ದೋಷಪೂರಿತ ಸ್ವಿಚ್, ಏರ್ ಬ್ಯಾಗ್; ಮೈಕ್ರಾ, ಸನ್ನಿ ಹಿಂದಕ್ಕೆ ಕರೆ

ದೋಷಪೂರಿತ ಎಂಜಿನ್ ಸ್ವಿಚ್, ಏರ್ ಬ್ಯಾಗ್ ಹಿನ್ನೆಲೆಯಲ್ಲಿ ತನ್ನ ಜನಪ್ರಿಯ ಮೈಕ್ರಾ ಹ್ಯಾಚ್ ಬ್ಯಾಕ್ ಹಾಗೂ ಸನ್ನಿ ಸೆಡಾನ್ ಕಾರುಗಳನ್ನು ಹಿಂದಕ್ಕೆ ಕರೆಯಲು ಜಪಾನ್ ಮೂಲದ ಪ್ರಖ್ಯಾತ ವಾಹನ ತಯಾರಿಕ ಸಂಸ್ಥೆಯಾಗಿರುವ ನಿಸ್ಸಾನ್ ನಿರ್ಧರಿಸಿದೆ.

ಭಾರತದಲ್ಲಿ 12,000ಕ್ಕೂ ಹೆಚ್ಚು ಮೈಕ್ರಾ ಹಾಗೂ ಸನ್ನಿ ಮಾದರಿಗಳಿಗೆ ವಾಪಾಸ್ ಕರೆ ನೀಡಲಾಗಿದೆ. ಜಾಗತಿಕ ರಿಕಾಲ್ ಭಾಗವಾಗಿ ಭಾರತದಲ್ಲೂ ಇಂತಹದೊಂದು ನಡೆಯನ್ನು ಸಂಸ್ಥೆ ಅನುಸರಿಸಿದೆ.

ಎಂಜಿನ್ ಸ್ವಿಚ್ ಹಾಗೂ ಏರ್ ಬ್ಯಾಗ್ ನಲ್ಲಿ ತೊಂದರೆ ಕಾಣಿಸಿಕೊಳ್ಳುವ ಸಾಧ್ಯತೆಯ ಹಿನ್ನೆಲೆಯಲ್ಲಿ ಎಚ್ಚೆತ್ತುಕೊಂಡಿರುವ ನಿಸ್ಸಾನ್, 2013 ಜೂನ್ ತಿಂಗಳಿಂದ 2015 ಮಾರ್ಚ್ ತಿಂಗಳ ವರೆಗೆ ನಿರ್ಮಾಣವಾದ ಮಾದರಿಗಳನ್ನು ಹಿಂಪಡೆದಿದೆ.
ಜಾಗತಿಕವಾಗಿ ನಿಸ್ಸಾನ್ ಸಂಸ್ಥೆಯು ಒಟ್ಟು 2,70,000 ವಾಹನಗಳನ್ನು ಹಿಂಪಡೆದುಕೊಂಡಿದ್ದು, ಸಮಸ್ಯೆ ಕಂಡುಬಂದಲ್ಲಿ ಸಂಪೂರ್ಣ ಉಚಿತವಾಗಿ ಸರಿಪಡಿಸಿಕೊಡಲಾಗುವುದು. ಇಲ್ಲೂ ಕಂಡುಬಂದಿರುವ ಗಮನಾರ್ಹ ಅಂಶವೆಂದರೆ ಈ ಏರ್ ಬ್ಯಾಗ್ ಗಳನ್ನು ಜಪಾನ್ ಮೂಲದ ಟಕಟಾ ಸಂಸ್ಥೆ ಒದಗಿಸಿತ್ತು.