ಕಾರುಗಳಿಗೆ ಬೇಡಿಕೆ ಹೆಚ್ಚಾದ ಸಮಯದಲ್ಲಿ ಮಾನೆಸರ್ ಎಂಜಿನ್ ಘಟಕದಲ್ಲಿ ಹೆಚ್ಚು ಹೆಚ್ಚು ಎಂಜಿನ್ ಉತ್ಪಾದಿಸಲಾಗುವುದು ಎಂದರು.