ಮಾರುತಿ ನೇಮಕಾತಿ ಆರಂಭ, ಸ್ವಿಫ್ಟ್ ಗೆ ಟಾಪ್ ಗೇರ್

ಹೊಸ ಸ್ವಿಫ್ಟ್ ಕಾರಿಗೆ ಬೇಡಿಕೆ ಹೆಚ್ಚಿರುವುದರಿಂದ ಮಾನೆಸರ್ ಘಟಕದಲ್ಲಿ ಇತರ ಕಾರುಗಳ ಉತ್ಪಾದನೆಯನ್ನು ಸ್ಥಗಿತಗೊಳಿಸಲಾಗಿದೆ. ಕಂಪನಿ ಸಿಬ್ಬಂದಿಗಳು ಸುಮಾರು ಎರಡು ವಾರಗಳ ದೀರ್ಘಕಾಲದ ಪ್ರತಿಭಟನೆ ನಡೆಸಿದ್ದರಿಂದ ಉತ್ಪಾದನೆಗೆ ಹಿನ್ನಡೆಯಾಗಿತ್ತು. ಆದರೆ ಕಂಪನಿ ನೌಕರರ ವಿಷಯದಲ್ಲಿ ಯಾವುದೇ ರಾಜಿಗೆ ಮುಂದಾಗಲು ಇಚ್ಚಿಸಲಿಲ್ಲ.

ಕಂಪನಿಯು ಇತ್ತೀಚೆಗೆ ನೌಕರರಿಗೆ ಉತ್ತಮ ನಡತೆ ಬಂಧ ಅಗ್ರಿಮೆಂಟಿಗೆ ಸಹಿಹಾಕುವಂತೆ ನೌಕರರಿಗೆ ಸೂಚಿಸಿತ್ತು. ಇದಕ್ಕೆ ಸಹಿ ಹಾಕದವರನ್ನು ಕಂಪನಿಯು ಘಟಕ ಪ್ರವೇಶಿಸಲು ಅವಕಾಶ ನೀಡಲಿಲ್ಲ. ಸಹಿಹಾಕದ ಸಿಬ್ಬಂದಿ ಸ್ಥಾನಕ್ಕೆ ಹೊಸ ಪರಿಣಿತರನ್ನು ಕಂಪನಿ ನೇಮಕ ಮಾಡಿಕೊಳ್ಳುತ್ತಿದೆ.

ಉತ್ತಮ ನಡತೆ ಬಂಧಕ್ಕೆ 1,800ಸಿಬ್ಬಂದಿಗಳಲ್ಲಿ ಕೇವಲ 95 ನೌಕರರು ಮಾತ್ರ ಸಹಿಹಾಕಿದ್ದರು. ಇದರಲ್ಲಿ ಕೆಲವು ಉದ್ಯೋಗಿಗಳನ್ನು ಈಗಾಗಲೇ ಕೆಲಸದಿಂದ ವಜಾ ಮಾಡಲಾಗಿದೆ.

ನೌಕರರ ಮುಷ್ಕರ ಹೊಸ ಸ್ವಿಫ್ಟ್ ಉತ್ಪಾದನೆಗೆ ಹೊಡೆತ ನೀಡಿದೆ. ಇದರಿಂದಾಗಿ ಸ್ವಿಫ್ಟ್ ವೇಟಿಂಗ್ ಅವಧಿಯು ಹೆಚ್ಚಾಗಿದೆ. ಶೋರೂಂಗಳಲ್ಲಿ ನೂತನ ಸ್ವಿಫ್ಟ್ ಬುಕ್ಕಿಂಗ್ ಸ್ಥಗಿತಗೊಳಿಸಲಾಗಿದೆ. ಇದೀಗ ಸ್ವಿಫ್ಟ್ ವೇಟಿಂಗ್ ಅವಧಿ 6 ತಿಂಗಳಿಗೆ ತಲುಪಿದೆ.