"ನಮಸ್ತೆ ಇಂಡಿಯಾ" ಭಾರತೀಯರಿಗೆ ವಿಷ್ ಮಾಡಿದ ಮೆಸ್ಸಿ

ಭಾರತಕ್ಕೆ ಮೆಸ್ಸಿ ಸಂದೇಶ

"ನಮಸ್ತೆ ಇಂಡಿಯಾ. ಭಾರತೀಯ ಬ್ರಾಂಡ್ ಜೊತೆಗೆ ನನ್ನ ಮೊತ್ತ ಮೊದಲ ಜೊತೆಗಾರಿಕೆಯಲ್ಲಿ ಅತೀವ ಉತ್ಸಾಹಿತನಾಗಿದ್ದು, ಟಾಟಾ ಮೋಟಾರ್ಸ್ ಕುಟುಂಬದ ಅಂಗವಾಗಿರುವುದರಲ್ಲಿ ಅತ್ಯಂತ ಸಂತೋಷವಾಗುತ್ತಿದೆ. ಯಾವತ್ತೂ ನಾನು ಭಾರತದ ಬಗ್ಗೆ ಆಕರ್ಷಿತನಾಗಿದ್ದು, ಈ ವೈವಿಧ್ಯಮಯ ದೇಶದ ಬಗ್ಗೆ ಅನೇಕ ವಿಚಾರಗಳನ್ನು ತಿಳಿದುಕೊಂಡಿದ್ದೇನೆ. ಅರ್ಜೇಂಟೀನಾ ರಾಷ್ಟ್ರೀಯ ತಂಡದ ಜೊತೆ ನಾನೊಮ್ಮೆ ಭಾರತಕ್ಕೆ ಭೇಟಿ ಕೊಟ್ಟಿದ್ದು, ಮಗದೊಮ್ಮೆ ಭೇಟಿಯಾಗುವ ನಿರೀಕ್ಷೆಯಲ್ಲಿದ್ದೇನೆ. ಟಾಟಾ ಮೋಟಾರ್ಸ್ ಭಾರತದ ನೈಜ ಪ್ರತಿನಿಧಿಯಾಗಿದ್ದು, ಜಾಗತಿಕವಾಗಿ ಸುದೃಢವಾದ ಸಂಸ್ಥೆಯಾಗಿ ಎದ್ದು ಕಾಣಿಸಿಕೊಂಡಿದೆ. ತನ್ನಲ್ಲೇ ತಾನೇ ನಂಬಿಕೆಯನ್ನಿಟ್ಟುಕೊಂಡು ಯಶಸ್ಸಿನತ್ತ ಮುನ್ನುಗ್ಗಬೇಕಾಗಿದ್ದು, ಅದುವೇ ಮೊದಲ ಅಭಿಯಾನಕ್ಕೆ ಹೇತುವಾಗಿದೆ. ಈ ನಿಟ್ಟಿನಲ್ಲಿ ನಾವೆಲ್ಲರೂ ಜೊತೆಯಾಗಿ ಮತ್ತಷ್ಟು ಮಂದಿಯನ್ನು ಪ್ರೇರೇಪಿಸುವ ನಂಬಿಕೆಯಲ್ಲಿದ್ದೇನೆ" ಎಂದಿದ್ದಾರೆ.

ಭಾರತೀಯ ವಾಹನ ತಯಾರಿಕ ಒಕ್ಕೂಟ (ಎಸ್‌ಐಎಎಂ) ವರದಿಯ ಪ್ರಕಾರ ಪ್ರಯಾಣಿಕ ಮಾರುಕಟ್ಟೆಯಲ್ಲಿ ಟಾಟಾ ಶೇಕಡಾ 5.72ರಷ್ಟು ಶೇರನ್ನು ಹೊಂದಿದೆ. ಈಗ ಮೆಸ್ಸಿ ಬ್ರಾಂಡ್ ಅಂಬಾಸಿಡರ್ ಆಗುವುದರೊಂದಿಗೆ ಟಾಟಾ ತನ್ನ ಆಕ್ರಮಣಕಾರಿ ನೀತಿಯನ್ನು ಅನುಸರಿಸಿದೆ.

ಇದರಂತೆ ನಿರ್ದೇಶಕ ಡ್ಯಾನಿಯಲ್ ಬೆನ್ಮಯಾರ್ ನೇತೃತ್ವದಲ್ಲಿ ಬಾರ್ಸಿಲೋನಾದಲ್ಲಿ ಮೊದಲ ಪ್ರಚಾರ ವಿಡಿಯೋವನ್ನು ಸೆರೆ ಹಿಡಿಯಲಾಗಿದೆ.

ಇಲ್ಲಿ ಟಾಟಾ ಮೋಟಾರ್ಸ್ ಜೆರ್ಸಿ ಧರಿಸಿರುವ ಮೆಸ್ಸಿ 'ನಮಸ್ತೆ ಇಂಡಿಯಾ' ಎಂದು ಸಂಬೋಧಿಸುತ್ತಾರೆ. ಅಲ್ಲದೆ #madeofgreat ಎಂಬ ಹ್ಯಾಶ್ ಟ್ಯಾಗ್ ನಲ್ಲಿ ಪ್ರಚಾರವನ್ನು ಮಾಡಲಾಗುತ್ತಿದೆ.

ಜಾಗತಿಕವಾಗಿಯೂ ಫುಟ್ಬಾಲ್ ಕ್ರೀಡೆ ಹೆಚ್ಚು ಪ್ರಚಲಿತವಾಗಿದ್ದು, ಭಾರತದಲ್ಲೂ ಅಸಂಖ್ಯಾತ ಅಭಿಮಾನಿಗಳಿದ್ದಾರೆ. ಇದೇ ಕಾರಣಕ್ಕಾಗಿ ಮೆಸ್ಸಿ ಅವರನ್ನು ಆಯ್ಕೆ ಮಾಡಲಾಗಿದೆ ಎಂದು ಟಾಟಾ ಪ್ರಯಾಣಿಕ ವಿಭಾಗದ ಅಧ್ಯಕ್ಷರಾಗಿರುವ ಮಯಾಂಕ್ ಪರೀಕ್ ಅಭಿಪ್ರಾಯಪಡುತ್ತಾರೆ.

ಪ್ರಸಕ್ತ ಸಾಲಿನಲ್ಲಿ ಜೆಸ್ಟ್, ಬೋಲ್ಟ್ ಮತ್ತು ಜೆನ್ ಎಕ್ಸ್ ನ್ಯಾನೋ ಮಾದರಿಗಳನ್ನು ಬಿಡುಗಡೆ ಮಾಡಿರುವ ಟಾಟಾ 2020ರ ವರೆಗೆ ವರ್ಷಂಪ್ರತಿ ಎರಡೆರಡು ಮಾದರಿಗಳನ್ನು ಬಿಡುಗಡೆ ಮಾಡುವ ಯೋಜನೆ ಹೊಂದಿದೆ.

#madeofgreat ಮೆಸ್ಸಿ-ಟಾಟಾ ಮೋಟಾರ್ಸ್ ಪುಟಕ್ಕಾಗಿ ಇಲ್ಲಿ ಕ್ಲಿಕ್ಕಿಸಿ

ಟಾಟಾ ಹೆಕ್ಸಾ ಟೆಸ್ಟಿಂಗ್; ಮುಂದಿನ ವರ್ಷ ಭಾರತದಲ್ಲಿ ಬಿಡುಗಡೆ ಮುಂದಕ್ಕೆ ಓದಿ