ಮುಂದುವರಿದ ಅಮೇಜ್ ಬೇಟೆ; ಹೋಂಡಾ ಮಾರಾಟ ವೃದ್ಧಿ

ಜುಲೈ ತಿಂಗಳಲ್ಲಿ 9,297 ಯುನಿಟ್ ಮಾರಾಟ ಸಾಧಿಸಿರುವ ಹೋಂಡಾ ಕಾರ್ಸ್, ಶೇಕಡಾ 248ರಷ್ಟು ಏರಿಕೆ ದಾಖಲಿಸಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಕೇವಲ 2,667 ಯುನಿಟ್ ಮಾತ್ರ ಸೇಲಾಗಿತ್ತು.

ಈ ಪೈಕಿ ಗ್ರಾಹಕರ ನೆಚ್ಚಿನ ಕಾರು ಎನಿಸಿಕೊಂಡಿರುವ ಹೋಂಡಾ ಅಮೇಜ್ 4,965 ಯುನಿಟ್ ಮಾರಾಟ ದಾಖಲಿಸಿದೆ. ಅಂದರೆ ಒಟ್ಟು ಮಾರಾಟದ ಅರ್ಧದಷ್ಟು ಪಾಲನ್ನು ಅಮೇಜ್ ನಿಭಾಯಿಸಿಕೊಂಡಿದೆ. ಉಳಿದಂತೆ ಬ್ರಿಯೊ ಹ್ಯಾಚ್‌ಬ್ಯಾಕ್ 2,375, ಸಿಟಿ 1,830, ಅಕಾರ್ಡ್ 27 ಹಾಗೂ ಸಿಆರ್‌-ವಿ 100 ಯುನಿಟ್ ಸೇಲಾಗಿವೆ.

ಈ ಮೂಲಕ ಕಳೆದ ಮೂರು ತಿಂಗಳ ಅವಧಿಯಲ್ಲಿ ಹೋಂಡಾ 20,076 ಯುನಿಟ್ ಮಾರಾಟ ದಾಖಲಿಸುವಲ್ಲಿ ಯಶಸ್ವಿಯಾಗಿದೆ. ಈ ಅವಧಿಯಲ್ಲಿ ಶೇಕಡಾ 45ರಷ್ಟು ವೃದ್ಧಿ ಸಾಧಿಸಿದೆ.

ಈಗಾಗಲೇ ಅಮೇಜ್ ಖರೀದಿಸಿರುವ 18,000ದಷ್ಟು ನೂತನ ಗ್ರಾಹಕರು ಸಂತೃಪ್ತಿ ವ್ಯಕ್ತಪಡಿಸಿರುವುದಾಗಿ ಕಂಪನಿ ವ್ಯಕ್ತಪಡಿಸಿದೆ. ಮುಂದಿನ ದಿನಗಳಲ್ಲಿ ಸೇಲ್ಸ್ ಮತ್ತಷ್ಟು ಏರಿಕೆ ಸಾಧಿಸುವ ನಿರೀಕ್ಷೆಯಲ್ಲಿದೆ.