2017ರಲ್ಲಿ ಬೆಲೆ ಏರಿಕೆಯ ಜೊತೆಗೆ ನೂತನ ಕಾರು ಬಿಡುಗಡೆ ಮಾಡಲಿರುವ ಷೆವರ್ಲೆ

ಭಾರತದಲ್ಲಿರುವ ಷೆವರ್ಲೆ ಶ್ರೇಣಿಯ ಕಾರುಗಳಿಗೆ ಅಂದಾಜು 30,000 ರು.ಗಳ ವರೆಗೆ ಬೆಲೆ ಏರಿಕೆಗೊಳಿಸಲಾಗುವುದು.

ಮಾದರಿಗೆ ಅನ್ವಯವಾಗಿ ಶೇಕಡಾ 1ರಿಂದ 3ರಷ್ಟು ಬೆಲೆ ಏರಿಕೆಗೊಳಿಸಲು ಷೆವರ್ಲೆ ನಿರ್ಧರಿಸಿದೆ. ನೂತನ ಬೆಲೆಯು 2017 ಜನವರಿ ತಿಂಗಳಿಂದ ಜಾರಿಗೆ ಬರಲಿದೆ.

ಸದ್ಯ ಈ ವರ್ಷಾಂತ್ಯದ ಡಿಸೆಂಬರ್ ವೇಳೆಯಲ್ಲಿ ಷೆವರ್ಲೆ ತನ್ನೆಲ್ಲ ಮಾದರಿಗಳಿಗೆ ವಿಶೇಷ ಆಫರುಗಳನ್ನು ನೀಡುತ್ತಿದೆ. ತನ್ಮೂಲಕ ಗರಿಷ್ಠ ಮಾರಾಟವನ್ನು ಗುರಿಯಿರಿಸಿಕೊಂಡಿದೆ.

ವಿದೇಶಿ ವಿನಿಮಯ ದರ ಹೆಚ್ಚಳ, ಗರಿಷ್ಠ ಹಣದುಬ್ಬರ ವೆಚ್ಚ, ಕಚ್ಚಾ ವಸ್ತುಗಳ ಬೆಲೆ ಏರಿಕೆಯಿಂದಾಗಿ ಬೆಲೆ ಏರಿಕೆ ಅನಿವಾರ್ಯವೆನಿಸಿದೆ ಎಂದು ಷೆವರ್ಲೆ ತಿಳಿಸಿದೆ.

2016ನೇ ಸಾಲಿನಲ್ಲಿ ಷೆವರ್ಲೆ ದೇಶದಲ್ಲಿ ಕಾರನ್ನು ಬಿಡುಗಡೆಗೊಳಿಸಿಲ್ಲ. 2015ನೇ ಸಾಲಿನಲ್ಲಿ ಕೊನೆಯದಾಗಿ ಟ್ರೈಲ್ ಬ್ಲೇಜರ್ ಕ್ರೀಡಾ ಬಳಕೆಯ ವಾಹನವನ್ನು ಬಿಡುಗಡೆಗೊಳಿಸಿತ್ತು.

ಪ್ರಸ್ತುತ ಟ್ರೈಲ್ ಬ್ಲೇಜರ್ ಫೇಸ್ ಲಿಫ್ಟ್ ಬಿಡುಗಡೆ ಮಾಡುವ ತಯಾರಿಯಲ್ಲಿ ತೊಡಗಿಸಿಕೊಂಡಿದೆ. ಇದು 2017ನೇ ಸಾಲಿನಲ್ಲಿ ದೇಶವನ್ನು ಪ್ರವೇಶಿಸಲಿದೆ.

ಅದೇ ಹೊತ್ತಿಗೆ ಸ್ಪಿನ್ ಬಹು ಬಳಕೆಯ ವಾಹನವನ್ನು 2017ನೇ ಸಾಲಿನಲ್ಲೇ ಜನರಲ್ ಮೋಟಾರ್ಸ್ ಬಿಡುಗಡೆ ಮಾಡಲಿದೆ. ಇದು ಷೆವರ್ಲೆ ಎಂಜಾಯ್ ಸ್ಥಾನವನ್ನು ತುಂಬಲಿದೆ.

ಏತನ್ಮಧ್ಯೆ ಬೀಟ್ ಆಕ್ಟಿವ್ ಕಾನ್ಸೆಪ್ಟ್ ಕಾರಿನ ತಳಹದಿಯಲ್ಲಿ ನೂತನ ಆಫ್ ರೋಡರ್ ಕಾರನ್ನು ಬಿಡುಗಡೆ ಮಾಡುವ ಯೋಜನೆಯನ್ನು ಷೆವರ್ಲೆ ಹೊಂದಿದೆ. ಇದು 2016 ಆಟೋ ಎಕ್ಸ್ ಪೋದಲ್ಲಿ ಪ್ರದರ್ಶನ ಕಂಡಿರುವುದನ್ನು ನೀವಿಲ್ಲಿ ನೆನಪಿಸಿಕೊಳ್ಳಬಹುದು.

ಮುಂದಿನ ತಲೆಮಾರಿನ ಬೀಟ್ ಆಕ್ಟಿವ್ ಕಾನ್ಸೆಪ್ಟ್ ಕಾರಿನಿಂದ ಸ್ಪೂರ್ತಿ ಪಡೆಯಲಿರುವ ಹೊಸ ಷೆವರ್ಲೆ ಬೀಟ್, ಈಗಾಗಲೇ ಭಾರತೀಯ ರಸ್ತೆಯಲ್ಲಿ ಟೆಸ್ಟಿಂಗ್ ಹಮ್ಮಿಕೊಂಡಿದ್ದು, ಮುಂದಿನ ವರ್ಷದಲ್ಲಿ ಬಿಡುಗಡೆಯಾಗಲಿದೆ.