ಲಕ್ಷ ಡೀಸೆಲ್ ಎಂಜಿನ್: ಫಿಯೆಟ್ ಜೊತೆ ಮಾರುತಿ ಡೀಲ್

ಸ್ವಿಫ್ಟ್ ಡೀಸೆಲ್ ಹ್ಯಾಚ್ ಬ್ಯಾಕ್ ಕಾರಿನ ಉತ್ಪಾದನೆ ಹೆಚ್ಚಿಸಲು ಈ ಒಪ್ಪಂದ ನೆರವಾಗಲಿದೆ ಎಂದು ಮಾರುತಿ ಹೇಳಿದೆ. ಡೀಸೆಲ್ ಕಾರಿಗೆ ಅತ್ಯಧಿಕ ಬೇಡಿಕೆಯಿದ್ದರೂ ಎಂಜಿನ್ ಕೊರತೆಯಿಂದ ಡೀಸೆಲ್ ಕಾರುಗಳನ್ನು ಸಮರ್ಪಕವಾಗಿ ಪೂರೈಸಲು ಕಂಪನಿಗೆ ಅಸಾಧ್ಯವಾಗಿತ್ತು.

ಇತ್ತೀಚಿನ ದಿನಗಳಲ್ಲಿ ಡೀಸೆಲ್ ಕಾರುಗಳಿಗೆ ಅತ್ಯಧಿಕವಾಗಿ ಬೇಡಿಕೆಯಿದೆ. ಈ ಹಿಂದೆ ಕಂಪನಿಗಳು 80:20 ಅನುಪಾತದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಕಾರುಗಳನ್ನು ಉತ್ಪಾದಿಸುತ್ತಿದ್ದವು. ಅಂದರೆ ಶೇಕಡ 20ರಷ್ಟು ಡೀಸೆಲ್ ಕಾರುಗಳನ್ನು ಉತ್ಪಾದಿಸಲಾಗುತ್ತಿತ್ತು. ಈಗ ಪರಿಸ್ಥಿತಿ ಉಲ್ಟಾ ಆಗಿದೆ.

ಕೆಲವು ತಿಂಗಳ ಹಿಂದೆ ಮಾರುತಿ ಸುಜುಕಿ ನೂತನ ಸ್ವಿಫ್ಟ್ ಕಾರನ್ನು ಹೊರತಂದಿತ್ತು. ಇದನ್ನು ಲಕ್ಷ ಸಂಖ್ಯೆಯಲ್ಲಿ ಗ್ರಾಹಕರು ಬುಕ್ಕಿಂಗ್ ಮಾಡಿದ್ದರು. ಆದರೆ ಶೇಕಡ 80ರಷ್ಟು ಜನರು ಸ್ವಿಫ್ಟ್ ಡೀಸೆಲ್ ಆವೃತ್ತಿಯನ್ನು ಬುಕ್ ಮಾಡಿರುವುದು ವಿಶೇಷ.

"ಡೀಸೆಲ್ ಕಾರುಗಳಿಗೆ ಬೇಡಿಕೆ ಹೆಚ್ಚಿದರೂ ಉತ್ಪಾದನಾ ಸಾಮರ್ಥ್ಯ ಹೆಚ್ಚಿಸುವ ಸಾಮರ್ಥ್ಯ ನಮ್ಮಲ್ಲಿ ಈಗ ಇಲ್ಲ" ಎಂದು ಮಾರುತಿ ಸುಜುಕಿ ಚೇರ್ಮನ್ ಆರ್ ಸಿ ಭಾರ್ಗವ ಹೇಳಿದ್ದರು.

ಫಿಯೆಟ್ ಕಂಪನಿಯು ಮಾರುತಿಗೆ ಡೀಸೆಲ್ ಎಂಜಿನ್ ಪೂರೈಸುವುದು ಇದೇ ಮೊದಲಲ್ಲ. ಮಾರುತಿಯ ಡೀಸೆಲ್ ಆವೃತ್ತಿಗಳಿಗೆ ಫಿಯೆಟ್ ಎಂಜಿನ್ ಅಳವಡಿಸಲಾಗಿದೆ. ಟಾಟಾ ಮೋಟರ್ಸ್ ಕೂಡ ಡೀಸೆಲ್ ಕಾರುಗಳಿಗೆ ಫಿಯೆಟ್ ಎಂಜಿನ್ ಬಳಸುತ್ತಿದೆ.