ಪ್ರೋತ್ಸಾಹಧನಕ್ಕೆ ಕತ್ತರಿ; ಫೋರ್ಡ್ ಕಾರ್ಮಿಕರು ಅಸಂತೃಪ್ತಿ

ಬೆಂಗಳೂರಿನ ಬಿಡದಿಯಲ್ಲಿರುವ ಟೊಯೊಟಾ ಕಿರ್ಲೊಸ್ಕರ್ ಘಟಕದಲ್ಲಿ ಕಂಡುಬಂದಿರುವ ಬಿಕ್ಕಿಟ್ಟಿನ ಬೆನ್ನಲ್ಲೇ ಚೆನ್ನೈನಲ್ಲಿರುವ ಫೋರ್ಡ್ ಘಟಕದಲ್ಲೂ ಕಾರ್ಮಿಕರ ಅಸಂತೃಪ್ತಿ ಭುಗಿಲೆದ್ದಿದೆ. ಬೆಂಗಳೂರಿನಲ್ಲಿ ವೇತನ ಪರಿಷ್ಕರಣೆ ಸಂಬಂಧ ಕಾರ್ಮಿಕರು ಮುಷ್ಕರ ಹೂಡಿದ್ದರೆ ಚೆನ್ನೈನಲ್ಲಿ ಫೋರ್ಡ್ ಸೇವೆಗಳಿಗೆ ಬಹಿಷ್ಕಾರ ಹೂಡುವ ಮೂಲಕ ತಮ್ಮ ಅಸಂತೋಷ ವ್ಯಕ್ತಪಡಿಸಿದ್ದಾರೆ.

ಚೆನ್ನೈನ ಮರೈಮಲೈ ನಗರದಲ್ಲಿ ಸ್ಥಿತಗೊಂಡಿರುವ ಫೋರ್ಡ್ ಇಂಡಿಯಾ ಘಟಕದಲ್ಲಿ ಇಂತಹದೊಂದು ಸಮಸ್ಯೆ ತಲೆದೋರಿದೆ. ಹಾಗಿದ್ದರೂ ಉತ್ಪನ್ನ ಪ್ರಕ್ರಿಯೆಗೆ ಯಾವ ತೊಂದರೆಯಾಗದಂತೆ ಎಚ್ಚರ ವಹಿಸುತ್ತಿರುವ ಕೆಲಸಗಾರರು, ಸಂಸ್ಥೆಯ ಉಪಹಾರ ಮಂದಿರದಿಂದ ದೊರಕುವ ಆಹಾರ ಹಾಗೂ ಸಾರಿಗೆ ವ್ಯವಸ್ಥೆಯನ್ನು ಬಹಿಷ್ಕರಿಸುವ ಮೂಲಕ ತಮ್ಮ ಅಸಂತೋಷ ವ್ಯಕ್ತಪಡಸುತ್ತಿದ್ದಾರೆ.

2012ನೇ ಸಾಲಿನಲ್ಲಿ 1.03 ಲಕ್ಷ ಯುನಿಟ್‌ಗಳನ್ನು ಉತ್ಪಾದಿಸುತ್ತಿದ್ದ ಫೋರ್ಡ್ ಚೆನ್ನೈ ಘಟಕದಲ್ಲಿ 2013ರಲ್ಲಿ 1.22 ಲಕ್ಷ ಯುನಿಟ್‌ಗಳನ್ನು ಉತ್ಪಾದಿಸಲಾಗಿದೆ. ಹಾಗಿದ್ದರೂ ಕಾರ್ಯಾಧರಿತ ಪ್ರೋತ್ಸಾಹ ಧನ ಶೇಕಡಾ 26ರಿಂದ 15.8ಕ್ಕೆ ಇಳಿಕೆಗೊಳಿಸಲಾಗಿದೆ.

1995ನೇ ಇಸವಿಯಲ್ಲಿ ಸ್ಥಾಪಿಸಲ್ಪಟ್ಟಿರುವ ಫೋರ್ಡ್ ಚೆನ್ನೈ ಘಟಕದಲ್ಲಿ ಇದೀಗ 6,000ದಷ್ಟು ಕೆಲಸಗಾರರಿದ್ದು, ಫೋರ್ಡ್ ಇಕೊಸ್ಪೋರ್ಟ್, ಫಿಗೊ ಹಾಗೂ ಫಿಯೆಸ್ಟಾಗಳಂತಹ ಆವೃತ್ತಿಗಳನ್ನು ಉತ್ಪಾದಿಸಲಾಗುತ್ತಿದೆ. ಪ್ರಸ್ತುತ ಘಟಕದಿಂದಲೇ ಇಕೊಸ್ಪೋರ್ಟ್ ಕಾಂಪಾಕ್ಟ್ ಎಸ್‌ಯುವಿ 40 ರಾಷ್ಟ್ರಗಳಿಗೆ ರಫ್ತಾಗುತ್ತಿದೆ.