ಹುರ್ರೇ... ಕೊನೆಗೂ ಕಾರು ಹಕ್ಕಿಯಂತೆ ಹಾರಿಬಿಡ್ತು!

ಕಾರು ಹಾರೋ ಚಿತ್ರಗಳು

ನೆದರ್‌ಲ್ಯಾಂಡಿನ ಪಾಲ್-ವಿ ಯುರೋಪ್ ಎನ್‌ವಿ ಕಂಪನಿಯ ಹಾರುವ ಕಾರಿನ ಪ್ರಾಯೋಗಿಕ ಹಾರಾಟ ಯಶಸ್ವಿಯಾಗಿ ಕೊನೆಗೊಂಡಿದೆ. ವೈಯಕ್ತಿಕ ಹಾರಾಟ ಮತ್ತು ಭೂ ವಾಹನ(ಪಾಲ್-ವಿ)ವನ್ನು ಇಲ್ಲಿನ ವಿಮಾನ ನಿಲ್ದಾಣದಲ್ಲಿ ಹಾರಿಸಲಾಯಿತು. ಈ ಕಾರು ಹೆಲಿಕಾಫ್ಟರಿನಂತೆ ಹಾರಾಡಿ ನೋಡುಗರಲ್ಲಿ ಅಚ್ಚರಿ ಮೂಡಿಸಿದ್ದು ವಿಶೇಷ.

ನೆದರ್‌ಲ್ಯಾಂಡಿನ ಎಂಜಿನಿಯರುಗಳ ಗುಂಪು ಈ ಹಾರುವ ಕಾರನ್ನು ವಿನ್ಯಾಸ ಮಾಡಿದ್ದಾರೆ. ಡಚ್ ನ್ಯಾಷನಲ್ ಏರೊಸ್ಪೇಸ್ ಲ್ಯಾಬೋರೆಟರಿ ಮತ್ತು ಡೆಲ್ಫ್ ಯುನಿವರ್ಸಿಟಿ ಕೂಡ ಈ ಹಾರುವ ಕಾರನ್ನು ಅಭಿವೃದ್ಧಿಪಡಿಸಲು ನೆರವಾಗಿವೆ.

ಈ ಹಾರುವ ಕಾರಿನ ಕಾನ್ಸೆಪ್ಟ್ ಮಾದರಿಯನ್ನು 2008ರಲ್ಲಿ ಅನಾವರಣ ಮಾಡಲಾಗಿತ್ತು. 2009ರಲ್ಲಿ ಇದನ್ನು ಒಮ್ಮೆ ಟೆಸ್ಟ್ ಮಾಡಲಾಗಿತ್ತು. ಆದರೆ ಆಗ ಸರಕಾರದ ನೀತಿನಿಯಮಗಳು ಹಾರುವ ಕಾರಿಗೆ ಪೂರಕವಾಗಿರಲಿಲ್ಲ. ನೂತನ ಹಾರುವ ಕಾರು ಒಂದು ಟ್ಯಾಂಕ್ ಇಂಧನದಲ್ಲಿ ರಸ್ತೆಯಲ್ಲಿ 560 ಕಿ.ಮೀ. ದೂರ ಸಂಚಾರಿಸಬಹುದು ಅಥವಾ ಆಕಾಶದಲ್ಲಿ 1200 ಕಿ.ಮೀ. ದೂರ ಹಾರಬಲ್ಲದು.

ಈ ಕಾರು ರಸ್ತೆಯಲ್ಲಿ ಕಾರಿನಂತೆ ಚಲಿಸಬಲ್ಲದು. ಆಕಾಶದಲ್ಲಿ ವಿಮಾನದಂತೆ ಹಾರಬಲ್ಲದು. ಅಷ್ಟೇ ಅಲ್ಲ. ಇದನ್ನು ಬೈಕ್‌ನಂತೆ ರೈಡ್ ಮಾಡಲು ಕೂಡ ಸಾಧ್ಯವಿದೆ. ಖಾಸಗಿ ಕಂಪನಿಗಳ ಉದ್ಯಮಿಗಳಿಗೆ, ವಿಐಪಿಗಳಿಗೆ, ರಾಜಕಾರಣಿಗಳ ನಿತ್ಯ ಸವಾರಿಯನ್ನು ಇದು ಸುಲಭಗೊಳಿಸಲಿದೆ ಎಂದು ಕಂಪನಿ ಹೇಳಿದೆ.

ಸುಮಾರು 20-30 ಗಂಟೆ ತರಬೇತಿ ನೀಡಿ ಈ ಹಾರುವ ಕಾರಿನ ಪರವಾನಿಗೆ ಪಡೆಯಬಹುದಂತೆ. ಇದು ಸುಮಾರು 165 ಮೀಟರ್ ಎತ್ತರದಲ್ಲಿ ಹಾರಬಲ್ಲದು. ಈಗ ಹೆಚ್ಚಿನ ವಾಹನಪ್ರೇಮಿಗಳು ಹಾರುವ ಕನಸು ಕಾಣಲು ಶುರು ಮಾಡಿದ್ದಾರಂತೆ. (ಕನ್ನಡ ಡ್ರೈವ್‌ಸ್ಪಾರ್ಕ್)