ಮತ್ತೆ ರೋಡ್‌ಗಿಳಿಯಲಿರುವ ದೇಶದ ರಸ್ತೆಗಳ ರಾಜ 'ಅಂಬಿ'

ಇಂದಿನ ಹೊಸ ಪೀಳಿಗೆಯು ಅಂಬಾಸಿಡರ್ ಕಾರು ಬಗ್ಗೆ ಹೆಚ್ಚು ತಿಳಿದುಕೊಂಡಿರಲಾರರು. ಆದರೂ ಹಳೆ ಸಿನೆಮಾ ನೋಡುವವರಿಗೆ ಖಂಡಿತವಾಗಿಯೂ ಅಂಬಾಸಿಡರ್ ಕಾರಿನ ಬಗ್ಗೆ ಸ್ಪಷ್ಟ ಅರಿವಿರಬಹುದು.

'ಭಾರತೀಯ ರಸ್ತೆಯ ರಾಜ' ಎಂದೇ ಬನ್ನಿಸಲ್ಪಟ್ಟಿರುವ ಅಂಬಾಸಿಡರ್ ಕಾರುಗಳನ್ನು 'ಅಂಬಿ' ಎಂಬ ನೆಚ್ಚಿನ ಹೆಸರಿನಿಂದ ಕರೆಯಲಾಗುತ್ತದೆ. ಅಂದ ಹಾಗೆ ಒಂದು ಕಾಲಘಟ್ಟದಲ್ಲಿ ದೇಶದ ಫೇವರಿಟ್ ಅಥವಾ ಪ್ರಖ್ಯಾತ ಕಾರು ಮಾಡೆಲ್ ಎನಿಸಿಕೊಂಡಿದ್ದ ಅಂಬಾಸಿಡರ್ ನೂತನ ವಿನ್ಯಾಸದೊಂದಿಗೆ ಮತ್ತೆ ರಸ್ತೆಗಿಳಿಯಲು ಸಜ್ಜಾಗುತ್ತಿದೆ. ಇದೀಗ ಬಂದಿರುವ ಮಾಹಿತಿ ಪ್ರಕಾರ ಮುಂದಿನ ವರ್ಷ ಅಂಬಾಸಿಡರ್ ಹ್ಯಾಚ್‌ಬ್ಯಾಕ್ ವರ್ಷನ್ ರಸ್ತೆ ಪ್ರವೇಶಿಸಲಿದೆ.

ಹಿಂದೂಸ್ತಾನ್ ಮೋಟಾರ್ಸ್ ವ್ಯವಸ್ಥಾಪಕ ನಿರ್ದೇಶಕ ಹಾಗೂ ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿಯಾಗಿರುವ ಉತ್ತಮ್ ಬೋಸ್ ಇದನ್ನು ಸ್ಪಷ್ಟಪಡಿಸಿದ್ದು, ಪ್ರಸ್ತುತ ಸಂಶೋಧನಾ ಹಾಗೂ ಅಭಿವೃದ್ಧಿ ಹಂತದಲ್ಲಿದೆ ಎಂದಿದ್ದಾರೆ.

ಡ್ರೈವ್ ಸ್ಪಾರ್ಕ್ ಗ್ಯಾಲರಿ

ಇದೇ ಸಂದರ್ಭದಲ್ಲಿ ಮುಂಬರುವ ಎರಡನೇ ತ್ರೈಮಾಸಿಕ ಅವಧಿಯಲ್ಲಿ ಈಗಿರುವ ಮಾಡೆಲ್‌ಗೆ ನೂತನ ಬಿಎಸ್ IV ಕಂಪ್ಲೈಂಟ್ ಡೀಸೆಲ್ ಎಂಜಿನ್ ಆಳವಡಿಸುವುದಾಗಿ ಬೋಸ್ ತಿಳಿಸಿದ್ದಾರೆ. ಪ್ರಸ್ತುತ ಬಿಎಸ್ III ಕಂಪ್ಲೈಂಟ್ ಡೀಸೆಲ್ ಎಂಜಿನ್ ಬಳಸಲಾಗುತ್ತಿದೆ.

ಮಾತು ಮುಂದುವರಿಸಿದ ಬೋಸ್, ಮುಂದಿನ ಆರ್ಥಿಕ ಸಾಲಿನ ಎರಡನೇ ತ್ರೈಮಾಸಿಕ ಅವಧಿಯ ಅಂತ್ಯದಲ್ಲಿ ನಾಲ್ಕು ಮೀಟರ್ ವರ್ಷನ್ ಹಾಗೆಯೇ ಮುಂದಿನ ಆರ್ಥಿಕ ಸಾಲಿನ ಅಂತ್ಯದಲ್ಲಿ ಸಂಪೂರ್ಣವಾಗಿಯೂ ಹೊಸ ಮಾಡೆಲ್ ಆಗಮನವಾಗಲಿದೆ ಎಂದಿದ್ದಾರೆ.

ಈ ಎಲ್ಲ ಘೋಷಣೆಗಳು ಮಾರಾಟದಲ್ಲೂ ಪ್ರಗತಿ ಸಾಧಿಸಲು ನೆರವಾಗಿದ್ದು, ಕಳೆದ ವರ್ಷಕ್ಕೆ ಹೋಲಿಸಿದಾಗ (310) ಈ ಬಾರಿಯ ಫೆಬ್ರವರಿ ತಿಂಗಳಲ್ಲಿ 826 ಯುನಿಟ್ ಮಾರಾಟ ಕಂಡುಕೊಳ್ಳುವಲ್ಲಿ ಯಶಸ್ವಿಯಾಗಿದೆ.