ಆಟೋ ಎಕ್ಸ್ ಪೋದಲ್ಲಿ ಮಹೀಂದ್ರ ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರು ಪ್ರದರ್ಶನ

ಮುಂಬರುವ 2014 ಇಂಡಿಯಾ ಆಟೋ ಎಕ್ಸ್ ಪೋ ಹಲವು ಕಾರಣಗಳಿಂದಾಗಿ ಮಹತ್ವದೆನಿಸಿಕೊಳ್ಳಲಿದೆ. ಈ ಸಂದರ್ಭದಲ್ಲಿ ದೇಶದ ಮುಂಚೂಣಿಯ ವಾಹನ ತಯಾರಿಕ ಸಂಸ್ಥೆಯಾಗಿರುವ ಮಹೀಂದ್ರ ಆಂಡ್ ಮಹೀಂದ್ರ ಸಂಸ್ಥೆಯು, ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರು ಸೇರಿದಂತೆ ಹಲವಾರು ನೂತನ ಕಾನ್ಸೆಪ್ಟ್‌ಗಳನ್ನು ಪ್ರದರ್ಶಿಸಲಿದೆ.

ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರಿನ ಜತೆಗೆ ಫಾರ್ಮುಲಾ ಇ ಕಾರ್ ಮಹೀಂದ್ರದ ಪ್ರಮುಖ ಆಕರ್ಷಣೆಯಾಗಿರಲಿದೆ. ಈ ಮೂಲಕ ಮುಂದಿನ ಜನಾಂಗದ ತಂತ್ರಜ್ಞಾನವನ್ನು ಅವಿಷ್ಕರಿಸಲಿದೆ. ಭವಿಷ್ಯದ ತಂತ್ರಗಾರಿಕೆ ಅಭಿವೃದ್ಧಿಯತ್ತ ನಾವು ಕಾರ್ಯ ಮಗ್ನವಾಗಿದ್ದು, ಆಟೋ ಎಕ್ಸ್ ಪೋದಲ್ಲಿ ಐದು ಮಾದರಿಗಳನ್ನು ಪ್ರದರ್ಶಿಸಲಿದ್ದೇವೆ ಎಂದು ಮಹೀಂದ್ರ ರೇವಾ ಸ್ಥಾಪಕ ಹಾಗೂ ಸಿಇಒ ಆಗಿರುವ ಚೇತನ್ ಮೈನಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಇದೇ ಸಂದರ್ಭದಲ್ಲಿ ಜನಪ್ರಿಯ ಇ2ಒ ಕಾರಿನ ಹೊಸ ವೆರಿಯಂಟ್‌ ಕೂಡಾ ಪ್ರದರ್ಶನವಾಗಲಿದೆ. ಇದರ ಹೊಸತಾದ ಚಾರ್ಜಿಂಗ್ ತಂತ್ರಗಾರಿಕೆಯು ಕಡಿಮೆ ಅವಧಿಯಲ್ಲಿ ಚಾರ್ಜ್ ಮಾಡಲು ನೆರವಾಗಲಿದೆ. ಇದು ಸದ್ಯದಲ್ಲೇ ಮಾರುಕಟ್ಟೆ ಪ್ರವೇಶಿಸಲಿದೆ. ಇನ್ನುಳಿದಂತೆ ಮಹೀಂದ್ರ ವೆರಿಟೊ ಸೆಡಾನ್ ಹಾಗೂ ಹಗುರ ವಾಣಿಜ್ಯ ಮ್ಯಾಕ್ಸಿಮೊ ಕಾರಿನ ವಿದ್ಯುತ್ ವರ್ಷನ್‌ಗಳು ಸಹ ಪ್ರದರ್ಶನವಾಗಲಿದೆ.