ಕ್ರೂಜ್ ಸೆಡಾನ್‌ಗೆ ಹಿಂದಕ್ಕೆ ಕರೆ; ಸಮಸ್ಯೆ ಏನಪ್ಪಾ?

ಒಂದೆಡೆ 'ಷೆವರ್ಲೆ ಬ್ಲಾಕ್‌ಬಸ್ಟರ್' ಆಕರ್ಷಕ ಡಿಸೆಂಬರ್ ಆಫರುಗಳ ಮೇಳವನ್ನು ಘೋಷಣೆ ಮಾಡಿರುವ ಅಮೆರಿಕ ಮೂಲದ ಜನರಲ್ ಮೋಟಾರ್ಸ್ ಸಂಸ್ಥೆಯು ಇನ್ನೊಂದೆಡೆ ದೇಶದಲ್ಲಿ ಕ್ರೂಜ್ ಸೆಡಾನ್ ಕಾರಿಗೆ ಹಿಂದಕ್ಕೆ ಕರೆ ನೀಡಿದೆ.

ಎಂಜಿನ್ ಭಾಗದಲ್ಲಿ ವೈರ್‌ಗಳಿರುವ ಪಿವಿಸಿ ಬ್ರಾಕೆಟ್‌ನಲ್ಲಿ ಸಮಸ್ಯೆ ಕಾಣಿಸಿಕೊಂಡಿರುವ ಹಿನ್ನೆಲೆಯಲ್ಲಿ ಯಾವುದೇ ಸದ್ದಿಲ್ಲದೆ ಸಂಸ್ಥೆಯು ಹಿಂದಕ್ಕೆ ಕರೆ ನೀಡಿದೆ.

2013ರಲ್ಲಿ ಜನರಲ್ ಮೋಟಾರ್ಸ್ ಸಂಸ್ಥೆಯು, ಸೈಲ್ ಯು-ವಿಎ ಹಾಗೂ ತವೆರಾ ಮಾದರಿಯನ್ನು ಹಿಂಪಡೆದಿತ್ತು. ಹಾಗಿದ್ದರೂ ಎಷ್ಟು ಕ್ರೂಜ್ ಮಾದರಿಗಳನ್ನು ಹಿಂಪಡೆಯಲಾಗುತ್ತಿದೆ ಎಂಬುದು ತಿಳಿದು ಬಂದಿಲ್ಲ.

ಅಂದ ಹಾಗೆ ಭಾರತದಲ್ಲಿ ಕ್ರೂಜ್ ಡೀಸೆಲ್ ಮಾದರಿಯಲ್ಲಿ ಮಾತ್ರ ಮಾರಾಟವಾಗಿದೆ. ಇದು 2.0 ಲೀಟರ್ ಇನ್ ಲೈನ್ ಫೋರ್ ಎಂಜಿನ್ ಪಡೆದುಕೊಳ್ಳಲಿದ್ದು, 166 ಅಶ್ವಶಕ್ತಿ (380 ಎನ್‌ಎಂ ಟಾರ್ಕ್) ಉತ್ಪಾದಿಸಲಿದೆ. ಹಾಗೆಯೇ 6 ಸ್ಪೀಡ್ ಮ್ಯಾನುವಲ್ ಜೊತೆಗೆ 6 ಸ್ಪೀಡ್ ಆಟೋ ಟ್ರಾನ್ಸ್‌ಮಿಷನ್ ಸಹ ಇರಲಿದೆ.

ರೆನೊ ಫ್ಲೂಯನ್ಸ್, ಫೋಕ್ಸ್‌ವ್ಯಾಗನ್ ಜೆಟ್ಟಾ ಹಾಗೂ ಸ್ಕೋಡಾ ಒಕ್ಟಾವಿಯಾ ಮಾದರಿಗಳಿಗೆ ಪ್ರತಿಸ್ಪರ್ಧಿಯಾಗಿರುವ ಕ್ರೂಜ್ ಸೆಡಾನ್ ಕಾರಿನ ದೆಹಲಿ ಎಕ್ಸ್ ಶೋ ಬೆಲೆ 13.80 ಲಕ್ಷ ರು.ಗಳಿಂದ 16.30 ಲಕ್ಷ ರು.ಗಳಿಷ್ಟಿದೆ.