ನೋಡಿ ಸಾರ್, 100 ಕಿ.ಮೀ. ಮೈಲೇಜ್ ನೀಡೋ ಆಡಿ ಕಾರ್

ಕಾರು ಖರೀದಿದಾರರು ಅತ್ಯಂತ ಹೆಚ್ಚು ಪ್ರಾಮುಖ್ಯತೆ ಕೊಡುವ ಅಂಶವೆಂದರೆ ಮೈಲೇಜ್. ದೇಶದ ಅತ್ಯಧಿಕ ಮೈಲೇಜ್ ಕಾರೆಂದರೆ ಇಂಡಿಕಾ ಇವಿ2. ಇದು ಪ್ರತಿಲೀಟರ್ ಇಂಧನಕ್ಕೆ 25 ಕಿ.ಮೀ. ಮೈಲೇಜ್ ನೀಡುತ್ತದೆ. ಆದರೆ ಇಲ್ಲೊಂದು ಕಾರಿದೆ. ಇದು ಇವಿ2 ಕಾರಿಗಿಂತ ನಾಲ್ಕು ಪಟ್ಟು ಹೆಚ್ಚು ಮೈಲೇಜ್ ನೀಡುತ್ತದೆ.

ಜರ್ಮನಿಯ ದುಬಾರಿ ಕಾರು ತಯಾರಿಕಾ ಕಂಪನಿ ಆಡಿ ನೂತನ ಎ3 ಕಾರನ್ನು ಶಾಂಘೈ ವಾಹನ ಪ್ರದರ್ಶನದಲ್ಲಿ ಪ್ರದರ್ಶಿಸಿದೆ. 2012ರ ಆಡಿ ಎ3 ಸಣ್ಣ ಸೆಡಾನ್ ಕಾರಾಗಿದ್ದು ಡೀಸೆಲ್ ಎಂಜಿನ್ ಹೊಂದಿದೆ. ಈ ಕಾರಿನ ವಿಶೇಷ ತಂತ್ರಜ್ಞಾನದ ಎಂಜಿನ್ ಮೈಲೇಜ್ ಹೆಚ್ಚಿಸಲು ನೆರವಾಗಿದೆಯಂತೆ.

ಆಡಿ ಎ3 ಕಾರಲ್ಲಿ ಸಿಲಿಂಡರ್ ಡಿಆಕ್ಟಿವೇಷನ್ ತಂತ್ರಜ್ಞಾನವಿದೆ. ಅಂದ್ರೆ ಕಾರಿನಲ್ಲಿ ಲೋಡ್ ಕಡಿಮೆ ಇದ್ದಾಗ 4 ಸಿಲಿಂಡರ್ ಎಂಜಿನನ್ನು 2 ಸಿಲಿಂಡರ್ ಗೆ ಪರಿವರ್ತಿಸಬಹುದು. ಈ ರೀತಿ ಮಾಡಿ ಗಂಟೆಗೆ 50 ಕಿ.ಮೀ. ವೇಗದಲ್ಲಿ ಸಾಗಿದರೆ ಪ್ರತಿಲೀಟರ್ ಡೀಸೆಲ್ ಗೆ 100 ಕಿ.ಮೀ. ಮೈಲೇಜ್ ದೊರಕುತ್ತದೆ ಎಂದು ಕಂಪನಿ ಹೇಳಿದೆ.

ಮುಂದಿನ ವರ್ಷದ ಆರಂಭದಲ್ಲಿ ಈ ಕಾರು ಯುರೋಪ್ ಮತ್ತು ಅಮೆರಿಕ ದೇಶಗಳ ರಸ್ತೆಗಿಳಿಯಲಿದೆ. ಭಾರತಕ್ಕೆ ಬರುವ ಯಾವುದೇ ಸೂಚನೆ ದೊರಕಿಲ್ಲ. ದರದ ಕುರಿತು ಯಾವುದೇ ಮಾಹಿತಿಯಿಲ್ಲ. ಆಡಿ ಕಂಪನಿಯ ಕಾರಾಗಿರುವ ಕಾರಣ ಇದರ ದರ ಅಗ್ಗವಾಗಿರುವ ಯಾವುದೇ ಸಾಧ್ಯತೆಗಳು ಇಲ್ಲವೆಂದು ಊಹಿಸಬಹುದು.