ಮಳೆಗಾಲದಲ್ಲಿ ಕಾರು ಚಾಲನೆ: ನಿಮ್ಮ ವಾಹನ ಸುರಕ್ಷಿತವಾಗಿಡಲು ಈ ಟಿಪ್ಸ್ ಮಿಸ್ ಮಾಡ್ಬೇಡಿ!
ಭಾರತೀಯ ಹವಾಮಾನ ಇಲಾಖೆ (IMD) ಮುನ್ಸೂಚನೆ ಪ್ರಕಾರ, ಇಂದು ಅಂದರೆ ನವೆಂಬರ್ 14 ರಂದು ಚೆನ್ನೈನಲ್ಲಿ ಸಾಧಾರಣ ಮಳೆಯಾಗಲಿದೆ. ಅದೇ ರೀತಿ, ಕರಾವಳಿ ಆಂಧ್ರಪ್ರದೇಶದ ಹಲವೆಡೆ ಮಳೆಯಾಗಲಿದ್ದು, ಕೆಲವು ಕಡೆ ಭಾರಿ ಮಳೆಯಾಗುವ ಸಾಧ್ಯತೆಯಿದೆ. ಚೆನ್ನೈ, ಪುದುಚೇರಿ, ನೆಲ್ಲೂರು ಮತ್ತು ವಿಶಾಖಪಟ್ಟಣಂ ಪ್ರದೇಶದ ವಾಹನ ಸವಾರರು ಜಾಗರೂಕರಾಗಿರುವುದು ಒಳಿತು. ಮಳೆಯಿಂದ ನಿಮ್ಮ ಕಾರು ಅಥವಾ ಇವಿ ವಾಹನಗಳಿಗೆ ಹಾನಿಯಾಗದಂತೆ ತಡೆಯಲು ಈಗಲೇ ಸಣ್ಣಪುಟ್ಟ ತಪಾಸಣೆ ಮಾಡಿಕೊಳ್ಳಿ. ಹಾಗೆಯೇ, ಸುರಕ್ಷಿತ ರಸ್ತೆಗಳನ್ನು ಆಯ್ದುಕೊಂಡು, ವಾಹನಗಳನ್ನು ಎತ್ತರದ ಪ್ರದೇಶಗಳಲ್ಲಿ ಪಾರ್ಕ್ ಮಾಡುವುದು ಸೂಕ್ತ.
ಚೆನ್ನೈನಲ್ಲಿ ಇಂದು ಮತ್ತು ಭಾನುವಾರ ತುಂತುರು ಮಳೆಯಾಗುವ ಸಾಧ್ಯತೆಯಿದ್ದು, ಸದ್ಯಕ್ಕೆ ಯಾವುದೇ ದೊಡ್ಡ ಎಚ್ಚರಿಕೆ ನೀಡಿಲ್ಲ. ಆದರೆ ಕರಾವಳಿ ಆಂಧ್ರದಲ್ಲಿ ಇಂದು ಮತ್ತು ಭಾನುವಾರ ಬಿರುಗಾಳಿ ಸಹಿತ ಭಾರಿ ಮಳೆಯಾಗಬಹುದು. ನೆಲ್ಲೂರು ಮತ್ತು ವೈಜಾಗ್ ನಿವಾಸಿಗಳು ಪ್ರಯಾಣ ಬೆಳೆಸುವ ಮುನ್ನ ಲೈವ್ ವೆದರ್ ಅಪ್ಡೇಟ್ಸ್ ನೋಡಿಕೊಳ್ಳುವುದು ಒಳ್ಳೆಯದು. ಜೊತೆಗೆ, ನವೆಂಬರ್ 15 ಮತ್ತು 16 ರಂದು ತಮಿಳುನಾಡಿನಾದ್ಯಂತ ಭಾರಿ ಮಳೆಯಾಗಲಿದೆ ಎಂದು IMD ತಿಳಿಸಿದೆ. ಇದರಿಂದಾಗಿ ತಗ್ಗು ಪ್ರದೇಶಗಳು ಮತ್ತು ಅಂಡರ್ಪಾಸ್ಗಳಲ್ಲಿ ನೀರು ನಿಲ್ಲುವ ಸಾಧ್ಯತೆಯಿದೆ.

ಹವಾಮಾನ ಇಲಾಖೆಯಿಂದ ರೇನ್ ಅಲರ್ಟ್: ಚೆನ್ನೈ, ಪುದುಚೇರಿ, ನೆಲ್ಲೂರು, ವೈಜಾಗ್ ಮಾಹಿತಿ
ಮಳೆಯಲ್ಲಿ ಡ್ರೈವ್ ಮಾಡುವ ಮುನ್ನ ನಿಮ್ಮ ವಾಹನವನ್ನು ಒಮ್ಮೆ ಪರಿಶೀಲಿಸಿಕೊಳ್ಳಿ. ಟೈರ್ ಗ್ರಿಪ್ ಮತ್ತು ಏರ್ ಪ್ರೆಶರ್ ಸರಿಯಾಗಿದೆಯೇ ಎಂದು ನೋಡಿಕೊಳ್ಳಿ, ಇದು ರಸ್ತೆಯಲ್ಲಿ ಕಾರು ಸ್ಕಿಡ್ ಆಗುವುದನ್ನು ತಡೆಯುತ್ತದೆ. ಸುರಕ್ಷಿತ ಜಾಗದಲ್ಲಿ ಬ್ರೇಕ್ ಪರೀಕ್ಷಿಸಿ. ವೈಪರ್ ಹಳೆಯದಾಗಿದ್ದರೆ ತಕ್ಷಣ ಬದಲಾಯಿಸಿ ಮತ್ತು ವಾಷರ್ ಫ್ಲೂಯಿಡ್ ಭರ್ತಿ ಮಾಡಿ. ಸನ್ರೂಫ್ ಮತ್ತು ಕೌಲ್ ಡ್ರೈನ್ ಪ್ರದೇಶದಲ್ಲಿ ಎಲೆಗಳು ಬಿದ್ದಿದ್ದರೆ ತೆಗೆಯಿರಿ, ಇದರಿಂದ ಕಾರಿನೊಳಗೆ ನೀರು ಸೋರುವುದು ತಪ್ಪುತ್ತದೆ. ಡೋರ್ ಸೀಲ್ ಸರಿಯಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ. ಇವಿ (EV) ವಾಹನ ಬಳಸುವವರು ಚಾರ್ಜಿಂಗ್ ಪೋರ್ಟ್ ಗ್ಯಾಸ್ಕೆಟ್ ಹಾಗೂ 12-ವೋಲ್ಟ್ ಬ್ಯಾಟರಿ ಸುಸ್ಥಿತಿಯಲ್ಲಿದೆಯೇ ಎಂದು ಪರಿಶೀಲಿಸುವುದು ಅಗತ್ಯ.
ಹೈಡ್ರೋಸ್ಟಾಟಿಕ್ ಲಾಕ್ ತಡೆಯುವುದು ಹೇಗೆ? ಇನ್ಶೂರೆನ್ಸ್ ಆಡ್-ಆನ್ ಏಕೆ ಅಗತ್ಯ?
ನೀರಿನಲ್ಲಿ ಕಾರು ಚಲಾಯಿಸುವ ಮುನ್ನ ವಾಹನದ ವಾಟರ್ ವೇಡಿಂಗ್ ಕೆಪಾಸಿಟಿ (ನೀರಿನಲ್ಲಿ ಚಲಿಸುವ ಸಾಮರ್ಥ್ಯ) ತಿಳಿದಿರಲಿ. ಉದಾಹರಣೆಗೆ, ಟಾಟಾ ನೆಕ್ಸಾನ್ ಇವಿ 300 ಮಿಲಿಮೀಟರ್ ಆಳದ ನೀರಿನಲ್ಲಿ ನಿಧಾನವಾಗಿ ಚಲಿಸಬಲ್ಲದು. ಮಹೀಂದ್ರಾ XUV400 ವಾಹನವನ್ನು ಟೈರ್ ಮಧ್ಯಭಾಗ ಅಥವಾ ಬಂಪರ್ ಮಟ್ಟಕ್ಕಿಂತ ಕೆಳಗಿರುವ ನೀರಿನಲ್ಲಿ ಮಾತ್ರ ಚಲಾಯಿಸಲು ಸೂಚಿಸಲಾಗುತ್ತದೆ. ಮಳೆ ನೀರಿನಲ್ಲಿ ಕಾರು ಚಲಾಯಿಸುವಾಗ ಲೋ ಗೇರ್ ಬಳಸಿ, ಆಕ್ಸಿಲರೇಟರ್ ಸ್ಥಿರವಾಗಿರಲಿ. ಬೇರೆ ವಾಹನಗಳು ಸೃಷ್ಟಿಸುವ ಅಲೆಗಳಿಂದ ದೂರವಿರಿ. ನೀರಿನಿಂದ ಹೊರಬಂದ ತಕ್ಷಣ ಸಣ್ಣ ವೇಗದಲ್ಲಿ ಹಗುರವಾಗಿ ಬ್ರೇಕ್ ಹಾಕಿ ಅದನ್ನು ಒಣಗಿಸಿಕೊಳ್ಳಿ.
ನೀರಿನ ನಡುವೆ ಕಾರಿನ ಇಂಜಿನ್ ಬಂದ್ ಆದರೆ, ಯಾವುದೇ ಕಾರಣಕ್ಕೂ ಮತ್ತೆ ಸ್ಟಾರ್ಟ್ ಮಾಡಲು ಪ್ರಯತ್ನಿಸಬೇಡಿ. ನಿಮ್ಮ ಬಳಿ 'ಇಂಜಿನ್ ಪ್ರೊಟೆಕ್ಟ್' ಆಡ್-ಆನ್ ಕವರ್ ಇಲ್ಲದಿದ್ದರೆ, ಹೈಡ್ರೋಲಾಕ್ನಿಂದಾಗುವ ನಷ್ಟವನ್ನು ಇನ್ಶೂರೆನ್ಸ್ ಕಂಪನಿಗಳು ಭರಿಸುವುದಿಲ್ಲ. ಈ ಆಡ್-ಆನ್ ಕವರ್ ಇದ್ದರೆ ಮಾತ್ರ ಇಂಜಿನ್ ಮತ್ತು ಗೇರ್ಬಾಕ್ಸ್ಗೆ ನೀರು ಹೊಕ್ಕು ಆಗುವ ಹಾನಿಗೆ ಪರಿಹಾರ ಸಿಗುತ್ತದೆ. ಕಾರು ಕೆಟ್ಟು ನಿಂತಾಗ ಫೋಟೋ ತೆಗೆದುಕೊಂಡು, ಲೊಕೇಶನ್ ಗುರುತಿಸಿ ರೋಡ್ಸೈಡ್ ಅಸಿಸ್ಟೆನ್ಸ್ಗೆ ಕರೆ ಮಾಡಿ. ತಕ್ಷಣ ಇನ್ಶೂರೆನ್ಸ್ ಕಂಪನಿಗೆ ಮಾಹಿತಿ ನೀಡಿ, ಅವರ ಸೂಚನೆಗಳನ್ನು ಪಾಲಿಸಿ.
ಮಳೆಗಾಲದಲ್ಲಿ ಇವಿ ಚಾರ್ಜಿಂಗ್: ಏನು ಮಾಡಬೇಕು? ಏನು ಮಾಡಬಾರದು?
ಪ್ರಮಾಣೀಕೃತ ಇವಿ ಚಾರ್ಜರ್ಗಳು ಮಳೆ ನಿರೋಧಕ (ವೆದರ್ಪ್ರೂಫ್) ಸಾಮರ್ಥ್ಯ ಹೊಂದಿದ್ದು, ವಿದ್ಯುತ್ ಹರಿಯುವ ಮುನ್ನ ಸುರಕ್ಷತಾ ಪರೀಕ್ಷೆ ನಡೆಸುತ್ತವೆ. ಮನೆಗಳಲ್ಲಿ ಬಳಸುವ ವಾಲ್ಬಾಕ್ಸ್ ಚಾರ್ಜರ್ಗಳು ಸಾಮಾನ್ಯವಾಗಿ IP54 ರೇಟಿಂಗ್ ಹೊಂದಿರುತ್ತವೆ. ಆದರೂ, ಚಾರ್ಜಿಂಗ್ ಪೋರ್ಟ್ ಅಥವಾ ಪ್ಲಗ್ ನೀರಿನಲ್ಲಿ ಮುಳುಗಿದ್ದರೆ ಚಾರ್ಜ್ ಮಾಡಬೇಡಿ. ಚಾರ್ಜ್ ಮಾಡುವ ಮುನ್ನ ಪೋರ್ಟ್ ಸುತ್ತಲಿನ ತೇವವನ್ನು ಚೆನ್ನಾಗಿ ಒರೆಸಿ. ಮಳೆಯ ಎಚ್ಚರಿಕೆ ಇದ್ದಾಗ ಬೇಸ್ಮೆಂಟ್ ಪಾರ್ಕಿಂಗ್ ಬಿಟ್ಟು, ಎತ್ತರದ ರಸ್ತೆಗಳಲ್ಲಿ ವಾಹನ ನಿಲ್ಲಿಸಿ. ಕಾರು ಸಂಪೂರ್ಣ ನೀರಿನಲ್ಲಿ ಮುಳುಗಿದ್ದರೆ, ತಕ್ಷಣ ಪವರ್ ಡಿಸ್ಕನೆಕ್ಟ್ ಮಾಡಿ, ಟೋಯಿಂಗ್ ಮೂಲಕ ವರ್ಕ್ಶಾಪ್ಗೆ ಕರೆದೊಯ್ದು ತಪಾಸಣೆ ಮಾಡಿಸಿ.


Click it and Unblock the Notifications
