ಫೆರಾರಿ ಬುಕ್: ಈ ಪುಸ್ತಕದ ದರ 1.25 ಕೋಟಿ ರುಪಾಯಿ

ಫೆರಾರಿ ಕಂಪನಿಯು ತನ್ನ ಇತಿಹಾಸ ಸಾರುವ ಐತಿಹಾಸಿಕ ಪುಸ್ತಕವೊಂದನ್ನು ಹೊರತಂದಿದೆ. ಈ ಪುಸ್ತಕ ಹಲವು ವಿಶೇಷಗಳ ಸಾಗರ. ಇದರಲ್ಲಿ ಹಲವು ಅಂಶಗಳಿವೆ. ಎಲ್ಲಕ್ಕಿಂತ ಮುಖ್ಯವಾಗಿ ಇದರ ದರವೇ 1.25 ಕೋಟಿ ರುಪಾಯಿ.

ಇದರ ಮೌಲ್ಯ ಹೆಚ್ಚಿಸಿದ್ದು ವಜ್ರ ಮತ್ತು ಇತರ ಬೆಲೆಬಾಳುವ ಹರಳುಗಳು. ಮುಖಪುಟದಲ್ಲಿರುವ ಫೆರಾರಿ ಸಿಂಬಲ್ 30 ಕ್ಯಾರೆಟ್ ವಜ್ರದಿಂದ ಮಾಡಲಾಗಿದೆ. ಜೊತೆಗೆ ಇದರಲ್ಲಿ ಸುಮಾರು 1,500 ಬೆಲೆಬಾಳುವ ಹರಳುಗಳನ್ನು ಜೋಡಿಸಲಾಗಿದೆ. ಈ ಪುಸ್ತಕದ ತೂಕ 34 ಕೆ.ಜಿ.

ಈ ಪುಸ್ತಕದ ತೂಕ/ಮೌಲ್ಯ ಹೆಚ್ಚಿಸಲು ಪ್ರಸಕ್ತ ಫೆರಾರಿ ರೇಸ್ ಡ್ರೈವರ್ ಗಳ ಸಹಿಗಳ ಸಂಗ್ರಹವಿದೆ. ಜೊತೆಗೆ ಮಾಜಿ ಫೆರಾರಿ ಚಾಂಪಿಯನ್ ಗಳ ಸಹಿ ಕೂಡ ಇದರಲ್ಲಿದೆ.

ಫೆರಾರಿ ಪಬ್ಲಿಕೇಷನ್ ಈ ಪುಸ್ತಕದ ಕೆಲವೇ ಪ್ರತಿಗಳನ್ನು ಪ್ರಿಂಟ್ ಮಾಡಿದೆ. ಪ್ರತಿದೇಶದಲ್ಲೂ ಒಂದಕ್ಕಿಂತ ಜಾಸ್ತಿ ಪುಸ್ತಕ ಮಾರಾಟ ಮಾಡಲಾಗುವುದಿಲ್ಲವಂತೆ. ಈ ಪುಸ್ತಕದ ಹೆಸರು Enzo Diamante.

"ಫೆರಾರಿ ಇಂಡಿಯಾ ಮತ್ತು ಓಪಸ್ ಮೀಡಿಯಾ ಗ್ರೂಪ್ ಈ ದುಬಾರಿ ಪುಸ್ತಕವನ್ನು ಹೊರತಂದಿದೆ. ಇದು ಭಾರತದ ಮಾರುಕಟ್ಟೆಯಲ್ಲಿರುವ ದುಬಾರಿ ದರದ ಪುಸ್ತಕವಾಗಲಿದೆ" ಎಂದು ಕಂಪನಿ ಪ್ರಕಟಣೆಯಲ್ಲಿ ತಿಳಿಸಿದೆ.