ಮಾರುತಿ ಸ್ವಿಫ್ಟ್ ಡೀಸೆಲ್: ಒಂದು ಆಶಾವಾದ

ನವೆಂಬರ್ 2010ರಿಂದ ನವೆಂಬರ್ 2011ರವರೆಗೆ ಮಾರುತಿ ಮಾರಾಟ ಶೇಕಡ 18.5ರಷ್ಟು ಇಳಿಕೆ ಕಂಡಿದೆ. ಜೊತೆಗೆ ಕಂಪನಿಯ ಷೇರು ದರ 962 ರುಪಾಯಿಗೆ ತಲುಪಿ ಶೇಕಡ 0.7ರಷ್ಟು ಇಳಿಕೆ ಕಂಡಿತ್ತು.

ಇಂತಹ ಸಮಯದಲ್ಲಿ ಮುಂಬರುವ ವರ್ಷ ಮಾರುತಿಗೆ ಕೊಂಚ ಆಶಾದಾಯಕವಾಗಿದೆ ಎನ್ನಬಹುದು. ಯಾಕೆಂದರೆ ಕಂಪನಿಯ ಡೀಸೆಲ್ ಕಾರು ಉತ್ಪಾದನೆ ಜನವರಿಯಿಂದ ವೇಗ ಪಡೆದುಕೊಳ್ಳಲಿದೆ.

ಪೆಟ್ರೋಲ್ ದರ ಹೆಚ್ಚಾದ ಕಾರಣ ಹೆಚ್ಚಿನ ಜನರು ಡೀಸೆಲ್ ಕಾರುಗಳತ್ತ ಗಮನ ನೀಡಲಾರಂಭಿಸಿದರು. ಡೀಸೆಲ್ ಕಾರುಗಳ ಸಾಧಕ ಬಾಧಕಗಳ ಕುರಿತು ಯೋಚಿಸದೇ ಹತ್ತರೊಟ್ಟಿಗೆ ಹನ್ನೊಂದು ಎಂಬಂತೆ ಎಲ್ಲರೂ ಡೀಸೆಲ್ ಕಾರು ಖರೀದಿಸುತ್ತಿದ್ದಾರೆ.

ಮಾರುತಿ ಸುಜುಕಿ ಕಂಪನಿಯು ಡೀಸೆಲ್ ಎಂಜಿನ್ ನ್ನು ಫಿಯೆಟ್ ಕಂಪನಿಯಿಂದ ಖರೀದಿಸುತ್ತಿದೆ. ಈ ಕುರಿತು ಕಂಪನಿಯು ಇತ್ತೀಚೆಗೆ ಫಿಯೆಟ್ ಜೊತೆ ಒಪ್ಪಂದ ಮಾಡಿಕೊಂಡಿತ್ತು. ಜನವರಿ ನಂತರ ಕಂಪನಿಯು ಪ್ರತಿತಿಂಗಳು ಸುಮಾರು 25 ಸಾವಿರ ಡೀಸೆಲ್ ಎಂಜಿನ್ ಪಡೆಯಲಿದೆ.

ಕಳೆದ ಆಗಸ್ಟ್ ನಲ್ಲಿ ಮಾರುತಿ ಹೊರತಂದ ಸ್ವಿಫ್ಟ್ ಡೀಸೆಲ್ ಕಾರಿಗೆ ಸುಮಾರು ಒಂದು ಲಕ್ಷ ಗ್ರಾಹಕರು ಬುಕ್ಕಿಂಗ್ ಮಾಡಿದ್ದಾರೆ. ಆದರೆ ಮಾನೆಸರ್ ಘಟಕದಲ್ಲಿ ಪ್ರತಿಭಟನೆ ನಡೆದ ಕಾರಣ ಉತ್ಪಾದನೆಗೆ ಹಿನ್ನಡೆಯಾಗಿತ್ತು. ಮೂಲಗಳ ಪ್ರಕಾರ ಕಂಪನಿಯು ಮುಂದಿನ ವರ್ಷ ಕಾರು ದರಗಳನ್ನು ತುಸು ತಗ್ಗಿಸಲಿದೆಯಂತೆ.

ಮುಂದಿನ ವರ್ಷದ ಆರಂಭದಿಂದ ಮಾರುತಿ ಸುಜುಕಿಗೆ ಒಳ್ಳೆಯ ದಿನಗಳು ಆರಂಭವಾಗುವ ನಿರೀಕ್ಷೆಯಿದೆ. ಯಾಕೆಂದರೆ ಡೀಸೆಲ್ ಕಾರುಗಳ ಉತ್ಪಾದನೆ ಹೆಚ್ಚಾದರೆ ಇನ್ನಷ್ಟು ಗ್ರಾಹಕರು ಸ್ವಿಫ್ಟ್ ಕಾರು ಬುಕ್ಕಿಂಗ್ ಮಾಡಬಹುದು. ಸದ್ಯ ಕಂಪನಿಗೆ ಮಾರಾಟ ಹೆಚ್ಚಿಸಲು ಸ್ವಿಫ್ಟ್ ಡೀಸೆಲ್ ಕಾರು ಒಂದು ಆಶಾವಾದ.