ಬೆಲೆ ಕಡಿತ; ಹ್ಯುಂಡೈ ಮಾರಾಟ ವೃದ್ಧಿ

ಕೇಂದ್ರ ಸರಕಾರದ 2013-14 ಮಧ್ಯಂತರ ಬಜೆಟ್‌ನ ಸಣ್ಣ ಕಾರಿನ ಮೇಲಿನ ಅಬಕಾರಿ ಸುಂಕ ಕಡಿತಗೊಳಿಸಿರುವ ಬೆನ್ನಲ್ಲೇ ದರ ಕಡಿತದ ನೀತಿಯನ್ನು ದಕ್ಷಿಣ ಕೊರಿಯಾ ಮೂಲದ ಹ್ಯುಂಡೈ ಮೋಟಾರ್ ಇಂಡಿಯಾ ಅನುಸರಿಸಿತ್ತು.

ಇದರ ಪರಿಣಾಮವೆಂಬಂತೆ ಮಾರ್ಚ್ ತಿಂಗಳ ಪ್ರಯಾಣಿಕ ಕಾರು ಮಾರಾಟದಲ್ಲೂ ಏರಿಕೆ ದಾಖಲಿಸುವಲ್ಲಿ ಹ್ಯುಂಡೈ ಯಶ ಕಂಡಿದೆ. 2014 ಮಾರ್ಚ್ ತಿಂಗಳಲ್ಲಿ ಹ್ಯುಂಡೈ 35,003 ಯುನಿಟ್ ಕಾರುಗಳನ್ನು ಮಾರಾಟ ಮಾಡಿದ್ದು, 16,705 ಯುನಿಟ್‌ಗಳನ್ನು ರಫ್ತು ಮಾಡಿವೆ. ಈ ಮೂಲಕ ಒಟ್ಟು ಮಾರಾಟವನ್ನು 51,708 ಯುನಿಟ್‌ಗಳಿಗೆ ಏರಿಸುವಲ್ಲಿ ಯಶಸ್ವಿಯಾಗಿದೆ.

ಈ ಮೂಲಕ ಕಳೆದ ವರ್ಷ ಇದೇ ಅವಧಿಗೆ ಹೋಲಿಸಿದಾಗ ಹ್ಯುಂಡೈ ಶೇಕಡಾ 3.4ರಷ್ಟು ಏರಿಕೆ ದಾಖಲಿಸಿದೆ. ಒಟ್ಟಾರೆ ವಾಹನ ಜಗತ್ತು ಕುಸಿತದಲ್ಲಿರುವಾಗ ಹ್ಯುಂಡೈನಿಂದ ಉತ್ತಮ ಬೆಳವಣಿಗೆ ಕಂಡುಬಂದಿದೆ.

ಅಷ್ಟೇ ಅಲ್ಲದೆ ಇದೀಗಷ್ಟೇ ಲಾಂಚ್ ಆಗಿರುವ ಹ್ಯುಂಡೈ ಎಕ್ಸ್‌ಸೆಂಟ್ ಕಾಂಪಾಕ್ಟ್ ಸೆಡಾನ್ ಕಾರು ಮಾರಾಟಕ್ಕೆ ಇನ್ನಷ್ಟು ಉತ್ತೇಜನ ನೀಡುವ ನಿರೀಕ್ಷೆಯನ್ನಿಟ್ಟುಕೊಳ್ಳಲಾಗಿದೆ.