ವೆಸ್ಪಾ ಸ್ಕೂಟರ್ ಮೂಲಕ ಪಿಯಾಗಿಯೊ ಮರುಪ್ರವೇಶ

"ನೂತನ ವೆಸ್ಪಾ ಹೊರತರುವ ಉದ್ದೇಶದಿಂದ ಹೊಸ ಘಟಕವೊಂದನ್ನು ನಿರ್ಮಿಸುತ್ತಿದ್ದೇವೆ. ಇಲ್ಲಿ ವರ್ಷಕ್ಕೆ ಒಂದುವರೆ ಲಕ್ಷ ವೆಸ್ಪಾ ಸ್ಕೂಟರ್ ಉತ್ಪಾದಿಸಲಾಗುವುದು. ಮುಂದಿನ ವರ್ಷದ ವಾಹನ ಪ್ರದರ್ಶನದಲ್ಲಿ ಹೊಸ ವೆಸ್ಪಾ ಪ್ರದರ್ಶಿಸಲಿದ್ದೇವೆ. ಮಾರ್ಚ್ ವೇಳೆಗೆ ವೆಸ್ಪಾ ಬುಕ್ಕಿಂಗ್ ಆರಂಭಿಸಲಿದ್ದೇವೆ" ಎಂದು ಪಿಯಾಗಿಯೊ ವೆಹಿಕಲ್ಸ್ ಚೇರ್ಮನ್ ರವಿ ಛೋಪ್ರಾ ಹೇಳಿದ್ದಾರೆ.

ನೂತನ ವೆಸ್ಪಾ 125 ಸಿಸಿ ಎಂಜಿನ್ ಹೊಂದಿರಲಿದೆ ಮತ್ತು ಅದು ಗೇರ್ ಲೆಸ್ ಸ್ಕೂಟರ್ ಆಗಿರಲಿದೆ ಎಂದು ಛೋಪ್ರಾ ಮಾಹಿತಿ ನೀಡಿದ್ದಾರೆ. "2013ರ ವೇಳಗೆ ನೂತನ ಘಟಕವು ವರ್ಷಕ್ಕೆ 3 ಲಕ್ಷ ಸ್ಕೂಟರ್ ಉತ್ಪಾದನೆ ಸಾಮರ್ಥ್ಯ ಹೊಂದುವ ನಿರೀಕ್ಷೆಯಿದೆ" ಎಂದು ರವಿ ಛೋಪ್ರಾ ಹೇಳಿದ್ದಾರೆ.

ಕಂಪನಿಯು ಆರಂಭದಲ್ಲಿ ಭಾರತದ ಮಾರುಕಟ್ಟೆಗೆ ಮಾತ್ರ ವೆಸ್ಪಾ ಪರಿಚಯಿಸಲಿದೆ. ಇಲ್ಲಿನ ಸ್ಥಳೀಯ ಬೇಡಿಕೆಯ ಗುರಿ ಮುಟ್ಟಿದ ನಂತರ ವೆಸ್ಪಾ ರಫ್ತು ಕುರಿತು ಆಲೋಚಿಸಲಾಗುವುದು ಎಂದರು. ಇದರೊಂದಿಗೆ ಕಂಪನಿಯು ಭಾರತದಲ್ಲಿ ಬೈಕ್ ಹೊರತರುವ ಕುರಿತು ಅಧ್ಯಯನ ನಡೆಸುತ್ತಿದೆಯಂತೆ. ಆದರೆ ಈ ಕುರಿತು ಹೆಚ್ಚಿನ ಮಾಹಿತಿ ನೀಡಲು ರವಿ ನಿರಾಕರಿಸಿದ್ದಾರೆ.